Dec 28, 2006

معنى السياسه .....؟



- سأل طفل والده : ما معنى السياسه .....؟
- فأجابه : لن أخبرك يا بني لانه صعب عليك في هذا السن ، لكن دعني أقرب لك الموضوع ، انا اصرف على البيت لذلك
فلنطلق علي اسم الرأسمالية …وامك تنظم شؤون البيت لذلك سنطلق عليها اسم الحكومة …وانت تحت تصرفها لذلك فسنطلق
عليك اسم الشعب …واخوك الصغير هو املنا فسنطلق عليه اسم المستقبل …اما الخادمة التي عندنا فهي تعيش من ورائنا
فسنطلق عليها اسم القوى الكادحة …اذهب يا بني وفكر عساك تصل الى نتيجة .....وفي الليل لم يستطع الطفل ان ينام .. فنهض من نومه قلقآ وسمع صوت أخيه الصغير يبكي فذهب اليه فوجده تبول في حفاضته



فذهب ليخبر امه فوجدها غارقة في نوم عميق ولم تستيقظ ، وتعجب أن والده ليس نائما بجوارها .. فذهب باحثآ عن أبيه ..فنظر من ثقب باب غرفة الخادمة فوجد أبوه معها


وفي اليوم التالي ،قال الولد لابيه : لقد عرفت يا أبي معنى السياسه ..فقال الوالد : وماذا عرفت ...؟!
فقال الولد :



عندما تلهو الرأسمالية بالقوى الكادحة


تكون الحكومة نائمة في سبات عميق


فيصبح الشعب مهملاً تماماً


و يصبح المستقبل غارقا في القذارة





ولاعزاء للمصريين الشرفاء

Dec 11, 2006

حد يجاوبنى يا أخوانا




ياصباع الخير والجمال على أى حد معدى على البلوج بتاعى
بصوا يا أخوانا بصراحة وبالعربى كدة أنا زهق وطهقت
كل ما أسأل سؤال محيرنى يطلعلى 1000 واحد ويعملولى حلالين المشاكل والعقد
وأن هما لو أخدوهم فى مجلس الأمن كان زمان العالم بقى زى الفل ومفيش مشاكل
دة طبعا ً قبل ما أرزعهم السؤال التمام اللى محيرنى..... بس بعد لما أسأل الوضع بيختلف
الرد بيكون كالأتى: يااااااااااة هو دة بقى السؤال اللى مغلبك ومطلع عينك
تصدق أنك هايف وأسئلتك أهيف منك.... على العموم أنا مستعجل دلوقتى ولما أرجع هجاوبك
هههههههه وأدى وش الضيف يا أخوانا... أسأل وأسأل ومحدش معبر أهلى ببصلة
فمن الأخر كدة قولت مفيش حل غير أنى أكلم نفسى وأسأل أخوانا البلوجرية وأخوانا اللى على النت
يمكن حد يحن عليا ويريحنى من دماغى اللى أتملت أسئلة من غير أجوبة
عشان أنا وصلت لمرحلة جديدة: كل ما أسأل سؤال جديد تطلعلى الرسالة دى فى دماغى



Error 9999
The Dma3' you have Requested is Full
Please Delete some Question and Then Try Again


يالا هاتكل على الله وابدأ الأسئلة بس ياريت مسمعش جملة الأسئلة هايفة وأحنا مستعجلين

س1: لية بنعيش مادام هنموت
س2: لية بنحب مادام بننجرح
س3: لية محدش بيختار أهلة
س4: لية الحياة دايما ظالمة معانا
س5: من جة الأول؟؟ الفرخة ولا البيضة
س6: لية لازم الكبير اللى يبقى على حق
س7: لية الشعب المصرى بقى جبان أوى كدة
س8: لية لما تتوة وأنت سايق بتطفى الكاسيت بتاع العربية وتفتح القزاز
س9: لية أيامنا بقت زى بعضها؟؟ بكرة زى أمبارح وهو نفسة بعد بكرة
س10: لية لازم الولد هو اللى يتقدم للبنت مش العكس؟
س11: لية لما نتخرج جديد ونطلب شغل يقولولنا عايزين خبرة
س12: لية لما البنت توصل 30 سنة تبقى عنست، والولد لما يوصل 30 سنة يبقى عز الشباب
س13: لية لما ضابط يقبض على حرامى يطلعوا صورة الضابط فى الجورنال ويقولوا دة بطل..... مش دى شغلتة بردة زية زى الزبال
س14: لية بنقعد فى الكلية 4 سنين (على الأقل) ندرس فى حاجات ملهاش دعوة بالحياة العملية
س15: لية دايما اسأل سؤال الأقى الناس مستعجلة

تعالوا بقى وراجعوا نفسكم.. كام مرة قلت دى أسئلة هايفة زى اللى كاتبها وبعدين لقيت أن أجاباتك للسؤال مش مقنعة
طبعاً دى مش كل الأسئلة بس دى عينة منهم عشان بس أقدر أحط شوية أسئلة جديدة فى دماغى من غير الرسالة اللى بتطلعلى
يا لا بقى نتقابل فى بوست جديد أنشاء الله

بلوجرية أأأأأأأأأننننصراااف

Nov 29, 2006

كلام أفلام



بسمع من ناس كتير أوى كلمة الأفلام هابطة والافلام هايفة وأفلام بالبشاميل
وحاجات كدة مش عرف بيجيبوها منين!! مع أن أغلب الأفلام فيها كلام جامد مووت
بس محدش بيركز غير مع البت المزة اللى فى الفيلم وبيسيب الفيلم كلة.. أياكش يولع
النهاردة حبيت بس اقولكم لأ.. أحنا اللى هايفين مش الافلام
تعالوا بقى نشوف شوية جمل من الافلام ونعرف أن الناس دى بتحاول تفوقنا
بس أحنا اللى مش عايزين نفوق ومش عايزين نشوف غير الرقاصة والمزة اللى فى الفيلم


مصر بقت قاسية أوى على اولادها- عمارة يعقوبيان
البلد دى اللى يشوفها من فوق غير اللى يشوفها من تحت- طيور الظلام
مصر حلوة أوي من فوق- ايام الغضب
أنت مش قد الناس دول،، أنفد بجلدك يامحروس- الواد محروس بتاع الوزير
انتوا جماعة مش عارفة تبقى حزب و احنا حزب مش عارف يبقى جماعة . اتنين ديابة مينفعوش يعيشوا فى قفص واحد يقطعوا بعض- طيور الظلام
بنلف فى دواير والدنيا تلف بينا ودايما ننتهى من مترح ما ابتدينا طيور الفجر تايهه فى عتمه المدينه- أوقات فراغ
القانون دة للضعفاء، أنما أحنا بناخد حقنا بأيدينا - كراكون فى الشارع
احنا عايشين فى عالم وسخ و الى يكسب هوه الاوسخ- القاهرة 30
يابخت البقر معندهاش مشكلة شقة ولامهر ولاقوانين فعل فاضح ... لية يارب مخلقتنيش كلب؟؟- مسرحية أنت حر
قبل ما تيجى تحط بلدك على الخريطة مش كنت تسأل الاول هيه فين الخريطة- فرحان ملازم أدم
أنا أعمى صحيح بس محبش حد يستعمانى- مسرحية وجهة نظر
واحد من الناس زى كل الناس ناس عايشة بتجرى و شقيانه و اهى عايشة و خلاص مستورة مدام بابنا علينا مقفول بالترباس- واحد من الناس
محدش احسن من حد أنت بتلعب لسانك عشان الناس تصقفلك وأنا بهز وسطى والناس بتصقفلى- الراقصة والسياسى
عايز تبقى محترم بجد؟!! الفلوس هى اللى هتخليك محترم- تيتو
بقت مزابل من فوق ومن تحت مسخ... أحنا فى زمن المسخ- عمارة يعقوبيان
لما المتخرجين مش لاقيين شغل يبقى احنا ياسناكيح هنشتغل- أوقات فراغ
بطارية البلد نامت خالص ومحتاجة زقة- ليلة سقوط بغداد
أترى حين أفقأ عينيك ثم أثبت جوهرتين مكانهما.. هل ترى؟!! هى أشياء لاتشترى- السفارة فى العمارة
أتولدنا أحرار وهنعيش أحرار ونموت جعانين- مسرحية أنت حر
لو كنتوا بالذل قبلتوا وبالهوان رضيتوا... فياريتكوا ما أتولدتوا ولا من الاصل جيتوا- مسرحية وجهة نظر
أتولدنا أحرار وهنعيش أحرار ونموت جعانين- مسرحية أنت حر
البلد دى مش محتاجة مهندسين.. دى محتاجة صيع- عمارة يعقوبيان


بذمتكم كلام زى دة ممكن نقول علية أسفاف أو هايف
ولا لازم أعملكم فيلم أنجازات حسنى مبارك عشان تصقفوا وتقعدوا ساكتين

وعلى رأى عادل أمام - بلد شهادات صحيح


بلللوجرية أأأأأأأأننصراااف