خش على الفضايح برجلك الشمال جـ1ـ
مش عارف يا خوانا مين اللى أخترع موضوع الفضايح دى
بس كل اللى ممكن أقولة "حسبى الله ونعم الوكيل" ... فأبقوا معنا
طبعا بعد البوست الغم اللى فات لازم افرفشكم وافرفش نفسى معاكم يمكن أنسى
مــــــــــــــــــــــلاحظـــــــــــــــــــة
الكلام اللى هيتقال فى البوست دة فى التوب سكريت
يعنى سرى للغااااااااية.... مش عايزين العالم تخرج من البلوج وتصيحلنا
الواقعة الأولى : الاباصيرى و المانجا
مرة زمااااان وأنا صغير كان بابا جايب مانجا... أن أأأأأأأن
وأنتو بقى متعرفونيش فى المانجا...... أبيع أبويا
ممكن أقعد فى البيت أسبوع لغاية لما أخلص عليها كلها
الفطار مانجا ... الغدا مانجا .... وحتى العشا مانجا
وفى يوم مطلعتلوش شمس كانت خالتى وجوزها عندنا بالليل
فقاعدين يتكلموا فى الأوضة والحياة جميلة وزى الفل والدنيا بيس خالص
والعبد لله اللى هو أنا دخلت المطبخ وجبت طبق وأخدت سكينة وفتحت التلاجة وجبت المانجا
ودخلت الأوضة تانى وأنا منشكح الأسارير .... هتعشى مانجا بقى... مين قدى؟؟
وقعدت على الأرض والمسكينة (المانجا) قاعدة فى الطبق بتبصلى وأنا مبتسم
ورفعت السكينة... والمسكينة خايفة.... والسكينة بتقرب... وانا مبتسم
وووفجأأأأأأأأأأأأأة
ينطلق صوت جوز خالتى ويوقف المدبحة اللى كانت هتحصل وهو بيقول
جوز خالتى : رااااااامى أنت بتعمل اية؟؟؟؟
العبد لله : أية.... فى أية!!!! باكل مانجا
جوز خالتى: (نظرة دهشة كأنى قولت انا سرقت مناخير أبو الهول) + شهقة
العبد لله: (بعد ما الخوف سيطر عليا) أية المشكلة فى المانجا
جوز خالتى : (بنفس النظرة اللى تخوف) أنت متعرفش أن أكل المانجا بالليل... حرام
العبد لله: هه .... المانجا ...... حرام ......... (نظرة سريعة فى وجوة الناس اللى قاعدة عشان أعرف الكلام دة صح ولاغلط) وشكلهم كلهم بيقول أن الكلام دة صحيح وماما كانت فى المطبخ
جوز خالتى : أيوة أكل المانجا بالليل حرام.... أنت متعرفش ولا أية؟!!!؟
العبد لله: (نظرة قاسية لبابا من نوع أزاى مقولتليش الكلام دة قبل كدة) وبعدين وبعلو الصوت
ماماااااااااااااااا أكل المانجا بالليل طلع حراااااااام
وبعدها كلهم كانوا واقعين على الأرض من كتر الضحك
ويجعلة عاامر بقى******************
الواقعة التانية : الاباصيرى الله يرحمة
مرة وأنا صغير وفى أجازة الصيف كنت بلعب الصبح فى الشقة وماما كانت بتغسل
فأنتو عارفين نظام الغسالات ايديال القديمة.. حلة واحدة للغسيل وخرطوم على الجنب لتفريغ المياة
وطبعا عشان الغسيل يطلع نضيف لازم المكونات الاساسية من مسحوق - زهرة - صودا كاوية
وطبعا العبدلله اللى هو أنا بحب أجرب كل حاجة بنفسى، والتجربة خير دليل للتعلم... بس طلعت مش فى كل حاجة
قمت أستنيت لغاية لما ماما دخلت البلكونة ، وأتسحبت لغاية الغسالة بشويش
ورفعت الخرطوم وأشتغلت أشرب البلاوى اللى فى الغسالة ولا كأنى بشرب عصير قصب
وسمعت صوت ماما من ورايا .... يالهوووووووووووووى
أنت بتشرب اية دى مية وسخة ومعفنة
وطبعا كلكم عارفين الصودا الكاوية زى مية النار بالضبط..... مطرح ماتسرى تهرى
بس الحمد لله ربنا ستر ومحصلش حاجة وحشة
وقضيت باقى اليوم فى السرير...... ومنجلكوش فى حاجة وحشة
******************
الواقعة التالتة : الأباصيرى وحش الجبل
أحب أوضح الاول ان أنا كانت كليتى فى سوهاج ولمن لايعلم
فسوهاج تبعد حوالى 8 ساعات بالقطار من القاهرة.. يعنى فى قلب الصعيد
ومش هقولكم على الصعيد بقى من ناحية الجيال... حاجة تهبل
وكنت متعود انا واصحابى نطلع الجبل كل أسبوع مرة
نروح الجبل الصبح وندخل جوة الصحراء والجبال ونتمشى ونتصور
وكنا بنعدى على مجموعة مقابر فى الصحرا من نوع أحفر وأدفن
والمقابر بتبقى مفتوحة يإما من الكلاب والديابة اللى فى الجبل اللى بتطلع وتاكل الجثث
يإما من اللى بيسرقوا الجثث ويبيعوها للطلبة بتوع طب
ونرجع بالليل قبل ما الدنيا تضلم عشان طبعا مفيش عواميد نور فى الجبل
ومفيش أسهم او أتجاهات او يفط أو حتى بنى أدم تسالة أحنا فين؟؟
لاننا كنا بنتمشى ونرجع بالتقريب..ويامااااا توهنا فى الجبل وتعبنا على مارجعنا
وطبعا مفيش شبكة موبايل فى الجبل.. يعنى لو تهت فعلا فأنت مفقود مفقود مفقود ياوالدى
وفى يوم أسود من قرن الخروب رحنا الجبل انا واصحابى وكنا حوالى 10 شباب زى الورد
ومشينا فى الجبل وتهنا والحمد لله وقعدنا فترة كبيرة ندور على طريق الرجوع ومش لاقيينة
والدنيا ضلمت علينا والجبل مفيهوش صويت أبن أسبوع ومفيش أى بادرة أمل أننا نوصل للطريق
وقعدنا على الحال دة بتاع ساعة وشوية لغاية لما الدنيا بقت ضلمة فعلا...... ثم فجاااااااة
هيييييييه المقابر اللى على أول الطريق هناك - دة واحد من أصحابنا وهو فرحان أنة أكتشف الطريق الصح
طبعا فرحنا جدا، ومشينا للمقابر وفاضل بتاع ربع ساعة مشى جوة المقابر ونوصل للطريق عشان ناخد عربية
طبعا مش محتاج أقولكم شعورنا وأحنا ماشيين جوة المقابر
فى الصحرا بالليل والدنيا ضلمة والأرض مليانة بقايا عضم و اكفان لناس ميتة على الارض
بس متخافوش أحنا شباب جدع مكناش خايفين خالص......كنا مرعوبين بس
وبعدين واحد صاحبنا فجأة وقف وسألنا وهو مبحلق فى الطريق
هو أية اللى بيلمع هناك دة؟؟؟؟؟؟
لقينا بتاع 10 أو 12 لمبة جنب بعض وبتلمع
وفجااااااااة تااانى
كل لمبتين لقيناهم ماشيين سوا
بسسسس لغاية هنا أنا عرفت أية دول
أأأأأأأأأأأأأأأأأأأأأأأأأأأة كلااااااااااااااب
محدش يتحرك خليكوا جنب بعض
وأصحابى طبعا بيحترمونى وبيسمعوا كلامى لدرجة أنى ملقيتش حد جنبى
كلهم طلعوا يجروا كأن عزرائيل بيجرى وراهم
تخيلوا المنظر تانى
عشر شباب فى الصحراء والدنيا ضلمة وبيجروا وهما مرعوبين فى المقابر
لأ وكمان فى كلاب بتجرى وراهم عشان تاكلهم
وطبعا الارض رمل وطوب ومش عارفين نجرى كويس والكلاب تقولوش فى الماراثون
طالعين ورانا طياااارة قبل مانهرب منهم..... وفاضل عشان نوصل للطريق بتاع عشر دقايق
يعنى بعملية حسابية بسيطة هتكتشفوا ان الكلاب هتحصلنا فى خلال دقيقتين
وفى خلال خمس دقايق هناخد لقب المرحوم
دة طبعا بعد عذاب العض وتقطيع اللحم والواحد عايش
يعنى هتاكل وأنا صاحى وهشوف الكلاب وهيا بتقطع لحمى بسنانها وتاكلها... رعب رعب رعب
وفجاااااااة ومتسالونيش إزاى
لقينا قدامنا ميكروباص وبابة مفتوح والكمسرى بتاعة واقف على الباب مستنينا
وبقوة الدفع كنا بنط جوة الميكروباص زى المجانين لدرجة أن بعد مادخلنا لقينا الكمسرى قاعد فى أأأأخر كنبة
هتسالونى وأية اللى جاب الميكروباص جوة الصحرا؟؟؟ هقولكم معرفش
لما سالنا الراجل :اية اللى دخلك الصحرا بالليل وأنت معاك ركاب أصلا
قال: مش عارف انا قولت اشوف فى حد فوق ولا لأ
كل اللى اقدر أقولهلكم أن احنا العشرة قطعنا الخلف بعد اللى حصلنا دة
ولغاية النهاردة كل مانفتكر الموقف دة
ونفتكر أحساسنا واحنا عارفين أننا هنتاكل خلال دقايق
نحس بالرعب... ونسال بعض
هو الميكروباص دة طلع منين؟؟؟
وتعيشوا وتفتكروا
******************
كفاية عليكم كدة النهاردة وفاضلكم فى ذمتى عدد 2 فضيحة بالسلطات
العدد القادم يحتوى على الفضائح التالية
الواقعة الرابعة: الاباصيرى أمير الأنتقام
الواقعة الخامسة : الأباصيرى فى المحطة
الواقعة الخامسة : الأباصيرى فى المحطة
بذمتكم اية رأيكم فيا؟؟؟؟؟ بنى أدم تحفة وفقرى من يومة ..مش كدة
92 comments:
ماشى يا اباصيرى
وبتتريق عليا علشان خفت اطلع مع جى جى المقطم بالليل اديك عملت فيها سبع رجالة ولا حد من اصحابك احترمك وسمع كلامك وكلهم طلعوا جرى
احلى حاجة ان الميكروباص ده كان مفروض يطلع عفريت من المقابر وبيهرج معاكوا
الكلاب ديه احسن عقاب من ربنا على تريقت عليا على موضوع جى جى
بس سؤال ايه اللى كان موديكوا الجبل اصلا بتحضروا ارواح هناك
مستنيين البوست التانى وبقية الفضايح
يعني اكلت مانجة و حبست بمية الغسالة
ههههههههههههه
حلو قوي
تعيش و تشرب
")
إنت إخترت أحسن ناس تحافظ لك على السرية يا معلم .. إطمئن خالص
دي مش فضايح .. دي مزيكا
أولا المفروض تحب المشمش قبل ما تحب المانجا .. ده اللي أحمد زكي علمهولنا زمان .. واليومين دول بيقولوا الموضة هي العنب والبلح
ثانيا إيه موضوع عصير القصب اللي كان في الغسالة ده؟ هو إنت كان عندك كام سنة ساعتها؟
ثالثا بقى وده الأهم .. الحكاية دي مسخرة على الآخر .. انا عمال أتخيل منظركم لأني ليا حكاية مماثله مع كلب بري في سوهاج برضه .. والحمد لله لسة عايش .. هأبقى أحكيلك عنها بعدين
بس إنت متأكد من موضوع قطع الخلف ده؟
رابعا .. أنا نسيت ودخلت البلوج برجلي اليمين .. معلش بقى
يابني ده انت ما حصلتش مافيش منك اثنين المصايب وراك وراك
يخرب عقلك يا واد يا رامى ... هتموتنى من الضحك
اكل المنجة باليل حرام ههههههههههههههه
والله يا اخ مناجاااوى
انت طلعت مسخرة ... وعلى فكرة الميكروباز ده كان عربية لتكريم الانسان والسواق ده كان عفريت وبيشتغلكوا
تعيش وتاخد غيرها
والف سلامة عليك من قلةالخلف يا اخويا :)))
عقبال بقية الفضايح
هو كل حاجه حلوة
بس الصور فوتوجونيك اكتر من اللازم
بعدين بصراحة محبش اللي يمسح مناخيره في المونيتور بتاعي
:))))
صباحك مانجا
انا كنت بحب المانجا
انا كنت بحب مانجا بس من ساعة ما قريت وانا مش هاكلها تانى ولا بالليل ولابالصبح مش عشان المانجا عشان كل ما هاشوف المانجا هافتكر الموضوع بتاع الصحرا
يخرب بيت الموقف بصراحة اسلوب عرضك ليه مشوق
بس ماحدش يقول كده انه قطع الخلف هاتوقف سوقك كده
انت حر
ههههههههه
بجد مش ممكن, كلاب ومانجه ورابسو, وما خفي كان أعظم.
المهم انك تكون بقيت كويس دلوقتي,.
انت موتني من الضحك وخصوصا على واقعة الجبل
خلتني زي الهبلة قاعدة في الشغل بضحك .. لأ بكركر قدام اللكمبيوتر
ولاّ المانجة اللي طلعت حرام... تخيلتك بجد و انت بتجري على ماما و تخيلتهم وهم ميتين من الضحك عليك
يا راجل.. بقــى المانجا حرام برضه؟؟؟
مدونتك ظريفة أوى
فضايح بطعم المانجه
هههههههههههههههه
تحياتى
يافضيحك ياه لو كل الفاضيح تبقى كده
بس انته نسيت تقول بقى كان مسحوق ايه الى كان فى الغساله ان ده هيفرق اوى فى تقدرير حجم الفضيحه
هههههههههههههههههه
بوست جميل
يافضيحك ياه لو كل الفاضيح تبقى كده
بس انته نسيت تقول بقى كان مسحوق ايه الى كان فى الغساله ده هيفرق اوى فى تقدرير حجم الفضيحه
هههههههههههههههههه
بوست جميل
أنا فطست على نفسي من الضحك لما قريت ان المانجه بالليل حرام .. لأ والألذ انك صدقت .. هههه
عسل جدا البوست ومتتأخرش علينا في باقي الفضايح
كل ده لوحدك؟
looooooooooooooool
كله كوم و موضوع المانجه ده كوم لأن انا بتحصل معايا موضوع مدبحة المنجه و بعديها ارقد من الحساسيه 00 و ارجع تاني و متعلمش
أية الصورة المهببة الى حاططها دية واللهى حرام عليك مش تراعى نفس أخوتك البلوجريين الرقاق
مقولتلناش بأة طعمها أية مية الغسيل زى القصب بتغسل الكلى ولا أية
بجد حكايات مسخرة سرك فى بير:)
يخرب عقلك ياأباصيري
ايه الفضايح ديه
انا هموت من كتر الضحك يارجل
وايه حكاية المانجا معاك
وبعدين ازاى تسيبهم يضحكوا عليك هااااااا
ماتسمحش انهم يعملوا كده
بس والله فكرة المانجا حرااااام بالليل
وايه حكاية الفضيحة التانية ديه
تشرب يارجل ماية الغسيل
حرام عليك ياأباصيري
الله يكون فى عون الست الوالدة شكلها تعبت معاك كتير
انت شكلك كنت شقى اوى
والا بقي الفضيحة التالتة انا لحد دلقتى مش قادرة أمسك نفسي من الضحك
والله خلاص انا مش عارفة انتم ايه اللى وداكم عند المقابر والجبال
بس بيتهيألى كده ممكن يكون حد من أصحابكم عاملها فيكم مقلب ولا حاجة
ايه اللى جاب الميكروباص فى وسط الصحرا وبعد ماخلاص كنتم بينكم وبين التقطيع بين أنياب الكلاب لحظات
يالا ياعم بقي كمل باقي فضايحك
خلينا نعرفك على حقيقيتك
ايه يا عم الفضايح دى
و تقولى فقرى؟ ده طلع فقرك انت لأ
فأرك
ههههههههههههههههه
بس ما تخافش سرك فى بير
احم
احم
يا عااااااااااااالم
يا هووووووووووووووووه
الاباصيرى قطع الخلااااااااااااااااف
الاباصير انضحك علييييييه فى المااااااااانجة
احم
فيه ايه؟
بصراحه فضايح زي كده انا ماشوفتش ابدااااااااااا,كل واحد برضه كان له فضايح بس مش كده
بس بصراحه يا بتاع المانجه انت فضايحك زي العسل
وانا هامووووووت واعرف باقي الفضايح دي ايييييه وماتخافش احنا وصلنا ل70 مليون دلوفتى واستحاله انى افولهم كلهم
لو ده اللى مخاوفك دلوقتى
الميكروباص ده كان لامؤاخذه بيوصل طالبيه مخدرات ، ومن حظكم أنه لاقاكم وهو راجع فاضي
بدل ما كان اخدكم الأول وهو مليان وياسلام بقي لو كان فيه كبسه ياحلو
يا نهار اسود
ي نهار اسود
انا فطسااااااااااان من الضحك على موقف الجبل ده
يا لهوي
مش قادر اتخيل المنظر
هههههههههههههههه
ههههههه
مش قولتلكم فقرى
طيب بذمتكم شوفتوا حد قبل كدة بينزل مع أصحابة يتفسح فى المقابر
هو دة التجديد
على العموم معلش هتأخر عليكم شوية فى الردود
عشان مزنوق اليومين دول فى الشغل
كلها يومين وارجع أرد عليكم نفر نفر
وأكمل باقى الفضايح
موضوع الميكروباص ده شكلك بتضحك علينا فيه
هو في طريق في الصحرا؟؟
يا نصاب
بس فطستني من الضحك
ايه كل ده يا اباصيرى
دا انا على كده نيييييسمة فى البيت
دى صحيح نوادر و طرائف
شكلك بيقول انك احدى فلتات هذا الزمن
بس كله كوم و الصورة المعبرة دى كوم تانى
اسلوبك فى عرض الحكاوى مسخرة فعلا
فى انتظار الجزء التانى
سلام يا اباصيرى
وحشتننننننننننننننىىىىىىىىىىىىىىى
جامد جدا الموضوع...سبحان الله بج عالميكروباص ان امزهوله اصلاا قاعده وفاتحه بوقى تجره بجد صعبه اوى يالهوى
اما بالنسبة لمية الغساله فده ان دل على شىء فيدل على كل خير انشاء الله
دمااااااااغ
المانجا :انا بعشقهاااااااااااااااا وعندى ذكريات بمناسبة اى ابيع الى ورايا والى قدامى مقابل انى اكل منجا
طول عمرك ذواق وبتفهم
بس قولى ي باصيرى يا خويا ايه الصوره دى
انا قولت بلاش تدبسونى فى الفضايح محدش سمع كلامى
مصر هى أمى
معلش ياباشا انت عارف بقى ان الشباب طايش ومتهور
وبعدين جيجى متتعوضش يالورد
بجد بجد بجد كلنا حاسين ان موضوع الميكروباص دة مش طبيعى
أصل محدش يتخيل ان ميكروباص يطلع الجبل يدور على ركاب
ولغاية لما وصلنا ونزلنا وانا عينى متعلقة على الميكروباص وحاسس انة هيختفى فى أى لحظة من كتر الرعب والذهول
Sampateek
منورة فينك مش باينة من زمان
اهم حاجة الأهتمام بالصحة والغذا الكويس
وأنتى عارفة ان المانجا ومية الغسالة ماليانين معادن وبروطينات من اللى بتودى فى داهية
مراكبى
أنا أتفضحت واللى كان كان
هى سوهاج شكلها بتربى كلاب عشان تخوف الزوار بتوعها
بالنسبة لموضوع الغسالة كان عندى بتاع 6 سنين صوغنن يعنى
وبالنسبة لموضوع قطع الخلف... دة تعبير مجاززززى
بلاش نسيب المهم ونمسك فى القشور ..ولا أنت غاوى فضايح والسلام
anima
الفقرى فقرى من يومة
منور ياباشا
وبعدين انت مابتجيش غير على سيرة الفضايح
خلاص كدة هشوفك فى البوست اللى جاى كمان
سلام ونورنى دايما
halwasa-masrya
وانا أعمل اية مش هما اللى قالولى
والواحد برضة لازم يسمع كلام اللى أكبر منة
الموضوع دة فضحنى فى العيلة
شباب العيلة بيمشوا ورايا وبيقولولى
بكرة من دة بقرشين
والواحد بيعيش عشان يتعلم برضة
ويجعلة عامر
شوف يا رامي انتو طلعتو رجاله رجاله صحيح بس انا زعلانه منك ادام عرفت ان المنجا حرام ابعتهالنا يا اخي احنا
عندنا حلول للقواعد دي وهنتصرف و نخليها حلال
زعلانهههههههههههه زعلانه زعلانه اخص يا عليك يا رامي يا اناني
يعني احنا مش زي اخواتك
و مصريين زي بعض
احنا عايزين منجا دلوقتي
وتكون عويس عشان انسي الاساءة الي سببتها لمشاعري دي
تحياتشييييي
الصورة يع خالص
ازيك؟
على فكرة يا أباصيري المنجة فعلاً حقيقي حرام بالليل
اوعى تكون دخلت عليك تاني
بس ايه رأيك في عصير القصب ؟
بجد تحفة روووعة بس الصورة لا مؤاخذة .. بلاش
وموقف الجبل ده حقيقي بجد جميييييييييل اصل المواقف اللي زي دي هي اللي بتبين شخصية الواحد الحقيقية بس طلع فلم رعب انما ايه ؟ وانتو كل واحد فيكم واخد ديله في اسنانه وبيجري بكل قوته .. بس ياترى مين اللي وصل للميكروباص الأول ؟
ميكروباص ؟!!!!!! هو الميكروباص طلع منين؟
ربنا بعتهولكم عشان لسه عمر الشقي بقي
مستنية الفضايح التانية
صحيح
بما ان الموضوع توب سيكريت اوي و مينفعش نخرجه بره
ينفع انقله عندي في البلوج ؟؟؟
ههههههههههههه
اباصيري
انت لسة بتحب المنجه
موضوع الكلاب ده موتني من الضحك لاني لي قصص كتير مشابة لكده بس كانت مفتعلة يعني كلها مقالب تعالي شوف المقلب في مدونتي هيعجبك ممكن تعملة في حد
ههههههههههههههههههههههههههههههه
انت مسخرة
لا مش ممكن بجد
وسبحان الله انت ليك عمر
عشان كده لقيتوا المكروباص
لا بجد لما ابطل ضحك حكمل كتابة
بنوتة من وسط البلد
والله يا أخت بنوتة أنا شكلى فتحت على نفسى ابواب التريقة
الميكروباز دة كان نجدة سماوية بجد
عمرى ماكنت أتخيل أنى الأقى ميكرواز فى وسط الصحرا
بس سيبك احنا رجالة جامدين جدا
وكنا شجعان زى مانتو شايفين
قاسم أفندى
أأأة أنت بتاع حزب اللافكر
منور ياباشا
طيب أية رأيك فى الصورة دى كشعار للحزب
وبعدين لازم تفهم حاجة مهمة جداً
الدستور يكفل لاى مواطن مزكوم أنة يمسح مناخيرة فى أى حتة هو عايزها
ولا أنت معارض!!!!؟
عمييييييل أعتقلوووة
ودستور ياسيادنا
:) لووول
شخبطة ملوكى
لية ياعم
دى المانجا تمام وزى الفل
بس انا اللى كنت جايب على متخلف وانا صغير.. بس الحمد لله أتعالجت
وبالنسبة لموضوع الصحرا
الموقف دة يخلى الحجر ينطق من الرعب اللى شفناة
انا عارف أن مصر كانت معتمدة عليا فى انتاج عيال عبقرية زيي كدة
بس معلش البقية فى حياة الرجالة بقى
:(
ياعم موضوع قطع الخلف دة
دووعاابة عادية وبوريئة (بريئة) احنا لسة رجالة بس القافية تحكم
مستنيك علطول
esraa
لا متخافيش
الحمد لله أتعالجت من
المانجا والرابسو والكلاب
والعملية نجحت وأتحولت للرجل الأخضر
ومستنى لما أستوى عشان اكتب باقى الفضايح
أبقى تعالى زورينى فى المستشفى
وجيبيلى هدية معاكى
قفص مانجاااااا
الأمضاء
واحد طفس
Hanooda
وأنا تخيلتك وانتى قاعدة فى الشغل بتكركرى والموظفين بيبصوا لبعض ويضحكوا عليكى
هههههههههه
ملحوظة هاااامة
الجزء التانى من الفضايح جامد جدا
بلاش تقرية فى الشغل منعاً للمشاكل
زورونا تجدوا مايسركم
ابو أمل
الله يخليك يارافع معنوياتى
لو أعرف أن الفضايح هتخلى الناس الحلوة يزورونى
كنت كتبت فضايحى من زمااان
منورنى
محض روح
تقريبا كان أريال من بتاع
أريال اريال أوة أوة
يعنى عملى غسيل معدة كفاءة
منور أستنى الفضايح الجديدة
Sherehan84
أتريقى براحتك
مانا اللى جبت دة كلة لنفسى
بقولك أية.. بدل التريقة دى
اكتبيلنا بوست جديد عندك عشان بقالى كتير بعدى عليكى وشكلك كسلان
وسيبينى فى حالى وكفاية عليا العالم اللى شغالة تتريق فوق دول
منورانى فى الفضايح :)
الا صحيح الميكروباص ده طلع منين؟
ممكن أقولك انه العنايه الالهيه وبركة دعا الوالدين
المهم انت طلعت فقرى فقرى الصراحه
يالا هات ما عندك من باقى الاسرار
يااااااااااااالهوي يا اباصيرى ع الصورة اللى انت حاططها
بس كويس انى عرفت موضوع المانجه ده
اصلى بحبها اوى
يلا الواحد يلحق يروح يتوب ويستغفر
وللا الجبل ده
اشكل على فكرة ان سواق الميكروباص واللي فيه بنى ادمين
دول ملايكة يا عم الحاج
نزلولكوم م السما مخصوووووووص
ههههههه انت مسخرة
هههههههههههههههههههههههههههههه
وايه الصورة العجيبة دى حرام عليك إرحمنا
ههههههههههههههههههههههههههههههه
فين الجزء التاني ؟
انت حكاية
وكمان طلعت سوهاجي!!!!
ومن ذئاب الجبل كمان؟
لا يا عم
احنا جيل البلاي ستيشن
كراكيب نهى محمود
أة لوحدى
شفتى أنا غلباااان وأمييير وطيييب إزاى
دة انا ملاك بس هنقول اية للحظ الفقرى
Koukawy
مش قولنا الطفاسة وحشة
وبعدين الحساسية دى عقاب من عند ربنا
عشان أكل المانجا بالليل حرااااااام
Hebaz
عارفة لما تشربى كباية مية نار سخنة
على غيار الريق وبعدين تبلعى شوية أمواس حلاقة
وبعدين الخليط الجميل دة يشتغل فى الأمعاء والمعدة ويعملك كوكتيل ألم هايك
هو بالضبط كدة
أسنتنى الجزء التانى من الفضايح
جااااامد مووووت
عاشقة الوطن
الواحد برضة مبيتعلمش بالسهل
الناس بتوع المانجا دول شكلهم مضهدنى وقارشين ملحتى
والست الوالدة مطلعش عنيها جامد لانى كنت هادى زى مانتى شايفة بالظببببط
أما بالنسبة للفضيحة التالتة لايمكن تكون مقلب
وعايزة تعرفة المقالب بجد شوفى الجزء التانى من الفضايح
مقالب لايمكن تتخيلى أنها تحصل
Khaled
أحم!! أحم
لا مفيش حاجة أنا أتفضحت خلاص
عايز تتأكد شوف عدد الردود فى المواضيع اللى فاتت كلها
وقارنها بعدد الردود فى البوست دة بس
وربنا يستر على ولايانا
سلامو عليكو
الكلام نوعان
لأ ماخلاص قناة الجزيرة أذاعت أمبارح ان الأباصيرى إبن الحاج نعيم
أتفضح يامينز
والسبعين مليون بتوع مصر عرفوا خلاص الفضايح
دة غير بتاع عشرين مليون من الدول العربية الشقيقة
ولا عزاء للدول الأجنبية لان الفضايح بالعربى
Maksofa
أة فعلاً
هى كانت ناقصة مخدرات
ماهى كانت ليلة سودة مش باينلها نهار اصلاً
وأغنى زى محمد هنيدى فى فيلم وش أجرام
أرجوك أدينى الحقنة
محتاجة الجرعة بسرعة
أية المعزة دى؟؟!!؟؟
أرحمونا يابشر
أنتى معندكيش أخوات ولاد
:)
Sharm
يعنى انت مش قادر تتخيل المنظر
أمال أنا أعمل أية وأنا كنت فى قلب الأحداث
أنا لولا الملامة كانوا أستصلحوا الصحراء من غير حفر ابار للمياة
والمعنى فى بنطلون الشاعر
ومحدش يفهمنى غلط
Nohaz
لأ فى طريق بس ترابى عشان المنطقة دى أثرية وفى ناس بتيجى برحلات خاصة
بس أحنا كنا بنلاقى المتعة فى المشى فى الجبل
بس أول مرة أشوف ميكروباص يدخل يجيب ركاب من الصحرا
Nadine
أنتى نسسسسسسمة !! بأمارة أية
دا انتى بتكلمى نفسك فى البيت
أنا بفكر أعمل مجلدات للمواقف اللى فى حياتى
وعلى رأى الحاجة أم الأباصيرى لما بتقوللى
دا انت نوادرك تتعمل فى مجلدات
Camera Girl
ياااة
مين اللى يوحش مين
أنتى اللى غايبة بقالك كتيير أوى
موضوع الميكروباص دة تجربة لاتعوض
وذكرى متتنسيش أأبدا
وبعدين أنا لقيت أن مية الغسالة أوفر وبتعمل دماغ صودا كاوية زى الفل
وخلى ذكرياتك معاكى عشان التاج دة كلة هبعتهولك زى ما أتفقنا
وبلاش اقولك أية الصورة دى بالضبط عشان العالم اللى بتقرف ميضربوناش بالكلينكس
Memo
طبعا رجالة
الرجولة يعنى أحنا
الجدعنة يعنى أحنا
الشهامة يعنى أحنا
ذئاب الجبل هو أحنا
أحنا بالصلاة على النبى امل مصر فى المستقبل
وبعدين أقولك لية أن المانجا حرام؟؟
المفروض جوز خالتك هو اللى كان يقولك
وعلية يسقط حقك فى المطالبة بالمانجا العويسى
هاة أنفع محامى!!! على العموم عشان خاطرك بس .. هشترى علبة عصير مانجا وأديلك شفطة
أية رأيك!!!! كريم وسخى ومبذر.. مش كدة
تحياتك معاكى يا أختشى
Sampateek
الصورة حلوة خالص
بعد الفضايح دى كلها
أكيد مش كويس
والحمد لله
Shams
والنبى ياستو هانم الواحد مبيتعلمش بالساهل
وبالنسبة لعصير القصب فالمعروف انة بينظف الكلى من السموم
أما الكوكتيل اللى انا شربتة فالمعروف عنة أنة بينضف الجسم من الكلى والطحال والأثنى عشر وكلة كلة
كوكتيلى يغسل أكثر بياضاً
أما بالنسبة للميكروباص
فلاتعليق
لانى أكتشف حقيقة أصحابى وجدعنتهم معايا
طيب كانوا يقولولى أحنا هنجرى
مش يسيبونى ويهربوا
سيبك برضة أحنا رجالة ومبنخافش
Sharm
أة صحيح
تخيل فكرة حلوة
وزيادة فى السرية
ممكن نعمل إعلان فى الجورنال وفى قناة الجزيرة ونقول أن الموضوع دة سر
وياريت محدش يقراة
أنت عبقرى يابنى وخسارة فى البلد دى
أقولك روح أنتحر خميس وجمعة وتعالى يوم السبت فريش
قشطة الكلام
هههههههههههههه
ضحكتني و أنا مكتئب
تحياتي
جدا
يا سيد أباصيري أحب ألفت نظرك إني أنا بنوتة حتى دي فضحتنا فيها يا سلام
ههههههههههههه جامد جامد علي فكره بقي انا مشكلتي في المانجه بره البيت لاني انا من بتوع كل و اكل البيت معاك غلوسه فايجوا يعزموا عليا بره عند اي حد ببقي مااسك علي نفسي و بصلها واعيط من جوايا .. و علي فكره اخوك شرب برضه صودا كاويا بس مش زي حالتك هههههههه انا كنت في مكتب كمبيوتر بتاع ناس صحابي و كدا و قلنا نعمل عملية تنضيييييف للمكان كله و احنا شغالين تعبت و عايز اشرب مايه فكان جنبي ازازه انا بحسهبها مايه و هي في الاساس كانت صودا كاويه و اشرب صودا كاويه بس اظن انها كانت بطاس استني هي حاجه شكلها زي المايه بس مفعولها زي ماية النار و اشرب يا عمونا واحس بمية النار في بوئي بس الحمد لله موصلش لزوري لانها كانت بتاع صافي و رحت جبت لبن علشان يكسر مرار النااااار دي و بعد العملية الانتحاريه الي انا قمت بيها دي الائي شفتي عامله زي راجل عنده 4444 سنه و مكرمشه و لساني حاسس انه نصه اتقطع و مهري ههههههه كانت ليله بس الطوهاااان بقي انتي لييييييك السبق يا باشا انا عمري ما اتوه ( الا في حالات معينه ) لكن مش زيييييييك ههههههههه
كراكيب عادل
مانت كمان طلعت فضحى وبتاع مقالب زى الفل
على العموم أقرا رأيي فى مقلب الجثة عندك وقولى أية رأيك
مستنيك فى الجزء الثانى والثالث من فضايحى
أميرة البلطجة
شوفتينى وانا بتاكل
أجنن وأنا بتاكل
وبعدين كان شكل الكلاب جعانة
يعنى بعد مايأكلوا لحمنا هيقرقشوا العضم مع عصير الدم المميز بنكهة الخوف الرهيبة
خلصى ضحك وانا مستنيكى
Shiko
يعنى ياعم لوكان فية دعا الوالدين
كان كل دة حصل
الجزء الثانى من الفضايح نزل
ألحقلك نسخة وأستنى الجزء الثالث قريبا
منور ياباشا
نضال
من فتاوى أصحابى اللذاذ اللى سمعوا الموقف دة ومكانوش معانا
دول عفاريت وكانوا مستنيين ياخدوا روحكم بعد ماتتاكلوا بس صعبتوا عليهم
دول ملايكة نزلتك مخصوص عشان خايفة على الكلاب من التسمم
ألحقى توبى من ذنب المانجا
اللهم بلغت .. اللهم فأشهد
نبيذ
هههه
مانا عارف
:)
ماتجيبى كاس
شوفى الجزء الجديد
أنسانة
طيب شوفى الصورة الجديدة
وأستنى الصورة اللى فى الجزء التالت من الفضايح
مقولتيش اية رأيك؟؟؟؟ أنفع فقرى
Sharm
أطلع برة وشوف البوست الجديد
معلش بنقفل ميزانية الشركة ومشغولين شوية
بس متخافش الفضايح موجودة
:)
طهقان
ياااة فينك ياراجل
والنبى أنا كنت بدرس فى سوهاج بس
أنا من طنطا بلد الاونطة
يعنى من جيل الأتارى والفيديو جيم
فين طهقانة مش باينة
أوعى تكون قتلتها
:)
وش مكرمش
ياعم افرد وشك وعرض للدنيا قفاك
محدش واخد منها حاجة
وكل ماعليها فان
وهنيالك يافاعل الخير والصواب
ومين قدم شىء بيداة ألتقاة
واحدووووووووووووة
منور وعايز أشوفك علطول
anima
هههههه
معلش العتب على النظر
وبعدين هى جت على دى يعنى
بجملة الفضايح بقى
صباح الخيير
Copa
المانجا دى دمااااغ
مانا كنت قاعد على الارض عشان
الخساير بتاعة بقع المانجا بتكون على السرير والستاير والسجاد ووو
ياى شربت مية نار
أووة يععع
كل حاجة على بقك كدة
ههههههههه
يعنى كدة محدش أحسن من حد
أنا الحمد لله
مية النار كانت مخففة بمية وسخة وكلور ومسحوق
بس أنا لو منك بعد مايحصلى كدة
أولعلهم فى الكمبيوترات وفى الشركة
وأحرق نفسى عليهم
منور يازميل البوطاس
:)
يا عيني يا عيني
كل شيجن إنكشفن وبان
:)
أكتب بالرصاص
مش كل شىء أنكشفن وبان
لسة ياما فى الجراب ياحاوى
زورونا تجدوا مايسركم
:)
منور من بدرى
: )
هههههههههههه لا صراحة مالكش حل
غساله ايه اللي كنت بتشرب منها عشان تجرب..طب كنت جرب ف حد تاني ولا عاوز يبقالك السبق الصحفي؟
بس بجد بجد
ماكنتش تعرف قبل كده ان اكل المانجا بالليل حرام؟؟:p
السلام عليكم
ايه المواقف والطرائف اللي انت عايش فيها دي ، هو انت كده من زمان
الله يكون في عونك يابني
ههههههههههههههه
R2k
:) + هع هع هع
سلسبيل
لا أنا بعد كدة بقيت بجرب فى الناس الأول
محدش بيتعلم بالساهل
ولا النعمة محد قاللى ان المانجة حرام غير جوز خالتى
وعيب أكدب الراجل برضة
خمسة فضفضة
يوووووة
من زمااااااااان
اصل الفقر والنحس دة بالوراثة
أباً عن جد يعنى
ربنا مايوريكوا بقى
شركة تنظيف فلل بالقطيف
شركة تنظيف شقق بالقطيف
شركة تنظيف مجالس بالقطيف
شركة تنظيف موكيت بالقطيف
شركة تنظيف سجاد بالقطيف
شركة عزل اسطح بالقطيف
شركة مكافحة حشرات بالقطيف
شركة تسليك مجاري بالقطيف
Stilletto Titanium Hammer - Stone Art - Stone Art
This glass-shaped piece titanium bikes of titanium uses stone titanium bikes for sale depicts the famous Stilletto gold plated titanium trim hair cutter barberber of 1812 in the city of St. titanium density Paul. The bronze-coated
og838 brooks uk,brooks canada,brooks dublin,brooks australia,brooks nz,brooks sko,brooks norge,brooks sverige jm759
ly227 altra shoes ireland,keen schuhe,tenisonrunningmexico,caterpillar belgium,Zapatillas keen,xn--altraayakkab-d5b,keen sandaler,gymshark uk,gymshark romania rr260
Post a Comment