Aug 7, 2008

أسبوع فى مصر- الحشيش والرشوة




أبنائى أعزائى فلذات أكبادى
يسعدى اليوم بأن أحدثكم عن موضوع غاااية فى السهولة والأهمية
أبنائى الأعزاء نحن نتحدث اليوم عن جزء لايتجزا من تراب وطننا العزيز
جزء هام ولاتستطيع أن تقضى يوما من حياتك بدونة
ابنائى الأعزاى حديثنا اليوم عن الحشيش والرشوة
:D



وصبح صبح ياعم الحاج واضرب الاستمورننج وروق القنانى عشان نعرف نعيش ونحقق الأمانى

اينعم انا قعدت اسبوع يتيم فى مصر بس شوفت فية العجب

معقول الحشيش بقى بالسهولة دى ومتوافر أكتر من العيش المدعم

لية أية اللى حصل؟؟


خليكم معايا كدة وانا هحكيلكم مواقف من اللى عشتها فى الأسبوع دة

أولا انا ليا واحد صاحبى شغال فى شركة خطوط المحمول وشغلتة عبارة عن عربية نص نقل متقفلة ومكيفة ومعمول جواها مكتب وكل اللى بيعملة صاحبى انة ياخد العربية بالسواق وينزل فى أى مكان فية تجمع أشخاص ويركن ويفتح السوبر ماركت بتاعة بتاع الخطوط ويبدأ يبيع


فنزلت معاة مرة أغير جو ونتسلى سوا.. فنزلنا لمكان ما.. وفتح العربية وقعدنا نبيع خطوط


وشوية وألاقى موتسكل مرور وقف ونزل العسكرى منة ومسك دفتر المخالفات وقاللة انت واقف هنا مخالف وممنوع وعامل أزدحام وربكة فى حركة المرور

أمممممممممممممممممممم قولت ياد اليوم المنيل اللى بدايتة مش حلوة

لقيت صاحبى أخد العسكرى على المخزن اللى فى اخر العربية وأدالة شنطة هدية من اللى بتتوزع مع الخطوط وقالة صباحك فل

:D

قام العسكرى قايلة هدية مقبولة ياعمنا بس هات واحدة تانية للعيال

ياسلاااااااااااام دى وصفة سهلة دى وصفة هايلة ولا مخالفة ولابطيخ


مسكت صاحبى وقولتلة اية النظام هو الموضوع بالسهولة دى دة من كتر المخالفات اللى العسكرى قالها قولت هياخدوك أعدام

ضحك صاحبى وقالى لا ياعم هو كل يوم يعدى واحد من المرور يقول البوقين دول عشان ياخد هدية

ياسلااااااااام.... شى الخيال يانااااس


كملنا بيع وحكايات بس بعدها بساعة لقيت أتنين داخلين وقالوا لصاحبى فين تراخيص البلدية اللى معاك عشان تقف وتبيع العربية دى تعتبر كشك بيع ولازملها تراخيص وإلا هتتخالف وتدفع غرامة

:)

طبعا بصيت لصاحبى وبصيت على المخزن وقعدت أضحك
وفعلا لقيت صاحبى أخدهم ودخل المخزن جابلهم شنطتين من بتوع الدعاية
بس فى واحد منهم أعترض جدا وقال لصاحبى انا مش عايز شنط

أنا عايز زمزميات من اللى كنتم بتوزعوها
ههههههههههههههههههههههههههههههههههههههه

بلادى بلادى بلادى لكى حبى وفؤادى

المهم خلص اليوم على كدة وبعدها بيوم كنت راكب مع صاحبى دة العربية ولقيتة دخل فى شارع وماشى عكس الاتجاة بسرعة وضارب النور العالى عشان اللى جاى فى الأتجاة الصح يبعد عنة

وفجأأأأأأأأأأأأأأأة أن أأأأأأأأأأأأأأأأأأأأأأأأأأأأن

لقى موتسكل شرطة طلعلة من شارع جانبى وبيجرى وراة لحد لما حصلنا ووقفنا
طبعا مش هحكيلكم عن الكرسى اللى أتبل تحتيا.... من العرق طبعا مش من حاجة تانية
بصيت لصاحبى وقولتلة هتعمل أية؟؟؟ قاللى مش عارف تعالى ننزل ونشوف
نزلت أنا وصاحبى وركبى بتخبط على الجيران... ووقفت جنب العربية أشوف صاحبى هيعمل اية
لقيتة راح للعسكرى وبدأت المسرحية الهزلية

صاحبى بيسلم على العسكرى وواقف معاة بيحكوا وبيضحكوا سوا
أحييييييييييييييييية طب لييييييييييييييييية

رجعلى صاحبى وركب العربية وقاللى دة عم فلان حبيبى دة كل يومين يعدى عليا ياخد منى هدية من بتاعة الخطوط
يااااااااصلاااااااااااااة النبى

فى يوم تانى من أيامى السبعة اللى قضيتهم فى مصر
ركبت مع واحد صاحبى عشان نروح مشوار وبعدين لقيت صاحبى ركن على جنب فى الشارع وقاللى ثوانى هنقابل واحد ونمشى علطول
مفكرتش أسألة مين الشخص اللى هو مستنية... بس فضلنا مستنيين بتاع ربع ساعة ومحدش جة

سألت صاحبى هو فية اية أنت مستنى مين؟؟
قاللى دة ديلر هيجيبلى مصلحة ونمشى علطول


دورت فدماغى بالراحة لقيت أن
ديلر = Dealer = موزع مخدرات


ياسلااااااام بقى انا واقف فى الشارع مستنى موزع مخدرات.... أممم يافرحة الماما بيا
المهم لقيت صاحبى بيركب العربية وبيقوللى يالا بينا
قولتلة مش هتستنى الراجل دة قاللى طظ فية هو انا هستناة انا معايا فى التليفون ييجى خمستاشر واحد غيرة وكلهم يتمنوا يبيعوا

........هايل جدا.......

ركبنا العربية واتصل بواحد تانى وقاللة على اللى عايزة واتفقوا على المكان ومشينا
شوية ولقيت صاحبى واقف بيسلم على جماعة اصحابة منهم واحد قاللى انة ضابط وللأسف كان مسطول

سلم عليهم وقعدوا يتكلموا شوية وبعدين ركبنا العربية ورحنا المشوار بتاعنا اللى أحنا نازلين عشانة
ولما وصلنا بقول لصاحبى مش هتجيب الحاجة اللى أتصلت عشانها( أقصد الحشيش) ؟

قاللى ماخلاص المصلحة قضيت ولقيتة حط على رجلى صوباع طويل وبنى وقاللى اهى الحتة اللى كنت بجيبها

فقولتلة اية انت جبتها أمتى واحنا من أول الليل وأحنا سوا؟؟؟؟؟؟؟؟

قاللى لما وقفنا نسلم على اصحابنا كان الديلر اللى لابس التيشرت الأخضر

وعلى رأى يوسف وهبى
يالا سخرية القدر
موزع حشيش وظابط ومتعاطى فى وقفة واحدة

واللى عرفتة انهم بيتقابلوا يوميا بالليل يظبطوا دماغهم قبل مايروحوا يناموا
نامت عليهم حيطة كلهم


المهم قولت أخدم صاحبى وأديلة نصيحة فقولتلة يابنى حرام عليك صحتك وفلوسك فى الزفت اللى بتشربة دة
وافرض مرة أتمسكت بية هيبقى منظرك اية وسط أهلك وعيلتك وانت لابس كلابشان ومحطوط فى السجن
لقيتة بيضحك وقاللى مرة كنت قاعد انا وواحد فى العربية وبنلف سجاير فى حتة محدوفة عن البلد
ومرة واحدة لقيت جنبنا عربية بوكس وجواها اتنين عساكر وبيبصولنا وبيقولولنا بتعملوا اية
تتخيلوا يكون رد فعل واحد فى الموقف دة اية؟؟؟؟؟

أكيد ممكن تتخيلوا مليون حاجة.. إلا أنة ينزل ويديهم سجارة ملفوفة وياخدوها ويمشوا
الموضوع دة انا أتأكدت منة وكمان سالت اللى كان معاة واكدلى الكلام بالتفصيل

وأدحرج واجرى يارمان وتعالى على حجرى يارمان

أتصادف وجودى فى مصر انى الحق احضر فرح واحد صاحبنا ضابط فى الجيش
وفى ليلة الحنة رحنالة كلنا بالعربيات ورقصنالة وعملنا أحلى قلق

وبعدين أخدناة ورحنا عند بيت العروسة عشان نصيت لهم فى الشارع
قام العريس صاحبنا والى هو ظابط فى الجيش ومتخرج من حوالى سنتين تلاتة
قام مطلع الطبنجة بتاعتة وقال عايز يضرب نار تحية لة وللعروسة
وطااااخ طاااخ طاااخ... بس ولا طلقة اتضربت
؟؟؟؟؟؟؟؟؟؟؟؟؟؟؟

يجرب يمين شمال مفيش ولا رصاصة راضية تتضرب
؟؟؟؟؟؟؟؟؟؟؟؟؟؟؟؟؟

طبعا الموضوع غريب جدا... بس مش هتستغربوا لما تعرفوا أن الضابط اللى بقالة حوالى 3 سنين فى الجيش...... كان حاطط الرصاص فى المسدس بالمقلوب
:)


واحلى سلام وتحية لحماة حدود مصر واسمع السلام مع ضرررررب الناااااااار
ههههههههههههههههههههههه



ماعلينااااااااااااا
اخدنا العريس من بيت العروسة بخيبتة أم استك وطلعنا على حتة محدوفة برة البلد وابتدت العربيات تطحن الاسفلت وصوت عجل العربيات وريحة الكاوتش المحروق ملت المكان
بس بعد شوية اختفت ريحة الكاوتش المحروق وطلعت ريحة الحشيش المحروق
تحية للناس اللى جاية تبارك للعريس
لدرجة أن واحد صاحبى فضل ماشى وسط الناس بيقولهم وبصوت عالى
الله يخرب بيتكم نفسى اشوف واحد فيكم ماسك سجارة نضيفة
هههههههههههههههههههههههههه



وتقولى انزل مصر تانى

بصراحة بصراحة
لاتعلييييييييق


:(

تصبحوا على خير
وتصبحى على خير يامصر
بس أنا زعلان

10 comments:

Manamino said...

ياصباح الفل علي احلي مسطول
والله خليتني اتفائل يا اباصيري وانا باشوف شبابنا اللي زي الورد مروقين الاناني ومظبطين الدمغة
يالله ياعم خلي الناس تهيص وان شالله تخرب
ويجعله عامر

esraa said...

والله عندك حق تزعل
معقوله احنا وصلنا للدرجه دي

المهم انت حمدالله علي السلامه
ودي مصر بردو , يعني مالهاش ذنب في اللي اولادها بيعملوه

يا مراكبي said...

أنا جيت على ملا وشي عشان أنا بأستمتع بالموضوعين دول اللي بتتميز بيهم مصر جدا .. حاجة تفرح بصحيح .. بسم الله ما شاء الله

حشيش ورشوة .. حاجة ترفع الرأس بصحيح

مافيش هنا في المدونة دي حتة كده وألا كده نظبط بيها دماغنا؟ مارجعتش ومعاك حاجة كده وألا كده؟

أمال الدخان اللي طالع من المدونة ده جاي منين؟

bastokka طهقانة said...

حاجة تضحك و تبكي و تصدم و تزهل

البلد دي رايحة لفين؟؟؟
اوعى حد يقولي رايحة مارينا


اوروفوار

سلوى said...

أنا كنت بعمل بحث في جوجو
وكتبت كلمه تائه
فطلعت لي مدونتك :)

المهم

كل البساطه والسهوله دي في مصر

لا حولا ولا قوة إلا بالله

MAKSOFA said...

البوست ده من زمان قوي



انت فين اوعى يكونوا قبضوا عليك

Sharm said...

تصدق انا بجد زعلت
بس هي البلد فعلا ماشية كده

محمود رياش said...

مدونتك بجد جميلة جدا

وبساطة الاسلوب شدتنى

الى الامام دائما

عنوان مدونتى
http://mahmoudryash.blogspot.com/

ارجو التفضل بزيارتى
مدونة غمض عينيك..مقالات عن النجاح فى الحياة..وتطوير الشخصية

شكرا مقدما..

ibrahim zakaria said...

omg i'm realy don't know that i can image to see like this artical thxx so much for this special artical صور

سعودي اوتو said...

thank you

مدير موقع سعودي اوتو