ملخص حياة أى شاب
بحب أة ... بتحب لأ
راجل أة ... متجوز لأ
متعلم أة ... مثقف لأ
بشتغل أة ... محترم لأ
بقبض أة ... فلوس لأ
بتفرج أة ... بشترى لأ
بلبس أة ... هدوم لأ
بسمع أة ... بتكلم لأ
بأكل أة ... بشبع لأ
بتنفس أة ... عايش لأ
أنسان أة ... حر لأ
أأأأأأأأأأأأأة
21 comments:
ياااه
أنت وجدت الجرح و دست بكل قوتك علية
جيت على الجرح أوى أوى
تحياتى بجد لأنك بأبسط الكلمات عبرت عن كل الآهات
ايه ياراجل ده
بجد رائعه, فعلا ملخص للحياه, بجد أكثر من رائع وربنا معاك (:
ايه يا عم ده حرمت العيشه علينا....بس بجد جامده يا عم تحسسك انك عايز تقوم علطول من اقرب سطوح وترمي نفسك
استمر استمر لحد ماتعدم الناس كلها
بجد بقى بتلخص الحياه كلها
استمر
ايه ياعم الحاجات الحلوة ديه
انت بتتكلم صح خالص
وربنا معاك ومع كل الشباب
وربنا يتولاكم
والله حالنا بقى يصعب على الكافر
معلش استحمل بكرة تتعدل(ومتسألنيش بكرة امتى لأنى معرفش)
تحياتى
عجبتنى اه مليت منها لأ
اول مرة ادخل اه اخر مرة لأ
كلااااااااااااااااااااااااامك جميل و مدونتك جملية
احلي حاجة انك انجزت
لخصت المسالة كلها
تحياتي
hebaz
الجرح موجود فى قلب كل شاب عايش فى مصر، الحياة بقت صعبة ومفيش أى امل أنها تتغير... تحياتى ليكى
esraa
طيب دى ملخص لحياة أى شاب عادى ممكن تشوفية فى مصر.. بس ياترى هموم البنات لو أنكتب على نفس المنوال هتبقى أية..
الكلام نوعان :كلام فارغ وكلام مليان كلام فارغ
وراكوا وراكوا لحد لما تنتحروا :)
أو لحد لما أحوالنا تتصلح وهمومنا تخلص
(على كدة يبقى هتنتحروا الأول)
تحياتى ليكى ومدونتك زى العسل وأسمها جامد مووت
عاشقة الوطن
عندك حق حالنا بقى يصعب على الكافر دة إذا مكانش يعلم الكفر نفسة.. تعالى ندور مع بعض عن حياة أى شاب هتلاقية الصبح نايم وبالليل قاعد على القهوة
وفى الأخر يقولولك الشباب دول مستقبل مصر وأمل الغد ... مستقبل منيل وغد أغبر ومش باينلة شمس
تحياتى ليكى ولبتوع نحو مستقبل مشرق
khaled
مرسى ياخالد ومنور المدونة وكويس أنها عجبتك... ياريت اشوفك تانى ومتبقاش اخر مرة..
على فكرة أحنا بلديات أونطجية زى بعض يعنى
مدونتك مليانة مواضيع كتير تستحق القراية بمزاج،، يومين كدة وأكبس على المدونة بتاعتك.. جهز الشاى
Amr Ahmed
الموضوع لو اتكلمت عنة بالتفصيل ممكن نقعد شهور وأنت شاب وعارف الخنقة اللى الواحد بيعيشها كل يوم
وبلاش تتفرج على مجلس الشعب عشان المرارة وخليك فى الاهلى أحسن
تحياتى
لخصصصصصصت كل حاجه فى كام سطر برافو حللللللوه اوى المدونه بتاعتكجميله والله ومتنوعه خلااص انا هتابعك
مش عايزة أقولك كلام نصايح و أغانى بس أوعى تفقد الأمل
لأن بجد لو فقدناة حنموت
الأمل موجود فى ربنا و فيك و فية و فى كل الى زينا
دوام الحال من المحال
تحياتى
تشرف يا باشا
اول ماتيجى هانده ع الواد دقدق يجيبلك شاى فى الخمسينة
بس خش برجلك اليمين
camera girl
خير الكلام ماقل ودل
انا مبسوط أن المدونة عجبتك ولو ناوية تتابعينى قوليلى عشان أحجزلك كرسى من القهوة اللى جنب المدونة
Hebaz
صدقينى مفيش أمل وعلى مايتغير الحال نكون متنا من الجوع والذل دة لو ممتناش فى قسم شرطة أو من الدم الملوث او من السحابة السودا أو من الخضار المسرطن أو...او..أو
بصى أنا خدتها من أخرها وهاجرت ومش بفكر ارجع تانى- يمكن قرار سلبى بس صدقينى مفيش أمل
عايزة تتأكدى من كلامى جربى وبصى فى وش أى شاب قاعد على قهوة بعد لما يخلص ضحك هتلاقية بيسرح ويفكر فى همومة أو بيتكلم مع واحد صاحبة عن الغم الأزلى اللى هو عايشة وعن البنت اللى معهوش فلوس يقعد معاها فى كافتريا وطبعا معهوش فلوس عشان يتقدملها
وهتلاقية بيحكى عن الشركة اللى أتقدم فيها وقالولة عايزين خبرة وهو لسة متخرج وبيبتدى حياتة، وعن الشركة التانية اللى أتقدم فيها وقالولىة هتشتغل مندوب ب 300 جنية وهو متخرج من كلية محترمة ووووووو
أقول كمان ولاكفاية
أنا لخصت كل الكلام اللى فات دة فى البوست اللى أنتى قريتية
مفيش فااااااااااايدة
Khaled basha
انا كنت قاعد عندك النهاردة
ونديت على الواد دقدق معبرش أهلى
على العموم هعدى عليك تانى كل شوية أشوف الجديد بتاعك
انا يتقالى القهوه الى جانبك اخص
ده مقامى بردو!!!
لألألألأ
شوفتى أنتى فهمتينى غلط أزاى
دا أنا فاتح المدونة فى وسط البلد
والقهوة دى فايف ستار يعنى ميقعدش عليها اقل من عمدة كفر البلوجرية
وبعدين انا هجبلك سندوتشين كبدة ولحمة راس من العربية اللى على أول الشارع
يعععععععع
خلاص متزعليش بقى ربنا ينور طريقك بفلاش كانون
Speedlite 430EX
خلاص صافى ياصورة
حليب يا نيجاتيف ميرسى عموما انا معاكوخلااص شيك القعده دى انا موافقه واعتبرنى مقيمه معاك لحد ما تبطل كتابه تمام؟
خلاص كدة اتفقنا، والقعدة يوم الخميس الساعة سبعة بعد صلاة الجمعة علطول
وخلى بالك الشيشة أجبارى... يعنى تحضرى معاكى وانتى جاية رئتين وجهاز تنفس صناعى :)
أوك
علي رأيك 00 اغلب الناس ماتت من زمان و ماشيين كده بحلاوة الروح
koukawy
المدونة نورت ولعلطت
عندك حق طبعا
احنا بقينا مجرد هوامش لبشر
لاعارفين نكون بشر
ولاعارفين نكون أشباح
تحياتى
Post a Comment