خش على الفضايح برجلك الشمال جـ2ـ

أنا أتفضحت يارجالة

حرام عليكوا ياجماعة والله تعليقاتكم على الجزء الأول من الفضايح حسستنى أنكم ملايكة وأنى أبن البطة السودة اللى الكل عمال يضحك ويتريق علية
لية كدة ... دا أنا غلباااان وطيييب

معلش أنا أسف أنى أتأخرت عليكم.. بس أنا مزنوق فى الشغل
مش هطول عليكم ... ندخل على الجزء التانى من الفضايح


الواقعة الرابعة : الأباصيرى أمير الأنتقام

أولا أحب أعرفكم أنى عمرى ماكنت شقى أو مزعج وانا صغير
طبعا دة بخلاف شوية حاجات كدة زى المانجا ومية الغسالة اللى كانت فى الجزء الأول
:)
يعنى بأختصار أنا شخص مسالم جداً وأحب أعيش فى حالى
بس.... أتقى شر الحليم إذا غضب
يعنى من الأخر أنا طيب بس لو حد زودها معايا بقلب على شخص غبى
أة.. شخص غبى من اللى مبيفكرش
كل اللى بيبقى فى دماغى ساعتها أنى لازم أخد حقى حتى لو كان أخر يوم فى عمرى... يعنى أموت أسد أحسن ما أعيش أرنب

لغاية كدة حلو وتمام وزى الفل
نيجى عند بداية الفضيحة وبرضة كانت أيام الكلية فى سوهاج

كنت عايش فى بيت طلبة فية حوالى 150 طالب من كل مكان من أسكندرية لغاية اسوان
وكنت أول مرة أتعامل مع أشخاص معرفهمش ولاعمرى شفتهم
كان عندهم شوية مفاهيم غريبة بيتعاملوا بيها..يعنى
المؤدب = أهبل
المحترم = عبيط
المسالم = ضعيف
خدوم = خدام

وعلى المفاهيم دى أنا كنت أهبل وعبيط وضعيف وخدام
يعنى الأكل بتاعى كان بيتسرق من التلاجة
ممكن أدخل الأوضة الأقى واحد فاتح الدولاب بتاعى وبيستخدم الريحة أو كريم الشعر
الاقى واحد عايزنى أنزل أشتريلة حاجة من البقالة

بــــــس ستـــــوب

العالم دى شكلها مبيجيش بالأدب
والأحترام مش هيجيب معاهم نتيجة

وبدأت الأنتقام عشان أعرفهم أنى لما بقلب على حد ببقى غبى

الأنتقام الأول
كنت أيام أمتحانات الترم الأول فى سنة أولى وكنت مزنوق فى المادة ليلة الأمتحان وكنت لسة عامل جردل شاى عشان أعرف أركز وأذاكر
ودخل أحد الشباب ودار الحوار التالى

الشاب: رامى أنت بتعمل أية؟
أنا:يعنى بعمل أية!! بكرة الأمتحان أكيد بذاكر
الشاب: أنا زهقان مش عارف أعمل أية
أنا: غور فى داهية وأزهق بعيد عنى.. أنا عايز أذاكر
الشاب: طيب أنا زهقان .. أعمل أية يعنى
أنا: بقولك أية!! حل عن سمايا أنا عايز أذاكر
الشاب: من مش هسيبك النهاردة وأنا زهقان
انا: بقولك أية متخلينيش أتغابى عليك... أبعد عنى
الشاب: طيب مش ماشى

طراااااااااخ
ودلقت جردل الشاى فى وش الزبون وهو شغال يصوت من الشاى
وعمال يتنطط من السخونية
والشباب كلة خرج من أوضة ومش مصدقين أنى عملت كدة

الأنتقام الثانى
كنت برضة فى سنة أولى فى التيرم التانى وواحد قضاها معايا غلاسة ومش راضى يلم الدور
فقررت أعملها معاة وأديلة مقلب يطلع من عينية

الشخص دة كان نومة تقيل جدا فأستنيت لغاية لما نام ونطيت على الأوضة بتاعتة من الشباك اللى على الصالة وقمت عامل قراطيس ورق صغيرة وطويلة وحطيتها بين صوابع رجلية وولعت فيها النار وطلعت جرى من الشباك

وبعد شوية

أأأأأأأأأأأأأأة حريييـــــقة
وطلع يجرى ويصرخ فى البيت وهو مش مستوعب أية اللى حصلة
لغاية لما لقانى واقف.... وشباب البيت كلة بيضحك علية



الأنتقام التالت
واحد برضة كان بيسوق الهبل على الشيطنة معايا
وحاولت أبعدة عن طريقى مش راضى ومصمم يلعب فى عداد عمرة
وأصحابى قالولة بلاش رامى عشان مش هيسيبك فى حالك
مانا بقيت مشهور بقى..أستاذ ورئيس قسم المقالب فى البيت
وبرضة مش راضى يبعد عنى ويسيبنى فى حالى.. وجة اليوم الموعود

كان الزبون نايم على السرير وفى واحد صاحبنا بيذاكر على المكتب فى نفس الأوضة
والأخ دة كمان نومة تقيل فلقيتها أنسب وقت للمقلب
رحت كبيت شوية مية على السرير بتاعة وعلى البنطلون اللى هو لابسة وأتفقت أنا وشلة من الشباب أننا نقنعة أنة وهو نايم حصلة تبول لاإرادى هههههه

المهم قبل ما المنبة بتاعة يرن بخمس دقايق أتجمعنا عندة فى الأوضة وعملنا نفسنا بندور على حاجة لغاية لما صحى من الدوشة
وكان الحوار التالى

هو: اية الدوشة دى
أنا: مش عارف فى ريحة وحشة فى الأوضة
هو: ريحة أية يعنى؟
أنا: مش عارف شكلها جاية من الحمام
وفجأة..المنبة بيرن فحاول الواد ينزل من السرير عشان يطفى المنبة
وبعدين لقيناة تنح شوية ورجع مكانة تانى على السرير وأتغطى
ههههه شكلة حس أن البنطلون والسرير مبلولين ففهم المأساة لوحدة

أنا: أية يابنى مش هتنزل تطفى المنبة
هو: لأ شوية وهنزل
أنا: (بغلاسة) طيب أنزل أطفى المنبة صدعتنا
هو: لأ أطلعوا برة أنا عايز أنام
أنا: (بنفس الغلاسة) لأ قوم مفيش نوم
وقمت شادد الغطاء من علية وبعدين قولت
(بخبث) إإإف هى الريحة زيادة عندك هنا لية هههههههههه
هو: (بزعيق) أطلعوا برة بقى عايز أنام

أنا: خلاص ياشباب أنا عرفت الريحة منين.. تعالوا نطلع برة

وطلعت أنا وباقى الشباب فطسانين من الضحك علية وأنة شرب المقلب
وبعد شوية لقيناة خارج من الأوضة ودخل أستحمى وغير هدومة
وبعدين خد المرتبة وطلعها فى البلكونة

من ساعتها خليتة مسخرة فى البيت
ويحياااااااا الأنتقااااااام



الأنتقام اللى بعدة
كنت ساعتها فى بداية سنة تالتة كلية وكنت كونت شلة زى العسل وبيموتوا فى المقالب وكنا مقضينها أفترا على خلق الله
المهم قررنا نبدأ السنة بمقلب جديد فى طلبة سنة أولى الجداد

فأتفقنا مع أتنين من أصحابنا فى الكلية وعملنالهم تصريح أنهم يباتوا معانا بالليل فى البيت
وأصحابنا دول كانوا أجسام بودى جاردات وشكلهم رجالة مش شباب
المهم فى نص الليل بعد ما المشرفين بتوع البيت روحوا
نزلنا على أوض العيال بتوع أولى كلية الجداد ورزعنا على الباب لحد لما قاموا من النوم مفزوعين وفتحوا الباب وهما خايفين
ودخل أصحابنا وقالولهم أحنا بوليس.... طلعوا بطاقاتكم
وفى الخلفية ماسكين واحد على أساس أن معهوش بطاقة وشغالين يضربوا فية

فالعيال خافوا وطلعوا البطاقات بتاعتهم وأدوها للى عامل ضابط
قام واخد البطاقات منهم وبص فيها وبعدين رماها على الأرض وشدهم من هدومهم وقالهم تعالوا على البوكس
والعيال هيموتوا ومش فاهمين أية اللى بيحصل ولية الضابط عايز ياخدهم على البوكس!! وقعدوا يتحايلوا علية يسيبهم وأنهم معاهم بطاقات وخلاص شوية وكانوا هيعيطوا عشان مياخدهمش على البوكس

وفجأأأأأة.. عرق الشهامة ضرب وأدخلت أنا وأصحابى ومعلش يافندم دول تبعنا وأصحابنا وهما كويسين ومش وش بهدلة وأقسام
والحمد لله الضابط وافق وسابهم عشان خاطرنا والعيال قعدوا يشكروا فينا لاننا أتوسطناهم عند الضابط ووافق يسيبهم
لوووووووووووول
الواحد برضة يعمل الخير ويرمية البحر
ولازم نساعد أصحابنا
وتعيش الشرطة لخدمة الشعب


طبعا فى مقالب كتيييييير ... دول 5 سنين من المقالب اللى ورا بعض

بس دة اللى صالح للنشر لان الباقى فضايح بجد ومينفعش تتكشف على حريمات

برضة عشان زحمة الشغل كفاية فضيحة واحدة النهاردة
وأستنونى فى الجزء الثالث من الفضايح

.....فأبقوا معنا.....

خش على الفضايح برجلك الشمال جـ1ـ

مش عارف يا خوانا مين اللى أخترع موضوع الفضايح دى

بس كل اللى ممكن أقولة "حسبى الله ونعم الوكيل" ... فأبقوا معنا

طبعا بعد البوست الغم اللى فات لازم افرفشكم وافرفش نفسى معاكم يمكن أنسى

مــــــــــــــــــــــلاحظـــــــــــــــــــة

الكلام اللى هيتقال فى البوست دة فى التوب سكريت

يعنى سرى للغااااااااية.... مش عايزين العالم تخرج من البلوج وتصيحلنا

الواقعة الأولى : الاباصيرى و المانجا

مرة زمااااان وأنا صغير كان بابا جايب مانجا... أن أأأأأأأن

وأنتو بقى متعرفونيش فى المانجا...... أبيع أبويا

ممكن أقعد فى البيت أسبوع لغاية لما أخلص عليها كلها

الفطار مانجا ... الغدا مانجا .... وحتى العشا مانجا

وفى يوم مطلعتلوش شمس كانت خالتى وجوزها عندنا بالليل

فقاعدين يتكلموا فى الأوضة والحياة جميلة وزى الفل والدنيا بيس خالص

والعبد لله اللى هو أنا دخلت المطبخ وجبت طبق وأخدت سكينة وفتحت التلاجة وجبت المانجا

ودخلت الأوضة تانى وأنا منشكح الأسارير .... هتعشى مانجا بقى... مين قدى؟؟

وقعدت على الأرض والمسكينة (المانجا) قاعدة فى الطبق بتبصلى وأنا مبتسم

ورفعت السكينة... والمسكينة خايفة.... والسكينة بتقرب... وانا مبتسم

وووفجأأأأأأأأأأأأأة

ينطلق صوت جوز خالتى ويوقف المدبحة اللى كانت هتحصل وهو بيقول

جوز خالتى : رااااااامى أنت بتعمل اية؟؟؟؟

العبد لله : أية.... فى أية!!!! باكل مانجا

جوز خالتى: (نظرة دهشة كأنى قولت انا سرقت مناخير أبو الهول) + شهقة

العبد لله: (بعد ما الخوف سيطر عليا) أية المشكلة فى المانجا

جوز خالتى : (بنفس النظرة اللى تخوف) أنت متعرفش أن أكل المانجا بالليل... حرام

العبد لله: هه .... المانجا ...... حرام ......... (نظرة سريعة فى وجوة الناس اللى قاعدة عشان أعرف الكلام دة صح ولاغلط) وشكلهم كلهم بيقول أن الكلام دة صحيح وماما كانت فى المطبخ

جوز خالتى : أيوة أكل المانجا بالليل حرام.... أنت متعرفش ولا أية؟!!!؟

العبد لله: (نظرة قاسية لبابا من نوع أزاى مقولتليش الكلام دة قبل كدة) وبعدين وبعلو الصوت

ماماااااااااااااااا أكل المانجا بالليل طلع حراااااااام

وبعدها كلهم كانوا واقعين على الأرض من كتر الضحك

ويجعلة عاامر بقى

******************

الواقعة التانية : الاباصيرى الله يرحمة

مرة وأنا صغير وفى أجازة الصيف كنت بلعب الصبح فى الشقة وماما كانت بتغسل

فأنتو عارفين نظام الغسالات ايديال القديمة.. حلة واحدة للغسيل وخرطوم على الجنب لتفريغ المياة

وطبعا عشان الغسيل يطلع نضيف لازم المكونات الاساسية من مسحوق - زهرة - صودا كاوية

وطبعا العبدلله اللى هو أنا بحب أجرب كل حاجة بنفسى، والتجربة خير دليل للتعلم... بس طلعت مش فى كل حاجة

قمت أستنيت لغاية لما ماما دخلت البلكونة ، وأتسحبت لغاية الغسالة بشويش

ورفعت الخرطوم وأشتغلت أشرب البلاوى اللى فى الغسالة ولا كأنى بشرب عصير قصب

وسمعت صوت ماما من ورايا .... يالهوووووووووووووى

أنت بتشرب اية دى مية وسخة ومعفنة

وطبعا كلكم عارفين الصودا الكاوية زى مية النار بالضبط..... مطرح ماتسرى تهرى

بس الحمد لله ربنا ستر ومحصلش حاجة وحشة

وقضيت باقى اليوم فى السرير...... ومنجلكوش فى حاجة وحشة

******************

الواقعة التالتة : الأباصيرى وحش الجبل

أحب أوضح الاول ان أنا كانت كليتى فى سوهاج ولمن لايعلم

فسوهاج تبعد حوالى 8 ساعات بالقطار من القاهرة.. يعنى فى قلب الصعيد

ومش هقولكم على الصعيد بقى من ناحية الجيال... حاجة تهبل

وكنت متعود انا واصحابى نطلع الجبل كل أسبوع مرة

نروح الجبل الصبح وندخل جوة الصحراء والجبال ونتمشى ونتصور

وكنا بنعدى على مجموعة مقابر فى الصحرا من نوع أحفر وأدفن

والمقابر بتبقى مفتوحة يإما من الكلاب والديابة اللى فى الجبل اللى بتطلع وتاكل الجثث

يإما من اللى بيسرقوا الجثث ويبيعوها للطلبة بتوع طب

ونرجع بالليل قبل ما الدنيا تضلم عشان طبعا مفيش عواميد نور فى الجبل

ومفيش أسهم او أتجاهات او يفط أو حتى بنى أدم تسالة أحنا فين؟؟

لاننا كنا بنتمشى ونرجع بالتقريب..ويامااااا توهنا فى الجبل وتعبنا على مارجعنا

وطبعا مفيش شبكة موبايل فى الجبل.. يعنى لو تهت فعلا فأنت مفقود مفقود مفقود ياوالدى

وفى يوم أسود من قرن الخروب رحنا الجبل انا واصحابى وكنا حوالى 10 شباب زى الورد

ومشينا فى الجبل وتهنا والحمد لله وقعدنا فترة كبيرة ندور على طريق الرجوع ومش لاقيينة

والدنيا ضلمت علينا والجبل مفيهوش صويت أبن أسبوع ومفيش أى بادرة أمل أننا نوصل للطريق

وقعدنا على الحال دة بتاع ساعة وشوية لغاية لما الدنيا بقت ضلمة فعلا...... ثم فجاااااااة

هيييييييه المقابر اللى على أول الطريق هناك - دة واحد من أصحابنا وهو فرحان أنة أكتشف الطريق الصح

طبعا فرحنا جدا، ومشينا للمقابر وفاضل بتاع ربع ساعة مشى جوة المقابر ونوصل للطريق عشان ناخد عربية

طبعا مش محتاج أقولكم شعورنا وأحنا ماشيين جوة المقابر

فى الصحرا بالليل والدنيا ضلمة والأرض مليانة بقايا عضم و اكفان لناس ميتة على الارض

بس متخافوش أحنا شباب جدع مكناش خايفين خالص......كنا مرعوبين بس

وبعدين واحد صاحبنا فجأة وقف وسألنا وهو مبحلق فى الطريق

هو أية اللى بيلمع هناك دة؟؟؟؟؟؟

لقينا بتاع 10 أو 12 لمبة جنب بعض وبتلمع

وفجااااااااة تااانى

كل لمبتين لقيناهم ماشيين سوا

بسسسس لغاية هنا أنا عرفت أية دول

أأأأأأأأأأأأأأأأأأأأأأأأأأأة كلااااااااااااااب

محدش يتحرك خليكوا جنب بعض

وأصحابى طبعا بيحترمونى وبيسمعوا كلامى لدرجة أنى ملقيتش حد جنبى

كلهم طلعوا يجروا كأن عزرائيل بيجرى وراهم

تخيلوا المنظر تانى

عشر شباب فى الصحراء والدنيا ضلمة وبيجروا وهما مرعوبين فى المقابر

لأ وكمان فى كلاب بتجرى وراهم عشان تاكلهم

وطبعا الارض رمل وطوب ومش عارفين نجرى كويس والكلاب تقولوش فى الماراثون

طالعين ورانا طياااارة قبل مانهرب منهم..... وفاضل عشان نوصل للطريق بتاع عشر دقايق

يعنى بعملية حسابية بسيطة هتكتشفوا ان الكلاب هتحصلنا فى خلال دقيقتين

وفى خلال خمس دقايق هناخد لقب المرحوم

دة طبعا بعد عذاب العض وتقطيع اللحم والواحد عايش

يعنى هتاكل وأنا صاحى وهشوف الكلاب وهيا بتقطع لحمى بسنانها وتاكلها... رعب رعب رعب

وفجاااااااة ومتسالونيش إزاى

لقينا قدامنا ميكروباص وبابة مفتوح والكمسرى بتاعة واقف على الباب مستنينا

وبقوة الدفع كنا بنط جوة الميكروباص زى المجانين لدرجة أن بعد مادخلنا لقينا الكمسرى قاعد فى أأأأخر كنبة

هتسالونى وأية اللى جاب الميكروباص جوة الصحرا؟؟؟ هقولكم معرفش

لما سالنا الراجل :اية اللى دخلك الصحرا بالليل وأنت معاك ركاب أصلا

قال: مش عارف انا قولت اشوف فى حد فوق ولا لأ

كل اللى اقدر أقولهلكم أن احنا العشرة قطعنا الخلف بعد اللى حصلنا دة

ولغاية النهاردة كل مانفتكر الموقف دة

ونفتكر أحساسنا واحنا عارفين أننا هنتاكل خلال دقايق

نحس بالرعب... ونسال بعض

هو الميكروباص دة طلع منين؟؟؟

وتعيشوا وتفتكروا

******************

كفاية عليكم كدة النهاردة وفاضلكم فى ذمتى عدد 2 فضيحة بالسلطات

العدد القادم يحتوى على الفضائح التالية

الواقعة الرابعة: الاباصيرى أمير الأنتقام
الواقعة الخامسة : الأباصيرى فى المحطة

بذمتكم اية رأيكم فيا؟؟؟؟؟ بنى أدم تحفة وفقرى من يومة ..مش كدة

Sorry Cupid... She Killed Us

كيوبيد أتقتل فى عيد الحب

Sorry Cupid... She Killed Us

***********

أعتزال رجل

وأخيراً

قررت الاعتزال

وتــــرك الحـــــب

ومطــــــــــاردة الخيـــــــال

فقد عرفت الآن أن الحــــب وهمــــــاً

والبحــــث عنــه غبــــاء

لم اعد أؤمن بالحـــب

ولا بــــا لنـســـــاء

لـم يعـد هنـاك شـئ يـسـتحـــق

وانتــهى من قــاموس الحــب

ما يسمــــــــى صـــــدق

فكــــل امرأة أحببتها

وعشـــقتهــــــــــــــــــا

تركتــــــتني وحـــــيداً

وحــــــــــزينــــاَ

لم أجد من يرحم دمـــوعي

وأطفأ الغدر شموعي

فما أصعب أن يبكي رجلاً

بكــــــاء الأطفال

من اجـل شـئ تــافــه

ليـــــــال ٍ طوال

فلمــــاذا الحب إذاً

فقد اكتفيت من الأوهام

وإذا أخطأت وأحببت

ســأحـــــــــب.. لكن

سيكــــون في الأحلام

فـــلا توجـــد امرأة

تستحق من اجلها

أن أبقــــــــــى

ســــــــــــــــاهراً

لا أنـــــــــــــــام

أليس هذا وقت الاعتزال ؟؟؟

النهاردة عيد ميلادى

عايز أسمع السلام الوطنى لعيد ميلادى

النهاردة بقى عندى بتاع 23 سنة

يالا بقى ورونى الهدايا الحلوة

ملحوظة: اللى مش هيباركلى مش هياكل من التورتة

أما اللى هيباركلى.. بردة مش هياكل من التوتة

أية الطفاسة دة

تاج وداير على الكل

من غير رغى كتير عشان العالم اللى قاعدين ميتخنقوش منى
زى مانا مخنوق من مارويتااااا عشان دبستنى فى التاج دة
معلش كل واحد لة يوم ويتفضح
مردودالك فى الافراح بردة

طبعا معتقدش ان فى مدون لسة ميعرفش موضوع التاج دة
عشان كدة هبتدى علطول وأمرى لله
******************

ايه اللي هيحصل لايميلك بعد ما تموت؟
أولا ايميلى دة مخزن أسرارى فية كل حاجة عنى
وطبعا لما أموت لازم يموت معايا لانى من النوع اللى بحب خصوصياتى أوى
بس المشكلة مش فى الأيميل بتاعى، دة كلها شهر ويتقفل لوحدة
المشكلة فعلا فى درج المكتب بتاعى... دة فية أسرار اسرارى
ودة ممنوع على أى شخص فى العيلة يقرب منة أو يلمسة
ولو فى حد فى الأوضة مبفتحش الدرج
مش عارف اعمل فية أية

اديت الباسوورد لحد قبل كده؟

لايمكن.. أطلاقاً.. مطلقاً
على جثتى
on my DEAD BODY

لو اه كانت طبيعة علاقتك بيه ايه؟
مفيش غير شركة الهوتميل والماسنجر وبس

اسمك؟
رامى نعيم

اسم الدلع المشهور بية وسط أصحابك؟
روماااا (اصحابى)1
روميو (العيلة)2
رامى دوت (أختصار دوت كوم بتاعة المواقع)3
الأباصيرى (أصحابى بردة، ودة الاسم اللى بحبة)4

عمرك؟
الحقيقى 22 سنة
فى البطاقة وشهادة الميلاد 23 سنة
عشان اتولدت فى الاردن ولما جيت مصر شهادة الميلاد ضاعت
فسننونى من جديد وزودولى سنة عشان ألحق أدخل المدرسة
كانوا فاكرنى داخل الجنة

البرج؟
أحم.. أحم
الجردل... الجردل.. .الجردل... أينعم الجردل
منك لله ياللى دبستنى

مجال دراستك؟
باشمحاسب قد الدنيا
ومبرمج كمبيوتر كهواية وبعدين دراسة
يعنى محاسب ومهندس كمبيوتر

شخصيتك نوعها ايه؟
توشيبا العربى
هى هى هى هى هى.... باااايخة

صدقونى مش عارف.. أنا كل ساعة شخص جديد
ساعات بحس أن أنا معرفنيش، وأن أول مرة أتعامل معايا
بس فى العموم
طيب وقلبى أبيض وبحب أخدم الناس
وعصبى وبتنرفز بسرعة وأهدى بسرعة
كوكتيل أشخاص يعنى

السفر بالنسبة لك؟
من اساسيات حياتى وممكن تقولوا كل حياتى
لدرجة انى غيرت الكلية بتاعتى عشان أسافر لكلية فى الصعيد
وحاليا شغال برة مصر ولازم أسافر على الأقل مرتين فى السنة

المود بتاعك؟
ضحك وهزار وقفشات طول الوقت
بس لما تطلب معايا كأبة ببقى عامل زى هانى شاكر
ممكن اقضى ايام مبكلمش حد ومبردش على تليفونات
هرجع اقولكم أنا
كوكتيل أشخاص

الأكلة المفضلة؟
الملوخية - الفراخ
الرز المعمر - المكرونة بالبشاميل
الجمبرى - الرقاق

الفول.... محدش يشتم

وقت فراغك بتعمل فيه ايه؟
نايم ، على النت ،أخرج مع أصحابى
أقرا كتاب، أسافر اى حتة

الصفات اللي اخدتها من بابا؟
حاجات كتير مش عارف اية هى بالضبط
بس اهمها.. أنى أحترم كلمتى مهما حصل
كرامتى فوق أى شخص مهما حصل
الكرم- التضحية - الدماغ الناشفة

الصفات اللي اخدتها من ماما؟
أأأممم
الكرم برضة
حب الناس خصوصا المحتاجين
القلب الطيب - الحنية
والنبى هعيط

أكتر 6 حاجات بتكرهها؟
الشخص الغبى اللى بيحسب نفسة ذكى
الشخص اللى أدية أهتمامى وأفاجأ أنة ميستاهلش
الناس اللى بتفتكر أنها مركز الكون وباقى الناس توابع ليها
الشخص الكداب اللى بيحاول يكدب أو يقول حاجة محصلتش
البنت اللى فاكرة أن كل الولاد هيموتوا عليها، حتى لو كانت قمر
الولد اللى يعلق بنت ويفهمها أنة بيحبها عشان بس يحكى لاصحابة ويقضى يومين
اللى يدبسنى فى تاج ويقعد يقرا ولاكأنة عمل حاجة -الكلام ليكى يامروة

أكتر 6 حاجات بتحبها؟
أى حاجة صغيرة، طفل- قطة - عصفورة-أنشالله خنفسة صغيرة
أنى أقعد مع حد بحبة وأتكلم معاة
أنى اقعد لوحدى فى مكان هادى
لما أحس بحب الناس ليا
لما أقدر أسعد حد
لما أحقق حاجة نفسى فيها

الشغل بالنسبة لك؟
حاجة مسلية وبتقتل الوقت وبتجيب فلوس
عايزين أية أكتر من كدة؟

الانترنت و الكمبيوتر بالنسبة لك؟
وأنا فى أعدادى كان لسة الكمبيوتر مش منتشر زى دلوقتى
وكنت بسمع عنة سمع خير من أصحابى، وكنت بستغرب هما بيشغلوة أزاى؟؟
بعدها بفترة سمعت عن الأنترنت وأنة فية اى معلومة عن أى حاجة فى الحياة
المهم قررت أتعلم الكمبيوتر والأنترنت وأول لما أتعلمتهم كان بالنسبة ليا
الكمبيوتر: يعنى ألعاب وأفلام وكليبات
الأنترنت: الأيقونة الزرقا اللى على الديسك توب

وبعدين لفت الايام وقررت أتعلم تصميم المواقع وبعدين تصليح الكمبيوتر
وبعدين البرمجة وقواعد البيانات
و كنت بدرس لاصحابى اللى فى كليات كمبيوتر المواد بتاعتهم
وكانوا بيحلفوا أنى بفهم أحسن من الدكاترة اللى بيدرسولهم المادة
ودة سبب أسم (رامى دوت) اللى فوق

التاج اللى جاى بتاع الفضايح الخمسة

منك لله ياللى فى بالى

أنتظروووووووووونا

ثوانى نسيت أهدى التاج

أقصد نسيت أدبس التاج لحد

أدبس مييييييين

Camera_Girl

ahmEd_H

حواديت

دور على البعد التالت

ضربة شمس

أشربوا بقى

أشعار ضد التيار

خربشات من أشعار شاعر المنفى

أحمـد مطــر

نبذة عـن الشــاعر

الساعة
دائرة ضيقة
وهارب مدان
أمامه وخلفه يركض مخبران
هذا هو الزمان

خلق
في الأرضِ
مخلوقان
إنس
وأمريكان

سر المهنة
اثنانِ في أوطاننا
يرتَعدان خيفة

من يقظَة النائم

اللص .. والحاكم

أُسلوب

كلما حل الظلام
جدتي تروي الأساطير لنا
حتى نَنام
جدتي معجبة جِداً
بأسلوب النظام

ملحوظة
ترك اللص لنا ملحوظة
فوق الحصير
جاء فيها
لعن اللّه الأمير
لم يدع شيئاً لنا نسرِقة

إلا الشخير

وظيفة القلم
عندي قلم
ممتلئ يبحث عن دفتر
و الدفتر يبحث عن شعر
و الشعر بأعماقي مضمر
و ضميري يبحث عن أمنٍ
و الأمن مقيم في المخفر
و المخفر يبحث عن قلم
-عندي قلم
-وقع يا كلب على المحضر

حالات
بالتمادي
يصبِح اللص بأوربا
مديراً للنوادي
وبأمريكا
زعيماً للعصاباتِ وأوكار الفسادِ
و بإوطاني التي
من شرعها قطع الأيادي
يصبح اللص

رئيساً للبلاد

طهارة
ملِك يأتي إليه
يُسقِط الظل عليه
ولهذا
يذهَب النّهرُ إلى البحر
لكي يغسل بالملح يديه

الجدار

وقفت فى زنزانتى أقلب الأفكار

أنا السجين ها هنـا

أم ذلك الحـارس بالجوار؟

فكل ما يفصلنـا جـدار

وفي الجدارِ فتحـة

يرى الظلام من ورائها

وألمح النهـار

* * *

لحارسي ، ولي أنا .. صغار

وزوجـة ودار

لكنـه مثلي هنـا

جاء به وجاء بي قـرار

وبيننا الجـدار

يوشك أن ينـهار

* * *

حدثني الجـدار

فقال لي : أن الذي ترثـي لـه

قد جاء باختيـاره

وجئت بالإجبـار

وقبل أن ينهار فيما بيننـا

حدثني عن أسـد .. سجـانـه حمـار

البطاقة الشخصية

انتزع مني بطاقتي الشخصية ليتأكد أني عربية
وبدأ يفتش حقيبتي وكأني أحمل قنبلة ذرية

وقف يتأملني بصمت سمراء وملامحي ثورية
فتعجبت لمطلبه وسؤاله عن الهوية
كيف لم يعرف من عيوني أني عربية

أم أنه فضل أن أكون أعجمية
لأدخل بلاده دون إبراز الهوية
وطال انتظاري وكأني لست في بلاد عربية

أخبرته أن عروبتي لاتحتاج لبطاقة شخصية
فلم أنتظر على هذه الحدود الوهمية

وتذكرت مديح جدي لأيام الجاهلية
عندما كان العربي يجوب المدن العربية
لايحمل معه سوى زاده ولغته العربية

وبدأ يسأني عن اسمي ، جنسيتي
وسر زيارتي الفجائية
فأجبته أن اسمي وحدة ، جنسيتي عربية

سر زيارتي تاريخية

سألني عن مهنتي وإن كان لي سوابق جنائية
فأجبته أني إنسانة عادية
لكني كنت شاهداً على اغتيال القومية

سأل عن يوم ميلادي وفي أي سنة هجرية
فأجبته أني ولدت يوم ولدت البشرية

سألني إن كنت أحمل أي أمراض وبائية
فأجبته أني أصبت بذبحة صدرية
عندما سألني ابني عن معنى الوحدة العربية

فسألني أي ديانة أتبع الإسلام أم المسيحية
فأجبت بأني أعبد ربي بكل الأديان السماوية

فأعاد لي أوراقي وحقيبتي وبطاقتي الشخصية

وقال لي عودي من حيث أتيت

فبلادي لاتستقبل الحرية

القصيدة للشاعرة : ردينة مصطفى الفيلالي

تهييس على الماشى

طبعا كلنا عارفين التهييس - وهل يخفى القمر - دة نص شباب مصر مهيس

يعنى كتير تسمع واحد بيقولك "فلان دة بيهيس" < عادى

بس الجديد أنك تسمع واحد بيقولك "فلان دة بيهوبص" < جديدة

يعنى هو مش مهيس بس بيحاول يغير المود بتاعة ويهوبص

وأنا بقالى كام يوم مخنوق ومتضايق ، فقررت أخرج من المود بتاعى وأهوبص شوية

يمكن الموضوع يتعدل معايا وأرجع اهيس زى زمان

وبما ان المدونة دى منوعات يعنى شعر وسياسة وقصة وتهييس

فدورت على حاجة أهوبص بيها فلقيت البيتين دول فى الايميل بتاعى

على شط النيل ماشية الجواميس بتقول ياجميل أنا عايزة عريس

يطلع فييس ويحل الكيس نتغدى حشيش ونحلى دريس

هاتغذى حشيش واتعشي حشيش واقفل على نفسى الباب والشيش

لو غيط فدان وحده ما يكفيش فدان ده يادوب أول سرفيس

والبقرة تقول أنا عايزة التور مايكونش مهندس ولا دكتور

ويجر الساقية الفورباى فور ويجيب بيتى فور اربع وخميس

والنعجة تقول انا طالبة خروف مالهوش اخوات ولاعنده ظروف

كسيب وامسكله انا المصروف ويكون حيوان جنتل وحسيس

والفرخة اشترطت قال عالديك انها ماتحبش اى شريك

وقالت له اتحضر خليك شيك ودينى ارقد عالبيض فى باريس

ملخص حياة أى شاب

بحب أة ... بتحب لأ

راجل أة ... متجوز لأ

متعلم أة ... مثقف لأ

بشتغل أة ... محترم لأ

بقبض أة ... فلوس لأ

بتفرج أة ... بشترى لأ

بلبس أة ... هدوم لأ

بسمع أة ... بتكلم لأ

بأكل أة ... بشبع لأ

بتنفس أة ... عايش لأ

أنسان أة ... حر لأ

أأأأأأأأأأأأأة

عندى حالة ملل

مش عارف بصراحة أية اللى بيحصل بس أكيد أكيد انا داخل على دور أكتئاب جديد.. والاكتئاب عندى زى البرد بالضبط ملوش مواعيد محددة

بقالى كام يوم عمال أتنقل من مدونة للتانية أقرا هنا مقال وأشوف موضوع من عند واحد تانى بس المواضيع اللى شدتنى بجد المواضيع اللى فى مدونى دماغ ماك والوعى المصرى طبعا المواضيع عن عماد الكبير سواق الميكروباص اللى أغتصب قى قسم بولاق الدكرور بعصاية مقشة، حاسس بحالة من الأرف من اللى بيحصلنا وأتخيلت نفسى فى الموقف دة لقيت أن تصرفى الوحيد أنى هقتل كل واحد أشترك فى الأغتصاب ومش قتل عادى.. لأ قتل بتعذيب لان دول مش بنى أدمين وميستحقوش الرحمة.. أيوة هقتلهم وأعذبهم ولو كانت دى أخر حاجة فى حياتى

مادام أحنا عايشين فى غابة يبقى لازم أسيب قناع الأرنب بتاع" أمشى جنب الحيط" وألبس قناع الأسد اللى الكل بيعملة ألف حساب!! أفتكرت بيتين شعر لأحمد مطر بيقول فيهم

نعم أنا أرهابى... أنصح كل مخبر ينبح بعد اليوم فى أعقابى

أن يرتدى دبابتة.... لانى سأدق رأسة إن دق يوما بابى

على فكرة أنا عمرى ما كان ليا فى السياسة بس اللى بيحصل فينا دة يعلم الكفر مش السياسة

كنت بقلب من كام يوم فى موبايل واحد صاحبى بدور فية على نغمة جديدة ولا صورة حلوة، لقيت عندة شوية مشاهد تعذيب مواطنين فى اأقسام شرطة ضحكت جامد لان صاحبى دة ميعرفش أصلا أسم رئيس الجمهورية يعنى الموضوع ملوش دعوة بالسياسة أصلا

إلا صحيح هو أسم الرئيس أية.....؟