Mar 6, 2007

خش على الفضايح برجلك الشمال جـ3ـ



طبعا من المواقف اللى فاتت ومن الجزء الأول والثانى من الفضايح
مش محتاج أقول أن اللى فات كوم.... واللى جاى كوم لوحدة
كل واحد كدة يركز ويستهدى بالله ويجهز نفسة للى جاى
الأباصيرى على المحطة
===========
أنا من النوع المجنون اللى لما تطلع حاجة فى دماغة لازم ينفذها فوراً
مرة وأنا فى الكلية فى سوهاج نزلت انا وأصحابى نتمشى فى البلد شوية
وأحنا راجعين البيت على الساعة 10 وفى نهاية الطريق وقدام البت قلتولهم
أنا هسافر دلوقتى ..يالا باى باى

طبعا اصحابى عارفين الجنان بتاعى فحاولى يقنعونى اسافر الصبح
يابنى أقعد... ياحبيبى أتهد وسافر بكرة
ياعم الأمور مفيش مواصلات لمصر بالليل
وأنا ابدا.... هسافر دلوقتى يعنى هسافر دلوقتى

وكنت معتمد أن فى سوبر جيت لمصر الساعة 10.30 والساعة 11.30 ودايما فاضيين
المهم طلعت جرى أخدت شنطتى ورميت فيها شوية هدوم وطلعت بسرعة على الموقف
ووصلت على الساعة 10.30 ولقيت الأتوبيس واقف والناس بتحط الشنط
قمت دخلت على شباك التذاكر جرررى عشان أحجز ..... وشوفوا اللى حصل

أنــا: تذكرة لمصر فى أتوبيس 10.30 لو سمحت
الموظف: الأتوبيس طلع من 5 دقايق يا أستاذ
أنــا: (بتناحة) طلع اية!! ماهو واقف أهه
الموظف: (بقرف) دة بتاع أسكندرية يا استاذ
أنــا: (بحسرة) ياااة لسة هستنى.. خلاص خليها فى 11.30 بقى
الموظف: (بشماتة) كومبليت...مفيش كراسى فاضية علية
أنـــا: طيب مفيش أى حاجة خالص لمصر
الموظف: (بأنتصار) أول أتوبيس يقوم بكرة الساعة 6.30 الصبح
أأأأة ياشماتة العيال بتوع البيت فيا....أية النظام يا اباصيرى هتروح ولا أية
لألألألأ اروح أية وبتاع أية!!! هسافر النهاردة يعنى هسافر النهارة
سحبت الشنطة على كتفى وطلعت على المحطة ولو أنى بكرة السفر بالقطر
وطلعت على شباك التذاكر المكيفة وطابووور طوووويل... المهم وصلت للشباك بعد عناء

أنا: لوسمحت أول حاجة طالعة مصر الساعة كام
الموظف: الساعة 2.30 الفجر
أنا: أأأأأف يعنى هقعد بتاع 3 ساعات على المحطة... مفيش حاجة غير كدة
الموظف : فى واحد الساعة 4.30 الفجر
أنا: (الراجل دة اهبل ولا اية) ياعم انا عايز حاجة قبل كدة
الموظف: لأ مفيش
أنا: أوك هات تذكرة تانية مكيف
الموظف: (نظرة سريعة على الكمبيوتر ثم أبتسامة واسعة) مفيش اماكن
أنا: إزاى... طيب هات أى حاجة انشالله على حجر السواق ههههه
الموظف: مفيش غير فى القطر بتاع 4.30 الفجر
أنا: ماشى ... هستنى وامرى لله.. احجزلى تذكرة
الموظف: 38 جنية
أنا: ( دفعت طبعاً) وأخدت التذكرة وطلعت على رصيف مصر
وقعدت على المحطة شوية وكبس على النوم
و بدون تفكير...قمت رابط الشنطة فى أيدى ونايم على الكنب الرخام اللى على المحطة
منظرى كان زبالة.. اللى رايح واللى جاى بيتفرج على شحات المحطة اللى نايم على الرصيف :)
كان أول مرة أعمل الحركة دى... بس بجد كانت نومة أستااااذة ولا بورش السجن هاااااااا

وأخيييييييييييرا الساعة وصلت 4 يعنى فاضل نص ساعة على القطر

قمت من على الشازلونج الملوكى اللى كنت نايم علية وغسلت وشى ورجعت استنى القطر
الساعة 4.15 كويس
الساعة 4.30 يامسهل
الساعة 4.45 كدة القطر أتأخر
الساعة 5 قولت كلمة قبيحة وطلعت على غرفة الكمسرية

انا: فى اية يا أخوانا قطر مصر هيوصل امتى
الكمسرى: قطر مصر بتاع الساعة كام
أنا: المكيف بتاع 4.30 هو هيتأخر كتير
الكمسرى: ياااااة (ونظرة من بتوع انت من المريخ يابنى) ماوصل وطلع ....انت نايم؟؟؟
انا: نايم أية وزفت اية مانا قاعد على المحطة من الساعة 11 بالليل
كمسرى تانى: أأأأة قطر مصر.. أصلهم حولوة على رصيف تانى
أنا: يعنى اية مش واخد بالى؟؟؟؟؟؟
الكمسرى التانى: يعنى بدل مايدخل على رصيف مصر دخل على رصيف تانى وطلع بقالة نص ساعة
أنا: (بهجوم) طيب مش فى حمير على المحطة تقولولهم ان القطر هيقف على رصيف تانى
الكمسرى: (بهجوم مضاد) ملناش دعوة روح أسال مدير المحطة
أنا: طيب والتذكرة اللى حجزتها..... دى ب 38 جنييييييييية
الكمسرى: شوف بتاع شباك التذاكر
طلعت على شباك التذاكر... والشياطين بتلعب فى دماغى بلاى ستيشن
ودخلت على الموظف وأتخانقنا شوية وقاللى مينفعش التذكرة كدة راحت عليك
أنا: يعنى هى غلطتى ولا غلطتكم
الموظف: ملناش دعوة القطر وصل المحطة وخلاص
أنا: طيب والعمل
الموظف: (بأبتسامة واسعة) أحجز فى قطر الساعة 7 الصبح

حراااااااااااااااااااااااااااااااام كرهتكم وكرهت مصلحة السكة الحديد كلها
ومن تانى أخدت الشنطة وطلعت على موقف السوبر جيت
لسة فاضل ساعة ونص على سوبرجيت مصر

دة أية اليوم الأسود دة
اية الحظ الفقرى دة
أية السفرية النحس دى
واااااااااااااااء عايز أرتاح ياكفرررررة ... جسمى أتدشدش

وأخيرااااااا أتفتح شباك التذاكر وحجزت تذكرة
وقعدت فى السوبرجيت... قعدت أية؟؟؟؟؟
دا انا اتمسمرت فى الكرسى عشان مش طالبة مواقف نحس تانى
ومش ممكن..... مستحيل...... تخيلوا
الأتوبيس طلع فى ميعادة....... شكل النحس أتفك ياجدعان

المهم وصلنا قرب المنيا وأنا شغال أغنى (ولو ان الأغنية دى مكانتش طلعت) لووول
وأركب الأتوبيس.... درجن... درجن
وأتحنطر بية.. درجن..درجن ..... طااااااخ

طااااخ؟؟؟؟ طااااااخ أية بقى؟؟؟؟

عجلة من الدوبل اللى ورا فرقعوا
ياصلاة الزين ياصلاة الزين على عزيزة ياصلاة الزين

طيب أية العمل ياعم السواق ؟؟؟
السواق: لازم نروح لمحطة الخدمة بتاعة السوبرجيت
الركاب: طيب فى ناس كتير على الطريق ممكن نصلح العجلة عندهم
السواق: لأ مينفعش الأتوبيس لازم يروح ورشة الشركة

وطبعا عشان ماشى على عجلة واحدة بدل الدوبل ..فماشى على قشر بيض
وفييييييييين لما وصل للورشة بتاعة الشركة
ياااااااااااااااة دا انا حفظت الطريق دة رملاية رملاية
المهم .. أتصلحت العجلة وركبوها ومشينا فى أتجاة مصر
وأخييييييييييييييييييييييييير وصلنااااااااااا مصر هيييييييية

تفتكروا بقى حظى الفقرى ينهد ويقعد ساكت؟؟
أبزلوتلى .. أطلاقاً مطلقاً بالمرة

الطريق واقف والعربيات واقفة والناس واقفة برة العربيات وكلهم باصين للسماء

أأأأأأهااااا أستنتاج عبقرى.... أكيد الأطباق الطايرة دخلت المجال الجوى لمصر
أمال الناس دول سايبين عربياتهم وباصين للسماء لية؟؟؟؟ بيصطادوا سمك يعنى؟؟

فتحت الشباك وأنا بلعن الحظ الأسود واليوم اللى فكرت أسافر فية
وبصيت للسماء زى الهبل اللى برة عشان أعرف بيتفرجوا على أية؟؟
الله عرض عسكرى للطيران الحربى والطيارات بتطلع دخان ملون
قعدوا بتاع ربع ساعة بيلفوا فى الجو وبيعملوا عرض هاايل

وفجأأأأأأأأأأأأأأأأأأة

ضربت فى دماغى فكرة

دماغى أتشلت

تنحت
وأزبهليت
وبرقت
وفتحت بقى
ودخلت راسى من الشباك
وقفلت الأزاز بسرعة
وبصيت للناس اللى حواليا
مساكين الناس دول
أنا عارف حظى النحس
هيتاخدوا ظلم معايا
دلوقتى الطيارات دى تقع على الأتوبيس بتاعى
هاهههههههههههههه

بس الحمد لله
محصلشى حاجة من الأفكار التشاؤمية بتاعتى دى
وربنا ستر والطيارات رجعت للمطار بسلام

تخيلوا كنت فاكر حظى وحش وكنت فاكر اليوم دة نحس
:)
صحيح..... إن بعض الظن إثم ياجدعان




الأباصيرى فى السكاشن
===========

القصة دى مكنتش ناوى أحكيها.. بس أعتبروها أصدار مخصوص لأميرة البلطجة

مرة دخلت سكشن فى الكلية.. وموضوع أن انا أحضر سكشن أو محاضرة فدة لوحدة أنجاز
المهم قعدت جنب جماعة أصحابى وقعدنا نرغى شوية لحد الدكتور ماييجى
وكان واحد منهم معاة مقص ميدالية - هو مقص صغير أوى وبيطبق ويبقى ميدالية صغيرة
المهم شوية ودخلت مجموعة بنات وقعدوا قدامنا.. ولقيت اصحابى بيتهامسوا ويشاورا على البنات
قمت شادد واحد من أصحابى عشان أفهم الكلام على أية بالظبط؟؟
فقاللى ان البنت اللى قدامى علطول دى حاطة مناخيرها فى السما وبتتعامل مع أصحابى بقرف
بصيت للبنت شكلها طويل شوية وشعرها ناعم وطويل وكانت مسيبا شعرها

شوية ودخل الدكتور وأبتدا يشرح فكلنا رجعنا ضهرنا لورا عشان نركز ونفهم اللى بيقولة
فالبنت دى قامت مرجعة ضهرها لورا.. ونطرت شعرها فأترمى على الكتب بتاعتى
فبصيت وسكت..عادى يعنى
لقيت صاحبى بيتوشوش مع اللى جنبة وبيبادلوا مع بعض حاجات كدة

وبعدين لقيت صاحبى بيقوللى أتزاح شوية
وقعد هو مكانى ..قعد ورا البنت علطول.... مكانى يعنى
شوية ولقيتة سند على الكتب بتاعتى
وطلع من أيدية المقص بتاع صاحبنا التانى
وأشتغل طوووول السكشن يقص شوية من شعر البنت وبعدين يرجع
ويسند تانى على الطرابيزة ويقص شعر البنت
لغاااية لما السكشن خلص وقام جرى طلع برة
وانا قومت عشان أخد الكتاب بتاعى وأطلع برة أنا كمان
والبنات قاموا عشان يخرجوا

لحظة من فضلكم..... تخيلوا الموقف معايا تانى

أصحابى اللى جنبى طلعوا بسرعة والكراسى اللى جنبى فاضية
وأنا واقف ومادد أيدى على الكتاب بتاعى عشان أخدة
والبنات واقفين عشان يخرجوا هما كمان
وبعدين............. وأأأة من بعدين دى
ببص على الكتاب لقيت علية شعر البنت المأسوف على شبابها

مش أسكت وأخد الكتاب وأمشى........... لأ
وقفت أنضف الكتاب من الشعر بتاعها.... غباء مستحيييييييل
ولقيت واحدة من البنات بتبص اوى على الشعر
وبعدين لقيتها بصت على شعر صاحبتها ومسكتها من أيديها وشهقت وقالت
أية دة ؟؟؟؟؟؟؟؟ مش دة شعرك ؟؟؟؟؟؟؟

لقيت المأسوف على شبابها برقت جامد ومسكت شعرها والشعر اللى على الكتاب بتاعى
وبصتلى بصة من بتوع كدب اللى انا شايفاة دة لاولع فيك

طبعا العبد لله ركبة سابت..... دى فيها حرمان من السنة كلها وبلاوى تانية
طبعا حاولت أقول أى حاجة أقنعها بيها.. لقيت نفسى بقولها

لألألأ ... دة شعر واحد صاحبى
وطيراااااااااااان على برة
هههههههههههههههههههه

تحذير لكل البنات.... بلاش رفع المناخير علينا
أديكوا شايفين.... اصحابى جاهزين ومبيرحموش
:)

بجد انا زعلت على اللى حصل للبنت دى وهزأت اصحابى
بس هنعمل أية بقى!!!! شقاوة شباب يافندم ههههههههههه
الأباصيرى ووليمة السمك
===========
برضة وكالعادة الموقف اللى جاى دة حصل فى بيت الطلبة فى سوهاج
كنت سهران أنا وجماعة أصحابى بنذاكر فى الكوتشينة والدومينو
وعلى الساعة 1 بالليل طلعت فى دماغنا نتعشى.. وبدأت المأساة
أنا: أنا جعاااان...... حد مفجوع يتعشى معايا
واحد من الشباب: أة تعالوا نعمل عشوة محترمة
أنا: عشوة محترمة إزاى يعنى
واحد من الشباب: انا عندى سمك فى التلاجة وفاضل يتقلى فى الزيت
أنا: طيب والدخان... البوتجاز فى المطبخ المشترك ولو قلينا السمك البيت كلة هيصحى من الدخان والريحة
واحد من الشباب: ملكوش دعوة موضوع الدخان دة عندى.. هات السمك وملكش دعوة
وشرح عم الكتكوت دة فكرتة العبقرية فى القضاء على دخان السمك وقال
عم الكتكوت: أحنا نجيب البوتجاز عندى فى الاوضة ونقلى السمك فى البلكونة.... أية رأيكم؟؟
أحنا : طيب والأدوار اللى فوقينا!!! مالدخان هيدخلهم من الشبابيك
عم الكتكوت: لأ الجو برد وأكيد كلهم قافلين الشبابيك
أنتشرواااااااااااااا.........طبعا بعد ما أتفقنا كل واحد هيعمل أية
انا وواحد هنجيب البوتاجاز
وناس تانية هتجيب الزيت والطاسة
وواحد هيجيب السمك من التلاجة
والباقى هيجهز البلكونة والقعدة
مافيش ربع ساعة بالظبط وكنا مجهزين القعدة وشغالين نقلى السمك
وبعد ما خلصنا لقينا واحد عبقرى قام واخد الطاسة والزيت بيغلى
وقام حادف الزيت من البلكونة .. ولما سألناة عمل كدة لية؟؟
قال عشان الزيت كان بيطلع دخان
:) صعيدى بقى هتقولوا أية؟؟؟ اللهم لا أعتراض
وحطينا السمك على الترابيزة وقسمنا الوليمة
وضربنا أحلى أكلة سمك فى تاريخ عالم البحار
وطبعا بعد أكلة السمك الجامدة دى.. كلنا تنحنا وبقينا مش قادرين نتحرك من اماكنا
أنا: عايز واحد جدع بقى منكم يشيلنى من مكانى ويودينى السرير
واحد من الشباب: طيب وانت رايح السرير أبقى أغسلى أيدى معاك
انا: لأ مينفعش كدة يا أخوانا.. دا احنا لسة هنشيل البوتاجاز
الشباب كلهم فى نفس واااحد: هتشيييييييييييل البوتاجاز
أنا: يا أخوانا بلاش ندالة... ياجماعة عيييب دا أحنا أصحاب
ودول مصممين لأ يعنى لأ
المهم صاحب الأوضة قاللى خلاص نام معايا النهاردة
وبكرة الصبح بدرى نرجع البوتاجاز مكانة قبل ماحد يصحى
وخلص اليوم على كدة

أية دة يا أباصيرى؟؟؟؟ إمال أية اللى حصل لما اليوم خلص؟؟

أستنواااااا دا التقيل جاى ورا

تانى يوم صحيت انا وصاحبى على حد بيرزع على الباب

صحينا من النوم لقيناة المشرف واقف على الباب.. والصالة مليانة شباب

وبيسالنا البوتاجاز مش موجود؟؟؟؟؟؟ حد منكم شافة؟؟؟؟؟

موسيقى تصويرية- أن أأأأأأأأأأأأأأأأأأأأأأن

عملت أستعادة سريعة للى حصل امبارح وأكتشف المصيبة

البوتاجاز موجود فى البلكونة والمشرف واقف على الباب والشباب واقفين فى الصالة

وعلى طريقة أسماعيل ياسين ( ياصلاة النبى) بصيت لصاحبى وانا مش عارف هنعمل أية

لقيتة محتاس وناوى يعترف بالجريمة ويقولة دا القتيل (البوتاجاز) ملقح جوة فى البلكونة

فجأة اللمبة اللى فوق راسى نورت وأعلنت أنها لقت فكرة عبقرية

ولقيت نفسى بقول لصاحبى فى حركة من بتوع المسلسلات العربى

أنا: أة صحيح.... انا شفت البوتاجاز فوق السطح أمبارح

صاحبى: أة أة صحيح دا كان مرمى فوق السطح

المشرف: ومين اللى طلعة فوق؟؟

انا: مش عارف... على العموم خد الشباب اللى فى الصالة وخليهم ينزلوة معاك

ولقيت المشرف أخد الشباب وطلع فوق السطوح عشان ينزل البوتاجاز

وجررررررررى قفلت باب الشقة عشان محدش يدخل

ورجعت انا وصاحبى البوتاجاز مكانة وفتحنا باب الشقة تانى

ولا كأننا عملنا حاجة... ملايكة بالهالات البيضا اللى فوق راسنا

شوية ولقيت المشرف بيخبط علينا وبيقولنا البوتاجاز مش على السطح

وقبل مايكمل كلامة لمح البوتاجاز فى المطبخ وبقى هيتجنن

بس سلم امرة لله ونزل وهو بيلعن اليوم اللى اشتغل فية... معذور برضة

بعدها بحوالى ساعة سمعنا خناقة كبيرة فى صالة الاستقبال فنزلنا نشوف فى اية؟؟

لقينا المشرف والفراش ومجموعة شباب بيتخانقوا مع ناس صعايدة كتير

والصعايدة عمالة تشتم فى المشرف وحالفة لتدخل تضربة والفراش بيحوشهم

والشباب بتوع البيت بيحاولوا يمنعوا الصعايدة انهم يمسكوا المشرف

ومهرجان اليوم العالمى لضرب المشرف شغال عندنا فى الاستقبال

ولما سألت هما الناس دول عايزين يضربوا المشرف لية؟؟؟

لقيت الموضوع غريب أوى

تخيلوا.... بيقولوا فى حد من البيت عندنا

رمى زيت سخن على الهدوم اللى ناشرينها الصعايدة

فى البلكونة بتاعتهم وهدومهم كلها باظت

ههههههههههههههههههههههههههه

=================

ياااااااااااااااااااااااة خلصت البوست
معلش يا أخوانا أنا عارف انى أتأخرت جامد
بس كنت مزنووق فى الشغل جامد
على العموم لو افتكرت فضايح تانى هبقى أقولكم
:)

82 comments:

مصر هى أمى said...

اباصيرى انا اول واحد

ايه يا ابنى اللى انتوا عملتوه ده
دا انتوا مش هتشوفوا جنة خالص
تقطعوا شعر البنت عادى تستاهل ايه اللى خلاها تتمنظر عليكوا بشعرها
لكن المشرف حرام عليكوا اللى عملتوه فيه
ويتاكل سمك يا اباصيرى وانا بكرهه يبقى ديه اخر مرة اجى فيها عندك

يا مراكبي said...

إنت معرفتك بقت فضايح .. أنا ما كنتش أعرف إن الأمور ممكن توصل للدرجة دي

ده إنت فعلا تستاهل موضوع القطر والسوبر جيت ده

قطعتوا شعر البنت .. ورميتوا زيت على الهدوم .. وخليتوا المشرف يتجنن كمان؟

ده انا حتى بقيت أدخل المدونة وأنا مرعوب ليطلع لي عفريت ولا حاجه

ربنا يستر منك .. هو لسه فيه فضايح تاني؟

david santos said...

Hello!
Have good day
InsyaAllah

yousef said...

يخربيت كده
ايه يابنى ده انتم فعلا شياطين بهالات بيضاء المهم انى طالب منك طلب تبقا تغير صورة الراجل الوحش ده لحسن بجد ببقا قرفان من شكله اوى وبحاول وانا بتصفح البوست انى مشوفش صوره
ويا ريت تشرفنى فى مدونتى

Ahmad Hegab said...

hehehe

eeeh ya bny kol daa

al post taweel awy bas gamed gdn gdn gdn

asln ana zaik kedaa lma fe 7aga betgy fe demaa3'y ba3mlhaa aw ta2rebaan kol 7yaaty 3ayshehaa kedaa


da anto shaiteeeeeeeeeeeeeeeeen

al modo3 btaa3 sha3r al bnt daaa raheeeeb we besr7aa nefsy a3mlooooo

شيماء الجيزى said...

ياه عليك يا اباصيرى ...انت ايه يا عم انت عارف تقطيع شعر البنت ده ممكن يعملها ايه؟
دى زمنها قطعت مناخيرها خالص :d
لا بترفعها فى سما ولا ارض
اة منكم
ولا حكاية الزيت دى ...من البلكونه عادى بقا

فضايحك مسخره الصراحه

Anonymous said...

السلام عليكم

ههههههههههههههههههههههههه
بجد مش قادرة امسك نفسي من الضحك
تقطعوا شعر البنت
يانهار ابيض

لا لا معتقدش انها رافعة مناخيرها في السما
لو فعلا كده ..كان زمانكم..الله اعلم بقي

سلامات
:)

khaled said...

امووووت و اعرف مين اللى رمى الزيت
ممكن تدينى عناوين الناس الصعايدة دول؟

شخبطة ملوكى said...

لا يا اباصيرى بجد انت فظيع
واصحابك مش ممكن بجد ساعات بحس انك العاقل وسطهم و ساعات بحس انك لامؤاخذه يعنى اجن واحد فيهم
انتو بجد مسخرة و المواقف كلها دمها خفيف
تحياتى

أميرة said...

هى الصور اللى بتحطها دى مالهاش بديل ؟؟؟؟؟

ياخراشى على العمايل

اول حاجة كان لازم تعرف ان مادام نحست معاك مرة يبقى النحس مستمر وخصوصا فى حركات السفر دى وبرده كان بيبقى الواحد دماغه جزمة ومصمم يسافر حتى لو هيموت فى الطريق نفس الشعور دة حصلى قبل كدة وحسيت بالذنب انى سبب نحس الناس اللى مسافرة معايا
ههههههههههه
الموقف التانى دة انا بشك فى براءتك تلاقيك حرفت القصة عشان تقدر تنزلها بجد عمل اجرامى

وفكرتنى بالمناسبة بموقف ماحصليش الحمد لله بس حصل مع واحدة صاحبتنا برده فى السكشن وكانت مناخيرها لفوق لحظها النحس كانت جايبة شوذ جديد وكان ضيق اوى اول ماقعدت فى السكشن قالت تريح شوية خلعته تحت رجلها وطبعا نسيت نفسها والشباب ورا انتهزوا الفرصة وكانوا لماحين اوى الصراحة واخدوا الشوذ من تحت البنش وخبوه فى كشكول كبير لا ومش بس كدة واحد منهم طلع بيه برة السكشن اول واحد طلع
والبنت بقى لسة جاية تدور برجلها مافيش شوذ راح فين يبقى منظرها ايه والبرستيج بتاعها يبقى شكله ايه
وراحت معيطة الشباب بس كانوا عايزينها ياتعيط ياتخرج من السكشن حافية هههههههه افترى عشان يعنى كدة يبقوا كسروا نفسها بس شافوها بتعيط راح الواد داخل بالشوذ الكاميرا الخفية يافندم ههههههه

تحياتى

أميرة البلطجية said...

عزيزى اباصيري
اولاً..شيلللل الصور المنيلة اللي بتحطها فوق البوستات دي..بجد أسوء من اسوء مقلب انت عملته
ثانيا بقي..نصيحة اخوية..انت شتمت ناس وقلت "عليهم يا ك..." ودي حرام..استغفر
.
.
حبه جد بقي
بقي سيادتك كاتبلي موضوع البنت اللي قطعتوا شعرها
تصدق بالله
انا مرة موظف اتنرفز عليا
تاني يوم كان وكيل الكلية بيعتزرلي شخصيا
مش كل الطير يا باشا
كله كوم والزيت والسمك ده كوم تاننيييييييي
انت فعلا شقي طحنننن..كون ان يجيلك جرأة تبعت الراجل وتقول شفناه فوق السطح عشان تدي نفسك وقت ترجعه تاني ..دي جمودية قلب صراحة اشهدلك بيها
وبجد موقف الاولي كان مسخرة
طب بعد ما تخرجت بقي اعتزلت الفضايح وله لسه فاضحنا بره البلد؟
تحياتي الكتير

smraa alnil said...

انت يا عم انت
انت اللي انت بتعمله دة
بج مش لاقية اي تعليق اقوله انت اصلا مش ليك حل خالص
انا كمان بموت في السمك بصراحة
بطل مقالب بقي
وخلاص بجد مش قادة من كتر الضحك


وبعدين الصورة اللي انت حاطيتها دي مقرفة اوي بجد
قلبت بطني

بنوتة من وسط البلد said...

اباصييرى
الله يخرب مطنك :)))

مين مطنك ده .. ؟؟

ده انتوا عملتكوا سودة ومهببة .. اوعى يكون ليك مصايب وفضايح فى بلاد بره .. سمعة مصر امانة بين ايديك يا اباصيرى ... !!!!!!

وبالهنا والشفا ان شاء الله :)

عاشقة الوطن said...

اباصيري

يعنى انت غاوى تبهدل نفسك يااخى
تنام فى المحطة
يالهوى عليك

وبعدين مش عيب لما تسيب اصحابك يقصوا شعر الغلبانة
كله هيقعد لكم
بس انت ملكش ذنب
انت المظلوم فى الموضوع ده

وبعدين ايه حكاية السمك
يعنى السمك مايحلاش غير بليل والناس نايمة
ومع الصعايدة كمان

على فكرة ان قبل مااقرا البوست وانا شغالة ضحك مع نفسي
اصلي عارفة انى لما اقراه هاكون مش قادرة ابطل ضحك

ومتبقاش تتاخر علينا بالفضايح ديه

shabfa2re said...

كله كوم وصورة الشخصية المهببة دى كوم تانى
D:

M0naliza said...

اولا شكرا جد على تعليقاتك فى مودنتى السابقه.ثانيا ياراجل ايه الصور اللى لانت بتحطها دى حرام عليك انت مش عايز يجيلك ولا ايه
اما حكايه المقالب فالنت فظيع تخصص ودكتوراه يبنى ليه كده طتالبه اولى مالهم توقع قلبهم كدا
والمرة الجايه عايزين مقلب يكون اتعمل فيك مش انت اللى عملته

Anonymous said...

أنا بقيت باتكسف أخش مدونتك من الفضايح اللي إنت كتبها

بس بصحيح مت و رجعت حييت من الضحك لول

بليز أنا لسه ما اتغديتش ممكن تشيل الصورة اللي إنت حاططها
أصلي حاسة نفسي حارجع و ذنبك على جنبك لو رجعت ع مدونتك ههههههههههه

Sou said...

ya rgel 7aram 3aleek modo3 el bent daa.. bass kewis enk kont moshtarek salbee fee el modo3
ama modo3 el zeet fa fe3lan el 3'aba2 lih naso..
write back another post soonn

Ma 3lina said...

lol y7'reb 3a2lk ih el balawy di kolha

bezmtek di kolia el entom feha di wala sirk

sha3r el bent bgd 7aram y3ni , ama mawdo3 el samk fa entom gababra 7ad y3mel keda

sawany b2a entom aslan betzakro we el klam dah entom et7'rgto aslaaaaaan

كراكيب عادل said...

يخرب بيتك يا رامي

يا واد مش تقول انك نزلت البوست

وبعدين اية دة كله انا عموما عجبتني موضوع السفرية المهببة دي لانها بتحصل

بلاوي زي كدة اما موضوع شعر البنت اسمحلي انا زعلت منك بجد دانتا طلعت مسكين كدة العيال عملوا ليك مقلب

كدة برضو هتخليني اقطع علاقتي بيك خالص

والزيت دة هو الواد دة عبيط يعني يرمي الزيت كدة وبعدين معقولة حد يعيش في الصعيد ويعمل كدة اما نشوف الموضوع دة بعدين انا اتاخرت علشان بجهز للسفر


تحياتي

كراكيب عادل said...

اباصيري بجد بجد الصورة مقرفة انا معرفتش اكمل التفاحة حرام عليك

يا عم بكلمك بجد الناس قرفانة تيجي هنا شيلها ابوس ايدك

ibn nasser - ابن ناصر said...

ههههههههههههه انت باين عليك ايه حكايه ههههه
تحياتي

مجهول said...

ههههههه
ايه ياعم الفضايح دي
ياخراااااااااابي
كل ده انته

منك لله ياشيخ ده مصيبه وفضيحه
بس بجد كوميدي اوي
سعيد لزيارتك في الفضيحه قصدي المدونه دي
واشوفك في فضايح جايه يا عم

-_- said...

هههههههههههههههههههه

مش ممكن الموقف بتاع المحطة ده ولا بتاع زميلتك في السكشن

ههههههههههههههههههههههههه


انت فطستنى من الضحك

Shreef said...

ايه يا ابني نومة المحطة ديه و ايه النحس ده..بس احسن حاجة عملتوها انكوا قصيتوا شعر البنت ديه تستاهل..سلام

Nothing To Lose said...

هههههههههههههههههههههه
مش قادرة فطست
الله تجننوا اصلا ..تحيه لاحلى شباب مجنون فى مصر بحب الجنان جدا
تقطعوا شعر البنت ينهااااااااااار كويس جدا انها مقطعتش رقابيكم
الصور دى وحشه اوى يا اباصيرى ياخويا ابئا غيرها كدا الله يهديك مش لازم تعمل فينا احنا كمان مقالب

الكلام نوعان :كلام فارغ وكلام مليان كلام فارغ said...

حرام عليكم البنت اللى حرقتوالها شعرها دي
وايه يانى الاجرام ده كله اللى ان انت بتعمله ده
كنتوا اصحاب ولا كنتوا مكونين فرقه على كابونى والسرنجه في الرنجه والعباره في الدوياره
بس عايزه اطلب منك
ياريت تشيل الصور اللى انت حاططها دي لانها بجد وحشه جدا

bentfalestine said...

يعني اسمحلي مع اول زياره اقولك انه الصور بتصيبني بحاله الاغماء و غثيان بصحى منه تاني يوم بالشغل حرام عليك ... بجد مقالب يعني عاوز خرزة زرقا عشان العين و لا حذوة حصان يعني عشان بلاش الحسد ع الحظ الحلو بتاعك انا بحسدك علي لانه الي مغامرات رهيبة انا و الحظ ...اما بخصوص شعر البنت الغلبانه رجعتني بالذاكرة شي 8 9 سنين ايام المدرسة كان في بنت في الدرج الي قدامي بالزبط و بنت كرهت حالي من تحت راسها المهم كنت بحب السعادين اكثر بدرس العلوم على ما اظن جبت ولاعه سجاير كانت معي و ولعت بشعر البنت هو مصارش حريقة بس طلعت ريحة اشي مشعوط رهيبة ..كان ممكن ع اثرها انطرد و اصيع و اتبهدل بس ربك سترها
عذرا ع التطفل و الاطاله و اسمحلي لي التطفل دوما تحياتي

halwasa-masrya said...

بجد بتعرف تضحكنى يا مصيبة

koukawy said...

مش ممكن الفضايح بتاعتك بتموتني من الضحك
يا ريت تقول منها كتير ههههههههههههههههههههههههههههههه

Music Gates said...

ايه يا عم ده انا كنت كاتب تعليييييق وديته فين اكيد المغلوقات الغريبه دي اكلتها الي بتحوطها في البوستات ده اناقاعدت اضحك و اقول احسن في حوار البنات ده هههههههههه

خمسة فضفضة said...

السلام عليكم ورحمة الله وبركاته

هههههههههههههههههه
لسه بضحك من ساعة ما قريت البوست اللي فات ،
بس الصوره دي يععععععععععع هو انت جايب الصور دي منين بالظبط
....؟؟؟؟؟؟
هههههههههههه

Haitham Abu Akrab said...

ضربت فى دماغى فكرة


دماغى أتشلت


تنحت

وأزبهليت

وبرقت

وفتحت بقى

ودخلت راسى من الشباك

وقفلت الأزاز بسرعة

وبصيت للناس اللى حواليا

==
اول مره اعرف انك شاعر جامد

sakayar said...

حرام عليك يا أباصيري ... أنا مش قادر أمسك نفسي من الضحك.... جيت أمسكها لطشتني بالقلم

vision said...

يا اباااااااصيرررررررررررررىىىىىىىىىىىىىىىىىىىىى انا كنت باجى بس الكومنت والنت بيعلق هنا عاوزين يفرقوووووناااااا الأوغاااااد

انا عملااللك كومنت فى موضوع اوقات- من القلب مأخدتش باللك منو ليه هو مش الأخير هو الى قبل قبل الأخير ركز وانت تلااقيه تعااالى بأاااااه

بالنسبه للبوست ده موصلتش غير لحد قص الشعر انا بجد لسه فاتحه بوقى ..[س مش عارفه انتو جامدين جدا

Neveen Ali said...

انا لو منك انشر الفضايح دى بكتاب
دا انت موسوعة عفرته يا بنى
اضحك الله سنك يا اباصيري

طهقان said...

ايه يا عم

امال لو اتجوزت هاتحكي في كام صفحة

على كل حال

الحمد لله على سلامتك
اشوفك في بيت العدل

LAMIA MAHMOUD said...

انا
فطست
من
الضحك

heba said...

الصور اللي انت بتحطها دي لوحدها فضيحة .. بلاش تعمل فينا كده

مش عايزة اقول ان اللي حصلك في السفرية دي تخليص حقوق .. بس اديني قولتها .. انما بجد انت قلبك جاااامد عشان عرفت تطلع من المأزق بتاع البوتوجاز .. بس انا زعلت على شعر البنت .. هو المفروض اصلاً محدش يحط شعره على كتب حد بس هنعمل ايه بقى .. شقاوة شباب يا فندم

لو في فضايح تانية قول .. انا بجد بضحك من قلبي .. بس الله يكرمك شيل الصور اللي بتعملي أزمة دي .. ده ولا أجدعها مقلب مانا مش عارفة ايه اللي مستنيني لما بفتح مدونتك

-_- said...

والله يا اباصيري انا بقيت خايف حد يجي يسألنى عنك اقوله معرفوش

!!!


على فكرة انت كاتب ساخر ممتاز مستنيين الجزء الرابع

Anonymous said...

بجد بجد أنتم شياطين علشان تعملو كدة فى بنت
بس بصراحة مواقفك زى العسل ضحكتنى من قلبى بجد

Unknown said...

أخيرا تم بحمد الله.
بس انا عايزه أعرف حاجه انت بتجيب الصور دي منين؟

vision said...

انت فييييييييييييييين بأه المدونه بتاعتى مضلمه بجد من غيرك انت فييييين يا اباصيررررررررررررررى بأاااااااااااه

واحـــد مـــــن الـنـــاس said...

الله الله

يالا يالا يالا

بص عالحلاوة حلاوة

من ده بكرة برع جنيه

فضائح

اخبار الحوادث

اتفضلو معانا يا رجالة

ادي الفضايح ولا بلاش

منك لله يا اباصيري

الاول قرفتني بالصورة اللي حطتها

وبعدين فطستني من الضحك

منك لله


مراسلكم

علي من مستشفى الحميات

gohayna said...

ايه دا يا ابن الحلال؟
دي ولا مغامرات اليس في بلاد العجائب
تحفه والنعمه انت وصحابك
انا قريت اول بوست بتاع الفر واكله السمك والسكشن
وهكمل الباقي علي رواق بس بعد ما اعمل كوبايه شاي في الخمسينه
سلام مؤقتا

Unknown said...

يالهووووووى

ايه الصورة المقرفة دىىىىىىى
ارحمنا بقااااااا

وبعدين ايه البلاوى دى كلها
شعب مصر اشكتىىىىى

يعقــوب أو فانتــي said...

يا عم حرام عليك الصور ده بتوجعلي وشي...ارحمنا ... و بعدين فضايح ده و لا حروب استنزاف يا عمي....كان معاكوا يعقوب مش فانتي

Anonymous said...

طبعا ان بعض الظن اثم ، انت بعد كل اللى حصل فى المحطة ده و حاسس انك نحس، ايه ده ، لا خالص ، اطلاقا

فضايح بمعنى الكلمة

zordeak said...

ههههههههههههه


ايه يا بنى الفقر ده


كل دى فضاايح ؟


ده انت طلعت مشكلة


وايه حكاية الحظ النحس ده

وتقطعو شعر البنت يا ظلمة

وتقلو سمك فى البلاكونة

ايه ده كله

_______________

على الهامش

ايه الصورة المقرفة دى


:D

safa7_karmooz said...

هههههههههههههههههههههههههههههههههههههههههههههههههههههههههههههههههه
مش قادر اابطل ضحك

بجد

emos said...

اية الصور المقرفة دى الله يقرفك

و بعدين اية الجنان اللى انت فية دة مش عيب؟

انا مكملتش البوست من الصورة مقدرتش استحمل

هحاول اكمل ان شاء الله

emos said...

الصراحة بعد لما قرأت القصتين التنيين

مقارنتا بصحابك انت عاقل مووت اية العقل دة

بس بجد انتو عيال مسخرة متخدونى معاكو فى الشلة انا بحب المصايب دى

Anonymous said...

طب ممكن نبقى صحاب ؟؟؟؟؟؟

الأباصيرى said...

صديقى ghost

أسف انى مسحت الكومنتس بتاعتك عشان الالفاظ اللى فيها كانت مش ولابد
:)

بص يابو الأشباح
احنا شباب ولكل واحد فينا حسناتة وسيئاتة.. انا بحاول اخلى البلوج دة حاجة نضيفة اقدر اقول عنها انى عملت حاجة محترمة بتسعد الناس

كل واحد من المدونين اللى فوق دول عندة مشاكل وهموم كتيرة، بس لما بيدخل هنا بينسى همومة وتلاقية بيضحك من قلبة
ودى لوحدها حاجة أتشرف بيها

وصداقتك أنا ارحب بيها فى اى وقت، وياريت تساعدنى أنى أخلى البلوج دة نضيف من الالفاظ الصعبة

وياريت أشوفك هنا كتيير

وصباحوووووووو أشباح
;)
وياريت اشوفك هنا علطول

Esmeralda said...

بمناسبه القطر و السوبر جيت

خد اول سكوتر و روح على بلوجى

اهلا بك يا عزيزى

عاااااااااااااااااااااااااااااااااا

,:(

Anonymous said...

نضيف ايه وبتاع فاضى ايه

ولا

باقولك ايه

امسح تعليقى يالا

امسح تعليقى

سكوت هنصوت said...

طيب...بجد مش لاقيه كلام بعد الي اتقال هنا..لو اتكلمت تاني عن يااااه شعر البنت يا راجل ..انا بقى الي هولع في نفسي..لإن تقريبا كل الناس هنا علقت عليه..لكن بجد انت فقري قوييي...عندك طريقة في السرد رائعة..و فعلا خلتني انسى همومي الحبة الصغيرين الي عديت فيهم عليك..اشكرك على حرصك على جعل المدونة صالحة للجنسين..حقيقي راجل محترم..و ما تشغيلش بالك بحوست..بكرة يعرف ان كده احلى..وانه في هنا ناس كتير جايز ما يعرفهومش لو البوست مش بالجمال ده..تسلم يا اباصيري

malak said...

ياااااه كل ده عملتوه تقطعوا شعر البنت بس كل كوم وفكرة البوتوجاز فوق السطوح ديه كوم تانى

بس بجد انا عندى اعتراض على الصورة بجد قلبت معدتى ياريت تغيرها

تحياتى

heba said...

أباصيري .. انت الوحيد اللي اهتميت وجاب نتيجة
شاكرين أفضالك يا فندم
معلهش دايماً تاعبينك معانا

شخبطة ملوكى said...

فينك يا ابصيرى مختفى ليه
شكلك عملت مقالب جديدة و معكوك فيها
طمنا

شجره الدر said...

لا لا لا لا
دانت مش نحس بس دانت نحس وفقر ونكد
ايه يابنى انت عامل معاهده صلح مع النحس
انا قريت الفضائح كلها بدأ من الجزء الاول
ولا املك تعليق
ألا ههههههههههههههههههه
ههههههههههههههههه
هههههههههههههههههههه
تحياتى

طهقان said...

طيب وحياة والدك

بلاش الصور المفتكسة دي

احسن بتفكرني بواحد صاحبي
وشه كله بقا دمامل

kaed said...

عزيزى الأباصيري
سورى إية النحس اللى ركبك دة يوم ما حبيت تسافر شكل حد من صحابك نق عليك
هاهاهاهاهاها سلام

أخف دم said...

الأباصيرى
توأمى فى الحظ النحس والذى منه
قريت البوست ميت مرة قبل كده وكب مرة أكسل اعلق من كتر الضحك .. قلت المرة أثبت حضور وانصراف بقى .. جايز كلامى يخليك تعبر الناس اللى جاتلك يا عم وترد علينا .. بس ع العموم أكيد انت مشغول ربنا معاك ويهوه عليك يا ريس.. ومستنيين العودة قريب يا جميل

الأباصيرى said...

أصدقااااااااائى حباااااايبى

معلش أتأخرت عليكوا كتيييير

بس أنا متأكد انكم هتفرحوا فيا، لما تعرفوا أنى كنت عايش أنحس أسبوع فى حياتى
وطبعا دة معناة بوست جديد ينضم لقائمة يومياتى
بجد كان أنحس أسبوع فى تاريخ العاااااالم

أدونى يومين بالظبط وأرجع أرد على التعليقات وأكتب البوست الجديد

Anonymous said...

يا عم
شيل ام الصورة اللي في صدر البلوج دا


دا ايه النكد دا
مش كفاية اللي عندي

shabfa2re said...

اين انت يا ابا الاباصير

šσяšαяαα said...

اهم الانباء فى عالم التدوين:
ــــــــــــــــــــــــــــــــــــــــــ

"مسابقه افضل موضوع"
http://best-post.blogspot.com/

"من أجل مدونات نظيفة"
http://5fadfada.blogspot.com/2007/04/blog-post_20.html

"تصميمات الشعار وأكوادها"
http://takhareef-sorsaraa.blogspot.com/2007/04/blog-post_21.html

ياريت تشرفونا وتشاركوا معانا فى المواضيع دى

وفى انتظار يوميات الاسبوع المنحوس:)

عاشقة الوطن said...

أباصيري
انت فين ياعم
وحشنا الحكاوى بتاعتك
والنحس اللى انت فيه
يالا بقي مستنينيك

Unknown said...

فين الجديد يابني؟

Anonymous said...

ههههههههههههه

شريف صبرى said...

http://2lm.blogspot.com/
بعد كل دة يحصل كدة والله العظيم

heba said...

فينك .. أباصيري فينك
الله يعينك

علي الالفي said...

و الله ليك وحشة يا واد يا اباصيري
ما اتقابلناش من زمن

ع الماسنجر طبعا
المهم
انت عامل ايه
يابني انا مش فاهم انت ممكن تكون عملت ايه بعد كل الافترا و الظلم ع البني ادمين ده

Anonymous said...

الجنان ده كلمة قليلة عليكوا والمصحف
والشيطان برئ من اللى انتو بتعملوه :)
انا حاسس ان الشيطان لو شاف الكلام ده
هيخاف لا تلبس فيه البلاوى دى والناس تقول دى بسببه

بس صراحة البت تستاهل :)

الوردة السوداء said...

انا قريت اول حكايتين
بجد ولله ضحكت جدا من قلبى

مش ممكن بالزات حكاية المقص دى

على فكرة انا بحىى صاحبك جدا

خلى البنات تتلم وتتحجب بقى

ههههههههههههههه

maioya said...

هههههههههههههه
فضايح فضايح يعني
بس حلوه حكايه القطر دي
وبيوت الطلبه بالذات بتبقي كلها
مشاغبات بس صراحه مشوفتش كده
ولابالطريقه دي ابدا

عاشقة الوطن said...

أباصييييييييري

انت فين يابنى
يارب تكون بخير احنا قلقانين عليك

ايه من كتر الفضايح اللى حكيت لنا عنها مش قادر تواجهنا تانى ولا ايه

ياأباصيري رد علينا وبلاش تقل بقي
بجد عاوزين نطمأن عليك
عشان غيابك طول اوووى

سلااااااام

منة الله said...

رامي

ادعوك للمشاركة في استطلاع راي

عن اكثر عشرة مدونات تاثيرا في قرائها

عل مدونتك واحدة منهم

اليك الرابط

http://www.6ef.blogspot.com/

OldCatLady said...

نيااااهاهاهاهاه....أول مرة ادخل البلوج بتاعك و بصراحة انا هقلب محل اقامتى على هنا...بجد شغل هايل و فضايح فى الجون...يسلم عقلك :)

Anonymous said...

هههههههههه يخرب كده يااباصيري انت اسمك علي مسمي صحيح ..زي مسرحيه العيال كبرت بالظبط وحيات ربنا عنيا خلصت دموع من كتر الكركره .. كمل يااعم كمل اما نشوف اخرتك ايه انت مصيبه

Unknown said...

شركة تنظيف بالدمام
شركة تنظيف منازل بالدمام
شركة تنظيف فلل بالدمام
شركة تنظيف شقق بالدمام
شركة تنظيف مجالس بالدمام
شركة تنظيف موكيت بالدمام
شركة تنظيف سجاد بالدمام
شركة عزل اسطح بالدمام

شركة الصفرات لتنظيف المنازل