May 19, 2008

اسبوع فى مصر




ملحوظة: البوست مش هيعجبكم بس لازم افضفض بالل حصل

ملحوظة كمان مرة : محدش يدخل عندة سكر ولاضغط ولامرارة والحوامل يمتنعون

ملحوظة اخيرة: ممنوع دخول المأكولات والمشروبات


بصراحة مش عارف اسمى البوست دة أسبوع فى مصر ولا أسبوع فى جوانتنامو

على العموم مش هتفرق كتير لان الفرق الوحيد هو ان اللبس مختلف وبس

مش عارف اية اللى حصل للبلد دى.. زمان كنت فرحان انى مصرى

كنت بشوف فى الكتب والأفلام ان المصريين ولاد الفراعنة اللى بنوا السد العالى والأهرامات وانها ام الدنيا وان اهلها طيبين ووووو

بس واضح ان أهلها أتغيروا وأن الكلام دة كلة كلام كتب وأفلام وان المصريين مبقوش مصريين والبلد مبقتش هى البلد


نبتدى من الأول وخليكوا معايا

المشكلة أبتدت لما قررت انزل مصر اسبوع أخلص شوية حاجات

وكان أسود أسبوع شفتة فى مصر


المفروض ان موقفى من التجنيد انى معافى لمدة خمس سنوات لانى ولد وحيد

ومع ذلك المفروض اروح كل مرة لادارة التجنيد اخد منهم أذن سفر خارج البلاد

والموضوع بسييييييط قوى والأجراءات كانت كالتالى

1- اروح السجل المدنى ومعايا البطاقة بتاعة والدى وبطلب قيد عائلى وبستلمة خلال ساعتين

2- اخد القيد العائلى دة وأخد الباسبور واروح لأدارة التجنيد واسلمهم الورق بسلمونى التصريح أخر اليوم



المهم قررت اروح أعمل الموضوع دة عشان أبقى خلصت ورقى واتفسح براحتى

روحت للسجل المدنى وطلبت قيد عائلى وفوجئت بالاوراق المطلوبة

1- اصول شهادات الميلاد الكمبيوتر لجميع أفراد الأسرة وصور منها

2- عقد الزواج الاصلى للوالدين وصورة منة

قولت مفيش مشاكل نجيبلهم الورق المطلوب

روحت جبت عقد الزواج بتاع والدى ووالدتى وروحت لمصلحة الأحوال المدنية عملت مستخرجات اصلية بالكمبيوتر لشهادات ميلاد كل افراد الأسرة علما بأن الشهادة الواحدة بتتكلف سبعة جنية

المهم حضرت الورق اللى طلبوة ورجعت السجل المدنى تانى أسلمهم الورق وكانت المصيبة

سيب الورق عندنا وتعالى أستلم القيد العائلى بعد عشر أيام

عشر ايام أزاى وانا أجازتى كلها اسبوع ومش فاضل فيها غير اقل من خمس ايام

ياجماعة مينفعش... يا أخوانا ميصحش ... يامؤمنين أتقوا الله

المهم قالولى حلك الوحيد تروح المصلحة الرئيسية فى العباسية ويطلعوهالك فى نفس اليوم




هووووووف أمرى لله أسافر مصر

أخدت ورقى وسافرت مصر وهناك لقيت اعداد ماهوووولة عايزة تطلع قيد عائلى ومش عارفة

قولت اسال حد من الموظفين

قالولى خدلك رقم من العسكرى تحت واقف فى الطابور

نزلت تحت قالولى الأرقام فوق

طلعتلهم فوق قالولى ياعم انزل الأرقام تحت

نزلت تحت قالولى عيب عليك الارقام فوق

طلعت فوق قالولى الأرقام أخدها الضابط ونزل تحت

نزلت تحت الضابط قاللى لأ الأرقام فوق

طلعت فوق قالولى بيسلموها دلوقتى تحت

نزلت تحت قالو مفيش ارقام تحت الأرقام فوق

طلعت فوق قالولى احنا هنهزر !! الأرقام تحت يامواطن

نزلت تحت قالولى لاياعم الأرقام تحت

اراهن انكم من كتر تحت وفوق دى محدش خد بالة من الجملة اللى فاتت



المهم قعدت على الحال دة بتاع ساعة لما رجلى باظت من السلالم واللف

المهم فى الاخر لقيت عسكرى معاة الأرقام رحتلة و اخد رقم قاللى لأ لما كل الناس اللى تحت تخلص الاول

بصيت تحت لقيت بتاع 200 واحد بيدوروا على أرقام

ولقيت برضة العسكرى اللى معاة الأرقام بياخد فلوس عشان يوزع الأرقام دى على اللى يدفع

قولت ماشى اديتة عشرة جنية وادانى رقم، لقيت الطابور اللى معاة ارقام بتاع 150 واحد دة غير اللى واقفين تحت بيدوروا على أرقام

وقفت فى الطابور بتاع ساعتين وسمعت واحد بيقول للتانى احنا نسلم الورق ونستلمة بعد عشر أيام

نــعـــــــــــــــــــــــــــم عشر ايام لية مش احنا فى العباسية يا أخوانا (دى طلعت الخانكة من العباسية)

روحت للموظفة اللى على الشباك وشرحتلها الوضع بعد معاناة انى اوصلها أساسا

قالتلى يا أستاذ بعد عشر ايام ومش عايزة كلام كتير

اتنرفزت وطلبت اقابل المسئول عشان أشرحلة ظروفى واعرفة ان مفيش عندى غير كام يوم ومسافر ولو أتأخرت هتحصلى مشكلة فى الشغل

قالولى المدير يبقى مش عارف العقيد مين روحتلة وشرحتلة الظروف

لقيتة بيكلمنى بزعيق وبقرف كأنى خدام عندة وقاللى مفيش أستثناءات ومليش دعوة بظروفك

طبعا كدة لقيت مفيش حل فى العباسية اللى انا فيها دى قمت راجع على طنطا تانى


جربت وسايط كتير من معارفنا من وكيل نيابة لضباط جيش ومفيش فايدة


فى الأخر عرفت اوصل لضابط كبير فى الأحوال المدنية فى طنطا وكان شخص فى منتهى الأحترام


أخد ورقى وقاللى انا هخلصلك الموضوع دة فى يوم او يومين بالكتير وبدا فى أجراءاتة


وبعدين لقيتة بيقولى عندك شوية مشاكل فى الورق؟؟؟؟؟؟؟؟؟؟؟؟؟؟


استفسرت منة وعرفت ان اسم والدتى فى الكمبيوتر يختلف عن أسم والدتى فى شهادة الميلاد وتاريخ الميلاد لوالدى ووالدتى متسجل غلط فى عقد الزواج

طبعا وشى جاب ألوان وقولتلة طيب والعمل؟؟

قاللى موضوع الاسم الغلط بتاع والدتك انا هبعتك لضابط اعرفة يخلصلك الموضوع دة وانت واقف

قولتلة تمااااام .... طيب وتاريخ الميلاد الغلط اللى فى عقد الزواج بتاعهم

قاللى دى تروح المحكمة وترفع دعوى تصحيح وبيغيرولك التاريخ بناء على شهادات ميلادهم

قولت: قشششششطة أتحلت

قاللى: بس الموضوع دة هياخد فى المحكمة شهووووور

ولغاية لما يتحل مينفعش تخلص ورق الجيش ولاتسافر

عارفين احساس عبدالحليم حافظ فى فيلم معبودة الجماهير؟

اهو انا كنت حاسس زى نادية لطفى فى فيلم الخطايا

وسامع الأغنية الشعبية بتقولى بشماتة

طريقك مسدود مسدود مسدود ياووووووووووولدى

طيب قولولى اروح فين وأجى منين؟؟؟

فاضل يومين وأسافر ومش لاقى حل

معنى كدة انى مش هقدر اسافر وطبعا هترفد من الشغل لانى مش هروح

وطبعا الفيزا بتاعتى هتتلغى ومعنى كدة أنى اتحبست فى مصر ومش هعرف اسافر أو ارجع شغلى

هى دى مصر ياعبلة بخيرها وناسها الطيبة

طبعا قعدت اليوم كلة اضرب أخماس ف أسداس ومش عارف اتصرف ازاى

لقيت واحد بيتصل بيا بالليل وبيقوللى هيعدى عليا عشان لاقالى حل أخيرا

نزلت انا والشخص دة ورحنا عند واحد يعرفة قاللى هخلصهالك فى التجنيد

وطلب منى شوية اوراق وقاللى عدى عليا الصبح بدرى عشان نبتدى الأجراءات

طبعا كنت شبة متأكد ان هيطلعلى خازوق جديد فى الموضوع

المهم عديت علية الصبح فى التجنيد واشتغلت من الطابور دة للطابور دة

واجيب ورق واختم ورق واكتب تعهدات واصور ورق

لغاااااااااااااية لما قالولى خلاص كدة بكرة تستلم تصريح السفر وتساااااافر

هيييييييييييييييييييييييه

كنت هتجنن مبقتش عارف افرح ولا اشتم ولا العن البلد باللى فيها

هما اللى يغيروا اجراءات اصدار القيد العائلى مش يراعوا ظروف الناس المستعجلة

كل حاجة فى البلد فيها نوعين : عادى ومستعجل

إلا القيد العائلى لازم عشر ايام دة لو ربنا كرمك وملقتش اخطاء فى شغلهم

وبعدين عايز اسأل سؤال مهم قوى ونفسى تجاوبونى علية

هى مصر بلد عسكرية ولا دولة تخضع لحكم الشعب متمثل فى الرئيس اللى المفروض بينتخبوة

ماهو مينفعش كل ما ادخل مصلحة حكومية ألاقى كل المديرين والمسئولين فيها ضباط


دة شغل الشعب مش الشرطة ولا هما بيقاسمونا فى شغلنا

ضباط الشرطة مكانهم اقسام الشرطة ومهمتهم حفظ الأمن مش الأعمال الأدارية اللى زى دى

سيبوا الناس تشتغل ولا لازم تتحكموا فى كل حاجة

فاضل اقولكم انى لما وصلت الكويت كنت عايز أقف فى المطار واصرخ بأعلى صوتى

محدش ينزل مصر خليكم فى الكويت أحسن

عماااااار ياكويت

البوست الجاى هكتب عن الحشيش والرشوة اللى شفتهم فى اسبوع واحد بس


11 comments:

ahmEd_H said...

هاهاهاها

يا أبنى أفهم فسيولوجية الشعب

والله مش عارف اقولك ايه !! بس انا مثلا لا أتعامل مع اى مصلحة حكومية !! لدرجة انى مثلا معييش رخصة و بسوق بقالى سنة الا شويتين ولو سافرت مش حارجع الا بعد 5 او 6 سنين

انا علشان أخد الاعفاء طلعو دين أهلى اساسا و كنت حاعيد الورق من جديد علشان رقم واحد مش باين

حاقلك ايه ولا ايه ولا ايه ما انت من هنا و عارف !! بس لا مهم حصل مصر حتفضل غالية علية

مصر هى أمى said...

يا ابنى انت مش فاهم

من كتر حب الشرطة والموظفين فيك مكنوش عايزين يمشوك من البلد
اهه احنا كدة الناس تعمل فينا خير واحنا نقابله بطريقة وحشة

مصر اولى بيك يا ابنى

ثم هما مش غلطتهم انك وحيد
مكنت تجيبلك شوية اخوات وتدخل الجيش وترتاح من الفيلم ده كله

ثم عايز ايه من شوية موظفين حكومة جاى تقولهم انك شغال فى الخليج وهما مطحونين هنا لازم طبعا يطلعوا عنيك ويقرفوك

المهم حمد الله على سلامتك والف مبروك لرجوعك لارض الكويت تانى

camera_girl said...

حمد لله بسلاامتك مش عرافه اقوللك ايه غير ان الموقف ده اكبر دليل ان ربنا رحمته واسعه اوى....البلد خلااص بتتحلل ادعيلها


كلاام جانبى...بردو انت نورت مصر وانشاء الله النزله الجايه تنزل اجازه كده وتشوفها من منظور تالت

خمسة فضفضة said...

السلام عليكم وحمة الله وبركاته

ايه يا بني هو انت عشان بعدت شويا عن مصر هاتنسي سلو بلدنا ولا ايه ؟؟
:-)
هوه ده بقي عيب الناس اللي بتعيش في اماكن بتحترم الانسان

عموما ما تقلقش الحاله اللي جاتلك دي علاجها سهل تعد في مصر شهر علي الاقل مع تخليص اوراق تلات مرات في اليوم قبل الاكل وبعده
واكيد هاتلاقي تحسن علي طول من اول اسبوع بس انت امشي علي العلاج مظبوط واوعي تلخبط


ههههههههههههههه

esraa said...

بجد مش عارفه أقولك ايه؟

الحمدلله انها عدت وانك لحقت ترجع لشغلك

مشكله اللي حصل ده بجد

وبالنسبه لاحنا بلد ايه فاحنا بلد عسكري طبعا يارامي

احنا مابيحكمناش غير العساكر وهم بس اللي ماسكين البلد

وحتي لما اتغير الدستور وبقي ان رئيس الجمهوريه ينفع يكون مدني مش ضروري عسكري كان عشان التوريث مش اكتر

بنوتة من وسط البلد said...

واحد قريبى لما جه يطلع البطاقة القومية قالوا له اطلع على العباسية .. بتخلص هناك فى 3 ايام .. والحقيقة نسيوا يقولوا انهم 4 ايام .. لان اليوم الى راح فيه العباسية وصل الساعة 11 الصبح .. ومشى الساعة 6 المغرب ... علشان كان مستنى الدور



الغريبة بقى انى حبيبت اطلع بطاقة بدل فاقد .. رحت على السايت بتاع الحكومة الالكترونية وعملت طلب .. وجاتلى للبيت بعد 3 ايام .. وكلمتها وقلتلها انا مش فى البيت وعايزاها تجيلي على الشغل .. تانى يوم جاتلى الشغل ودفعت ال30 جنية وانا قاعدة مانتخة فى مكانى


كنت خليك مع الحكومة الالكترونية

بس وحياتك انا استغليت اسم العقيد الى كان رد عليا فى التليفون .. وبقيت لما اكلم اى حد اقوله انا لسه متصلة بالعقيد فلان الفلانى وهو الى قالى اتصل بيكوا


اتشلت من ع الارض شيل يا معلم :)

تخيياتى والف حمد لله على السلامة لاراضى الوطن :)

سالي محمد سالم said...

ايه يااباصيرى؟؟مش ناوى ترجع ولا ايه؟؟نفسي اسمع حكاويك الجديده يابنى مضحكتش من زمااان

Manamino said...

ايه ياعم اباصيري مش ناوي تزيح البوست الكئيب ده بقي من علي الشاشة اتعقدت ياعم من الصورة الكئيبة دي كل لما بادخل عندك ارحمنا بقي شوية
فين ابداعاتك

مواطن زهقان said...

مش عارف اقولك
ياما شفنا
ولسه هنشوف
عماااااااااااااارياكويت

الوان الحياة said...

السلام عليكم ورجمة الله وبركاته
الحمد الله بتحصل في احسن العائلات وهي دي مصر عجبك ولا مش عجبك
بس برده بنحبها
بحيك علي المدونه
سلام وترجع مصر بالسلامه تاني وتتبهدل برده في المصالح الحكوميه

يا مراكبي said...

أنا بقى لي شهرين مستني البوست بتاع الحشيش والرشوة

مش مهم الرشوة .. إحكيلنا عن الحشيش