Mar 5, 2007

خش على الفضايح برجلك الشمال جـ2ـ


أنا أتفضحت يارجالة

حرام عليكوا ياجماعة والله تعليقاتكم على الجزء الأول من الفضايح حسستنى أنكم ملايكة وأنى أبن البطة السودة اللى الكل عمال يضحك ويتريق علية
لية كدة ... دا أنا غلباااان وطيييب



معلش أنا أسف أنى أتأخرت عليكم.. بس أنا مزنوق فى الشغل
مش هطول عليكم ... ندخل على الجزء التانى من الفضايح


الواقعة الرابعة : الأباصيرى أمير الأنتقام

أولا أحب أعرفكم أنى عمرى ماكنت شقى أو مزعج وانا صغير
طبعا دة بخلاف شوية حاجات كدة زى المانجا ومية الغسالة اللى كانت فى الجزء الأول
:)
يعنى بأختصار أنا شخص مسالم جداً وأحب أعيش فى حالى
بس.... أتقى شر الحليم إذا غضب
يعنى من الأخر أنا طيب بس لو حد زودها معايا بقلب على شخص غبى
أة.. شخص غبى من اللى مبيفكرش
كل اللى بيبقى فى دماغى ساعتها أنى لازم أخد حقى حتى لو كان أخر يوم فى عمرى... يعنى أموت أسد أحسن ما أعيش أرنب

لغاية كدة حلو وتمام وزى الفل
نيجى عند بداية الفضيحة وبرضة كانت أيام الكلية فى سوهاج

كنت عايش فى بيت طلبة فية حوالى 150 طالب من كل مكان من أسكندرية لغاية اسوان
وكنت أول مرة أتعامل مع أشخاص معرفهمش ولاعمرى شفتهم
كان عندهم شوية مفاهيم غريبة بيتعاملوا بيها..يعنى
المؤدب = أهبل
المحترم = عبيط
المسالم = ضعيف
خدوم = خدام

وعلى المفاهيم دى أنا كنت أهبل وعبيط وضعيف وخدام
يعنى الأكل بتاعى كان بيتسرق من التلاجة
ممكن أدخل الأوضة الأقى واحد فاتح الدولاب بتاعى وبيستخدم الريحة أو كريم الشعر
الاقى واحد عايزنى أنزل أشتريلة حاجة من البقالة

بــــــس ستـــــوب

العالم دى شكلها مبيجيش بالأدب
والأحترام مش هيجيب معاهم نتيجة

وبدأت الأنتقام عشان أعرفهم أنى لما بقلب على حد ببقى غبى

الأنتقام الأول
كنت أيام أمتحانات الترم الأول فى سنة أولى وكنت مزنوق فى المادة ليلة الأمتحان وكنت لسة عامل جردل شاى عشان أعرف أركز وأذاكر
ودخل أحد الشباب ودار الحوار التالى

الشاب: رامى أنت بتعمل أية؟
أنا:يعنى بعمل أية!! بكرة الأمتحان أكيد بذاكر
الشاب: أنا زهقان مش عارف أعمل أية
أنا: غور فى داهية وأزهق بعيد عنى.. أنا عايز أذاكر
الشاب: طيب أنا زهقان .. أعمل أية يعنى
أنا: بقولك أية!! حل عن سمايا أنا عايز أذاكر
الشاب: من مش هسيبك النهاردة وأنا زهقان
انا: بقولك أية متخلينيش أتغابى عليك... أبعد عنى
الشاب: طيب مش ماشى

طراااااااااخ
ودلقت جردل الشاى فى وش الزبون وهو شغال يصوت من الشاى
وعمال يتنطط من السخونية
والشباب كلة خرج من أوضة ومش مصدقين أنى عملت كدة

الأنتقام الثانى
كنت برضة فى سنة أولى فى التيرم التانى وواحد قضاها معايا غلاسة ومش راضى يلم الدور
فقررت أعملها معاة وأديلة مقلب يطلع من عينية

الشخص دة كان نومة تقيل جدا فأستنيت لغاية لما نام ونطيت على الأوضة بتاعتة من الشباك اللى على الصالة وقمت عامل قراطيس ورق صغيرة وطويلة وحطيتها بين صوابع رجلية وولعت فيها النار وطلعت جرى من الشباك

وبعد شوية


أأأأأأأأأأأأأأة حريييـــــقة
وطلع يجرى ويصرخ فى البيت وهو مش مستوعب أية اللى حصلة
لغاية لما لقانى واقف.... وشباب البيت كلة بيضحك علية



الأنتقام التالت
واحد برضة كان بيسوق الهبل على الشيطنة معايا
وحاولت أبعدة عن طريقى مش راضى ومصمم يلعب فى عداد عمرة
وأصحابى قالولة بلاش رامى عشان مش هيسيبك فى حالك
مانا بقيت مشهور بقى..أستاذ ورئيس قسم المقالب فى البيت
وبرضة مش راضى يبعد عنى ويسيبنى فى حالى.. وجة اليوم الموعود

كان الزبون نايم على السرير وفى واحد صاحبنا بيذاكر على المكتب فى نفس الأوضة
والأخ دة كمان نومة تقيل فلقيتها أنسب وقت للمقلب
رحت كبيت شوية مية على السرير بتاعة وعلى البنطلون اللى هو لابسة وأتفقت أنا وشلة من الشباب أننا نقنعة أنة وهو نايم حصلة تبول لاإرادى هههههه

المهم قبل ما المنبة بتاعة يرن بخمس دقايق أتجمعنا عندة فى الأوضة وعملنا نفسنا بندور على حاجة لغاية لما صحى من الدوشة
وكان الحوار التالى

هو: اية الدوشة دى
أنا: مش عارف فى ريحة وحشة فى الأوضة
هو: ريحة أية يعنى؟
أنا: مش عارف شكلها جاية من الحمام
وفجأة..المنبة بيرن فحاول الواد ينزل من السرير عشان يطفى المنبة
وبعدين لقيناة تنح شوية ورجع مكانة تانى على السرير وأتغطى
ههههه شكلة حس أن البنطلون والسرير مبلولين ففهم المأساة لوحدة

أنا: أية يابنى مش هتنزل تطفى المنبة
هو: لأ شوية وهنزل
أنا: (بغلاسة) طيب أنزل أطفى المنبة صدعتنا
هو: لأ أطلعوا برة أنا عايز أنام
أنا: (بنفس الغلاسة) لأ قوم مفيش نوم
وقمت شادد الغطاء من علية وبعدين قولت
(بخبث) إإإف هى الريحة زيادة عندك هنا لية هههههههههه
هو: (بزعيق) أطلعوا برة بقى عايز أنام


أنا: خلاص ياشباب أنا عرفت الريحة منين.. تعالوا نطلع برة

وطلعت أنا وباقى الشباب فطسانين من الضحك علية وأنة شرب المقلب
وبعد شوية لقيناة خارج من الأوضة ودخل أستحمى وغير هدومة
وبعدين خد المرتبة وطلعها فى البلكونة

من ساعتها خليتة مسخرة فى البيت
ويحياااااااا الأنتقااااااام



الأنتقام اللى بعدة
كنت ساعتها فى بداية سنة تالتة كلية وكنت كونت شلة زى العسل وبيموتوا فى المقالب وكنا مقضينها أفترا على خلق الله
المهم قررنا نبدأ السنة بمقلب جديد فى طلبة سنة أولى الجداد

فأتفقنا مع أتنين من أصحابنا فى الكلية وعملنالهم تصريح أنهم يباتوا معانا بالليل فى البيت
وأصحابنا دول كانوا أجسام بودى جاردات وشكلهم رجالة مش شباب
المهم فى نص الليل بعد ما المشرفين بتوع البيت روحوا
نزلنا على أوض العيال بتوع أولى كلية الجداد ورزعنا على الباب لحد لما قاموا من النوم مفزوعين وفتحوا الباب وهما خايفين
ودخل أصحابنا وقالولهم أحنا بوليس.... طلعوا بطاقاتكم
وفى الخلفية ماسكين واحد على أساس أن معهوش بطاقة وشغالين يضربوا فية

فالعيال خافوا وطلعوا البطاقات بتاعتهم وأدوها للى عامل ضابط
قام واخد البطاقات منهم وبص فيها وبعدين رماها على الأرض وشدهم من هدومهم وقالهم تعالوا على البوكس
والعيال هيموتوا ومش فاهمين أية اللى بيحصل ولية الضابط عايز ياخدهم على البوكس!! وقعدوا يتحايلوا علية يسيبهم وأنهم معاهم بطاقات وخلاص شوية وكانوا هيعيطوا عشان مياخدهمش على البوكس


وفجأأأأأة.. عرق الشهامة ضرب وأدخلت أنا وأصحابى ومعلش يافندم دول تبعنا وأصحابنا وهما كويسين ومش وش بهدلة وأقسام
والحمد لله الضابط وافق وسابهم عشان خاطرنا والعيال قعدوا يشكروا فينا لاننا أتوسطناهم عند الضابط ووافق يسيبهم
لوووووووووووول
الواحد برضة يعمل الخير ويرمية البحر
ولازم نساعد أصحابنا
وتعيش الشرطة لخدمة الشعب


طبعا فى مقالب كتيييييير ... دول 5 سنين من المقالب اللى ورا بعض

بس دة اللى صالح للنشر لان الباقى فضايح بجد ومينفعش تتكشف على حريمات


برضة عشان زحمة الشغل كفاية فضيحة واحدة النهاردة
وأستنونى فى الجزء الثالث من الفضايح

.....فأبقوا معنا.....

79 comments:

يا مراكبي said...

أنا جيت أقف في أول الطابور قبل الزحمة .. وبعدين هأقرأ براحتي .. المهم أثبت حالة الأول

الأباصيرى said...

ياعم انا لسة مطلع البوست حالا
ولسة بعدل فى شكلة

أنت لحقت تقف فى الطابور


طيب قولى اية رأيك
مادامت أول واحد فى البوست

يا مراكبي said...

بس .. أنا كده لازم أحرص منك .. دي مش مقالب .. دي أفلام عايزة الأوسكار

إنت ما إشتغلتش مخرج سينيمائي ليه؟ كنت هاتعمل أفكار أحسن بكتير من الهبل اللي بنشوفه اليومين دول

أنا بعد كده لو لقيت تعليق ليك عندي في المدونة .. هأخاف لحسن يكون فيها مقلب ولا حاجة

تحياتي .. وإستنى بقى الجرسة لما الباقيين ييجوا

Hannoda said...
This comment has been removed by the author.
Hannoda said...

هي الصورة مقلب لوحدها

بس ايه القلب الحجر ده :))
وقعدت تقولنا قلبي طيب و بتاع..


بس كله إلاّ مقلب السرير.. ده بقى تحححححفة

حرام عليك زمانه بيكره نفسه كل مايفتكر الموقف

مقالبك جامه ..ربنا يكفينا شرك يا عم
:))

الكلام نوعان :كلام فارغ وكلام مليان كلام فارغ said...

الواحد لازم يعملك الف حساب بعد كده ويخاف منك يا عم
تحيا الاباصيري
الاباصيري يا يعيش
ابقى اعملك علم يابنى هوه الواحد مستغنى عن روحه

Anonymous said...

يا لهوي ده إنت وش فضايح بحق و حقيقي

يا ترى ايه الفضايخ اللي إنت عاملها في الشغل

ربنا يستر منك

بس عندي سؤال : إنت بتجيب الصور الحلوة دي منين؟

كراكيب عادل said...

مقالب مقالب مقالب

اباصيري يكتب فضائح يا عم دي مش فضايح ولا حاجة انت لية سمتها فضايح بكدة انت هتفضح نفسك اختارلها اسم غير فضايح يعني مثلا جرسة


انت مبتجيش لية

تحياتي

khaled said...

ايه ده يا ابنى
انا صوتى اتنبح فى البوست اللى فات
اقولك انا هاستنى البوست اللى جاى علشان لما افضحك يبقى افضحك بالجملة
ههههههههههههه

أميرة said...

هههههههههههههههه

يخرب شيطانك كل دة ومسالم

؟؟؟؟؟؟؟؟؟؟؟

Anonymous said...

هه

أميرة البلطجية said...

ههههههههههههههههههههههههههه
فزيييععععععععع المقلب بتاع الميه
والله صعب عليا موووت
يا عيني
بس عمل ايه لما اكتشف!!
الله يكون في عونه صراحة
انت مصيييييييييبة

halwasa-masrya said...

هههههههههههههههههه
هههههههههههههههههه يا رامى ... موقف البيبى ده جامد موت انا هعمله مع اخويا الكبير عشان هو خنيق

مصر هى أمى said...

ايه يا بنى المصايب ديه
دلوقتى انا متاكد ان سواق الميكروباص كان فى الاصل عفريت وطالع يعمل فيكوا مقلب اما لاقاك قال لا ده الاباصيرى دا الريس بتاعنا مقدرش اقرب منه

Ma 3lina said...

يخرب عقلك ايه المسخرة دى انا اول مرة اخش عندك بس قريت اخر بوستين بتوع المقالب

بس حرام عليك الولد بتاع المياة و السرير دا

الصورة تخفة اوى انت معاك توكيل الصور دى و لا ايه

الدبور said...

جامده يا اباصيري
يخرب عقلك
بص اخوك يموت في المقالب احنا ممكن نعمل دويتو سوا هايل

عاشقة الوطن said...

أباصيري

بجد بجد يخرب عقلك
ايه المقالب ديه كلها
وبتقول انك مكنتش شقي

انت فظيع يابنى
ربنا يكون فى عون اصحابك ياعمنا
بس عسل اوى المقالب ديه يابنى

hebaz said...

مين ده ألى مسالم ده
أنت جبت الأفكار دية منين؟؟؟؟؟
حرام عليك الولد بتاع مقلب السرير دة! يا رب يقرا البلوج دة
دة زمانة يا عينى عندة عقدة:(

vision said...

وسعووووووووووووووووووووووووووووووووو
انا جيييييييييييييييييييت
يحظظظظظظظظظظظظظككككككككككك يا رامى..دنتا طلعت طيب اوى
--------------------------
على فكره خالتى بتسلم عليك وبتقوللك عاوزين ندفع مصاريف القسط التانى بتاع مدرسة حماده الواد العيال بيعايرو وعمالين يسألو فين ابوك يا واد

الأباصيرى said...

يامراكبى

لألألأ أفلام أية وبتاع أية
أحسن حاجة لما يبقى الموضوع لايف

تصدق ممكن أعمل الكاميرا الخفية


أنا حطيب كومنت عندك خلى بالك عشان مكهربة

مستنى بقيت فريق التريقة الوطنى
للشماتة والتأليس

أستنى الجزء الثالث

الأباصيرى said...

Hannoda

دانا غلبااااان

طيب أعمل أية مش هما اللى كانوا بينكشونى

وبعدين موضوع السرير دة مش أى فضيحة
دة الواد صعيدى ومن قنا

يعنى فيها دم

الأباصيرى said...

الكلام نوعــان

أنا هعملكم نشيد وطنى وهصمم علم
وكل يوم الساعة 9 الصبح
كل المدونين تجمع عندى وتدينى تمام

مازلت مصر... أنا طيب أنا مسالم

بس معلش حب المقالب دة أدمااان

الأباصيرى said...

anima

خلى بالك يا أباصيرى
دى بنوتة.. أة مش عايزين فضايح

لأ لسة معملتش فضايح فى الشغل
لما أعمل مقالب جديدة هقولك

أما بالنسبة للصور دى
أنا واخد توكيلها
زى أديداس بالضبط
ههههههه

طيب أستنى الصورة بتاعة البوست اللى جاى

الأباصيرى said...

كراكيب عادل

ههههههه تصدق تسمية مبتكرة

أنتو ليو مش مصدقين أنى طيب وأبن ناس كويسة

أنا جيت
أبقى تعالى أنت

الأباصيرى said...

Khaled

صباح الخير ياعم
جملة أية وقطاعى أية
أنت واقف فى بقالة!!؟؟
:)
أية الناس دى.. هما بيكرهونى كدة لية
وكلهم مستنيين أتفضح...



راعينى شوية ياعم.. أحنا بلديات برضة


:)

الأباصيرى said...

أميرة ويلـز

ويلز ياويل..ويلز ياويل

شيطانى أستقال
وقالى مقدرش على حركات الشياطين بتاعتك دى

منورة يا أميرة

أمال فين التشريفة والعنننن

الأباصيرى said...

نبيـذ

لألأ كل دة تعليق
وتاعبة نفسك كدة لية
:)

طيب هعتبر الموضوع خير الكلام ماقل ودل

الأباصيرى said...

أميرة البلطجة

أنتى كنتى عايزاة ينطق بعد كدة؟؟
دا أكسرت عينة خلاص
أصل الواد صعيدى

يعنى الموضوع لو أتنشر هيبفى فضيحة لعيلتة كلها


م الأخر هتعمليلى بلطجية
هضربك مقلب وأفضحك وسط البلوجرية

صباحوا إجرام يابرنسيس

الأباصيرى said...

هلوسة مصرية

لو أخوكى بيلعب جيم او حديد
يبقى بلاش أحسن عشان الاصابات

ولو مصممة تعمليلة المقلب دة
أبقى حطى ملايات على العفش
عشان الدم اللى هيطرطش

هههههههههههه
قوليلى هو بيعمل اية فيكى؟
وسنة أد أية؟

وأنا أمخمخلك فى مقلب لذيذ

الأباصيرى said...

مصر هى أمى

يعنى كدة اصدق أنى بعرف أعمل مقالب كويسة
:)
يارافع معنوياتى

لأ موضوع الجبل اللى فى البوست اللى فات
لايمكن يتعوض

منور

الأباصيرى said...

ma-3lina

وانا اقول الموضوعين منورين لية؟
:)

الواد بتاع السرير هو اللى بدأ معايا
والناس نصحوة بلاش يلعب فى عداد عمرة معايا
بس هو مسمعش الكلام
يستاااااهل

أتمنى اشوفك هنا دايما

الأباصيرى said...

الدبور

زى الفل
كدة بقينا 3 بتوع مقالب
أنت وكراكيب عادل وأنا

بس فين السيرة الذاتية للمقالب بتاعتك

لايجوز قبول أعضاء جدد بدون أبراز شهادات الخبرة
:)

منور يابو الدبابير

الأباصيرى said...

عاشقة الوطن

هو انا كدة أبقى شقى؟؟

أمال الحاجات اللى مينفعش تتحكى لو حكيتها هتقولوا عليا اية !!! إبليس

بس بذمتك مش أنا مسالم
ههههههه ضحكة شريرة :)

الأباصيرى said...

Hebaz

أنا اللى مسالم.. أية مش باين بقى ولا اية؟

دا أنا ككوووووت صغنن

وعمرى مابعمل مقالب فى أصحابى

وبعدين الواد بتاع السرير عرفناة أن الموضوع مقلب وكان هيموت لما عرف ووشة أتنفخ وجاب 100 لون

بس خدنالنا كام شتيمة محترمة بعد ماعرف

الأباصيرى said...

Camera Girl

هيييييية
فى حد قال أنى طيب
معلش يابنتى الناس اللى فوق دول كانوا بيقولوا عليا مفترى

نصفتينى إلهى ينصفك من وسط العوانس :)

ميمو هتيجى تضربنى على كلمة العوانس دى
هههههههه



قوليلهم أبوة كلتة القطة
أوقوليلهم شاحح اليومين دول من السوق

على العموم أنا بعتلك مع أم شكرى عشرة جنية وكرتونة بامبرز
أياكش يتمر

؟؟؟؟؟مين حمادة دة ؟؟؟؟؟

Haitham Abu Akrab said...

انت ياعم انت
مجدي موجود

؟؟؟
ههههههههههه

دمك عثل حتي وانت صغير

باركلي انا رجعت

Unknown said...

ايه ده يعني بعد ماكنت ملاك وطيب, بقيت أستاذ ورئيس قسم في المقالب.
يعني احنا لازم ناخد بالنا بعد كده, في انتظار الجزء التالت وياريت ماتتأخرش.

smraa alnil said...

انا سمعت عنك كتير
فقلت اشوف اللي بيحكولي عنه دة
لقيت تحفة
ايه يا عم المقالب دي
ههههههههههههه
دة انت كدة غلبتني بقي في موضوع المقالب دي

بس بصراحة الواد تاع المايا دة شكله وحححححححححححححححححححش
انا لو منه اروح انتحر احسنلي

Sou said...

Ye7'reb 3a2lak daa enta mas7'ara we elwa7ad lazem ye7ars menakk. Begad shokran la2nak da7aktenee. This is my first time here and certianlly would not be my last.. Peace

كراكيب عادل said...

انت بتعلقني يا عم ولا اية

مش انا ضفتك لية انت مبتجيش برضو

هو ايه الحكاية كل شوية انا اجي


مخليني فاتح المسنجر ومستني طلتك

أخف دم said...

أنا مش فارق معايا المقالب دى .. اللى انا عايزه المقالب اللى ماينفعش تتحكى لحريمات .. هيه دى الاهم..
اعملها ف بوست وشفر البوست يا عمنا..

Shreef said...

و الله انت راجل تمام بس براحة على الناس شويه يا عم دا المقالب ديه ممكن تجيب عقد نفسية بس و الله دمك خفيف و خصوصا الجزء الاول في الحتة بتاعة الكلاب دا انا فطست من الضحك يا ابني و انت بتقول اتناشر لمبة مشيين جنب بعض و بعد كده كل لمبتين مشيوا لوحديهم يخربيت عقلك..سلام

شيماء الجيزى said...

الأبـــــــــــاصيرى :d

ايه ده يا بنى ...ده انت محترف فضايح

كنت هقولك يخرب عقلك بس لقيت كل البشر كتباها :d

انا اول مره ادخل البلوج بتاعك بس فعلا

ليك نوادر وفضـــــــــايح ملهاش حل

اشوفك بقى فى الفضيحه الى بعد كده

نسيت اقولك ايه ...اه هو انت الى مخترع قراطيس النار دى :(

مقلب الميه حلو موت يعنى
وجردل الشاى ...ده انت خطر كمان
حرقت الواد
يا مفترى
هستنى البوست الفضيحى الجاى

Nadine Alfred said...

بيتهيألى بقى بعد الحكاوى اللى حكيتها دى
محدش يقدر يشكك فيك
طيبة ايييييه
و حنية اييييييه
و قلب ابيض ايييييه
لأ
و فوق كل ده
انسان مسامح من الدرجة الأولى

دمك خفيف يا عم اباصيرى
بس مقالبك تطلع من النافوخ

سلام يا راجل يا طيب :P

soosa el-mafroosa said...

دماغ
دماغ
دماااااااااااااااااااغ

يا بني حرام عليك الشباب اللي زي الورد تقطع خلفهم كده

بص أكيد اللي انت عملته ده قبل موقف الكلاب بتاع البوست اللي فات
و ده كان انتقام السماء

تحياتي

و ربنا يكفينا شرك

koukawy said...

loooooooooooooooooooooool
يا تري مع كل المقالب دي بتلاقي وقت تفكر في المذاكره جنب المقالب
هو فعلا في ناس متجيش غير بال 000 و لا بلاش خليها بالمقالب

الملاح التائه said...

مساء الجمال يا أبصيرى
شكلى هابقى زبون عندك هنا
بزمتى إنت زي العسل
وجامده قوى الزنبه الحلزونيه بتاعة الميه اللى على السرير
اشتغاله فى الجون والزبون صدق
ههههههههههههههههههه
بونوى يا اباصيرى

متغيرة شوية said...

منك لله موتني من الضحك
كان لينا واحدة صحبتنا بلوجراية كاتبة يوميتها في بيت الطالبات وكانوا يشبهوا لبتوعك كده ، بلاش اقول مين علشان البنت متقولش اني بسيحلها

بس انا قريت الجزءين الاولانيين ومستنية التالت

SomeOne said...

الوووووووووووووو

بقى اول مرة ازورك اتصدم بالصورة دي

انا بصراحة كنت ناوي اطلع تاني

بس مقدرتش طبعا

وقولت اسالك عن حكاية الصور اللي تطفش دي

:)
:))

تحياتي

david santos said...

جيد الاسبوع

Nohaz said...

انت بتجيب صور الواد ده منيين
يالا
5 سنيين ليه انت هندسة ولا كنت من بتوع الاعادة افادة؟؟؟

بكرة عيالك ان شاء الله يطلعوا عليك الي بتعملوا في الناس

سلسبيل said...

هههههههههههههههه
حرام عليك انا كنت حموت م الضحك
ايه ده
وعلي راي محمد سعد علي مااذكر..هوه ده ذل الانسان لاخيه الانسان
بس سيبك انت
ايه الصور الشديده دي
رقيقه جدا هههههههههههه

heba said...

يا أخي ايه الصور اللي انت بتحطهالنا دي .. انت هتعمل فينا المقالب بتاعتك يعني كل ما اجي افتح مدونتك ابقى خايفة من الصورة اللي هتكون حاططها واول ما الصفحة تفتح بدور وشي علطوووول .. لأ بجد الصور مؤذية

والله أنا خايفة كل ده يطلع عليك في الآخر ده انت طلعت حكاية ودماغك مزيكا خالص

طب سؤال بقى : يا ترى يا هل ترى انت بتقول للي بتعمل فيهم المقلب انه كان مقلب ولا بتسيبهم كده ؟ شكلك بتعيش الدور وسايبهم على عماهم

ده لسه التقيل جاي ورا

الراقـــص مع الذئـــــاب said...

فكرتني بأيام الغربة في شقق الطلبة
بس مكنش فيها انتقام
كانت مراهنات
كان اصعب رهان فيها هو التغلب علي القرف...يعني هنشوف مين اكتر واحد مش هيقرف في موقف معين
وصمد في الرهان انا وواحد بس للنهاية
العند وحش اوي
انا مش عارف انا كنت بعمل كدا ليه
بس عشان متغلبش وخلاص
طبعا مش هحكي تفاصيل الرهان
عشان بجد بجد بجد
محدش يستحملها

بس كانت ايام حلوة.....ياريتها دامت
من غير مراهنات


مدونتك لذيذة جدا
تحياتي لك

Unknown said...

الجزء الثالث بقي ربنا يخليك, اتأخرت أوي.

hebaz said...

الفاصل طول شوية ولا أيه؟؟
شكل الى عملت فيهم مقالب مسكوك :)

الأباصيرى said...

هيثم أبو عقرب

أبو العقاااارب فينك ياراجل من زمااان

أة على فكرة مجدى عدى عليا الصبح وقاللى خلى هيثم يقول لمحمود أن الحشيش هيغلى اليومين الجايين دول

:)
قابل بقى

الأباصيرى said...

esraa

معلش يابنتى اللى يعيش فى شقق الطلبة لازم يكون حاجة من اتنين
ياشيطان وياخد حقة
ياملاك ويتاخد منة حقة

وأنا أخترت أعيش هناك شيطان
بس بجد أستفدت خبرة فى التعامل بمليوووون سنة

الأباصيرى said...

Smra elnil

أمممم
وياترى قالولك عنى أية؟؟
ومين اللى قالولك؟؟

على العموم فضايح ومقالب الولاد لازم تكون أشد ألف مرة من مقالب الولاد عشان تحوق فينا

أنا قريت موضوعات كتير عندك وعجبنى أسلوبك... تاخدنيش معاكى فى اللقاء التالت بتاع المدونين

الأباصيرى said...

Sarah

الله يخليكى يابنتى
دة أقل واجب الواحد يقدمة لاصحابة اللى ساكنين معاة

وأنا مبسوط أنى عرفت أضحكك
وياريت أشوفك دايما

الأباصيرى said...

كراكيب عادل

أدينى دخلت الماسنجر واول لما شفتنى قعدت تضحك بهستيريا

ينفع كدة
:)

الأباصيرى said...

أخف دم

هقولك على الفضايح اللى مينفعش تتقال للحريمات
وأدينى شفرتها أهه
ورينى شطارتك بقى

1د8ِ4چ»ZمXs§ـي؟¥غْ6‏û’SjUjب¸ٹ·Uau®w©;@¨ ~–¾وïِ3َس»&عث[e/'‚Xزàa†×m‏Xô؟K³ق’› ْïے Agَ~§و}/ûڈüçَے ّü2I!ےذôûœرY—÷ا÷*—Yژج†zظخkطwپc[§ïûw3غs=Z؟ù³,‌Gp…muش_`ئك؛m°†µإإ¢فê~âHE`g¤‎‎Ceڈس¹¾ک-ق•ژnيû؟Icے ًUظé{فSluژ9ِ0S´<~Œ1¤؟s÷Wô‎ں¾¥kIkأ0÷ض4†m±¤‡?›قح؟ُِVإ(w¥gê؛5غ‎6يفي°>·og¹¶„³َظê$¦ا„2¼ïQِںPû«%ؤ´Y½چغ·c«‎'èڑ‍Œwµ•²ى³p‡ج†·شk½¬ـ[‏ڈwسoسC¸Zِ<»ط2Géknئ?`ِm²كP1ِmwْo ‰·:ë„\êِ2CY.غVçm^ؤ”µخ

الأباصيرى said...

Shreef

منور ياباشا

والنبى متفكرنيش بموضوع الكلاب دة
دى عقدة نفسية وبجد بخاف من الكلاب لحد دلوقتى

نورنى دايما عشان تشوف الجديد

الأباصيرى said...

r2k

يارااااجل
:)

مش فاهم حاجة بس هعتبر الموضوع عجبك

ههههههه

الأباصيرى said...

شيماء الجيزى

موضوع قراطيس النار دة سمعت أنة حصل قبل كدة فى البيت وقولت أجربة فى الواد دة وبجد عمل شغل ممتااااااز
كان نفسى تشوفى وش الواد وهو قايم من النوم وبيحسب أنة أتحرق

كان مسخخخخرة

وبعدين هى جت عليكى فى موضوع يخرب عقلك
البشر بقالهم قرن بيسبولى فوق
:)

مستنيكى هنا دايما

الأباصيرى said...

nadine

دا أنا ملاااااااك
بس نسيت الأجنحة والهالة البيضا فى الدولاب
:)

بس أنا عمرى ماعملت مقالب فى حد قبل ما اروح بيت الطلبة

معلش الشباب بيبوظوا بعضيهم بقى

الأباصيرى said...

soosa el-mafroosa

موضوع جردل الشاى وموضوع قراطيس النار كانوا فعلا قبل أنتقام الكلاب

عندك حق

بس المشكلة


أنا عملت مقالب منيلة بعد كدة
وأنتقام السماء بتاعهم هيكون رهيييييييب

ربنا يستر
عايزك تشرفينى هنا علطول

الأباصيرى said...

koukawy


كوكو الكميل منور الفضايح بتاعتى

وبعدين المذاكرة كانت بتتأجل للشهر اللى قبل الأمتحانات علطول
والحمد لله كنا بننجح وبتقديرات عالية كمان

على فكرة التفكير فى المقالب بيساعد على التفكير المنظم

الأباصيرى said...

الملاح التائة

ياااة أخيرا وصلت ياعم
أنت شكلة تاية عنى بقالك كتير

موضوع المية على السرير من أحلى المقالب اللى بحبها
مكنتش متصور أنة هيصدق أوى لدرجة أنة يطلع المرتبة فى الشمس


خليك زبون مستديم هنا وعلى ضمانتى الفضايح اللى جاية

تمام

خمسة فضفضة said...

السلام عليكم ورحمة الله وبركاته

ههههههههههههههههههههههههههههههه
حرام عليك موضوعين هنا كمان وهاينقلوني علي الانعاش من كتر الضحك
ههههههههههههههههههههههههههههههههههه

الأباصيرى said...

متغيرة شوية

بجد قوليلى على المدونة بتاعتها
عايز أشوف فضايح الولاد أكتر ولا فضايح البنات

صيحيلها ولايهمك

الأباصيرى said...

شادى فايد


لأ مفيش حاجة دول البوبى جارد بتوع البلوج

سيكروروتى يعنى عشان الامان والمنظرة
متخافش دول مستأنسين

الأباصيرى said...

Nohaz

أقرى التعليق اللى فوق دة وانتى تعرفى صورة مين دى

لأ أنا مش هندسة وانا بلافخر تجارة
بس بحب التعليم قوى فقولت أقعد شوية فى الكلية

الأباصيرى said...

سلسبيل

لأ فى عرضك بلاش تموتى فى المدونة بتاعتى
أتفرجى على البوست الجديد وبعديت أتكلى على الله وأتوفى
:)

فعلا يابنتى
دة ذل الأنسان لاخية الأنسان

الأباصيرى said...

Shams

ياجماعة الصور دى أليفة متخافوش منها
دى لزوم الأنفراد والتميز بس

وبعدين اللى بعمل فيهم المقالب غالبا بقولهم بعدها بفترة
يعنى بعد ما أخلص تريقة عليهم بقولهم على الفيلم من اولة لأخرة

وبعدين أطلع أجرى
:) ههههههههه

الأباصيرى said...

الراقص مع الذئاب

أعتقد انى عارف المواقف اللى بتحكى عليها
كنا بنعملها فى الأكل وفى الشاى
بس اللى كان بيقرب من الحاجة بتاعتى كنت بنفجر فية وأطلع القديم والجديد على جتتة


بس بجد بجد
مفيش أحلى من أيام الكلية وبيت الطلبة

الأباصيرى said...

esraa
Hebaz

معلش اتاخرت عليكم لظروف خاصة

الجدييييييييييد وصللللللللل

الأباصيرى said...

خمسة فضفضة

متخافيش محدش بيموت ناقص عمر

وعشان أثبتلك اقرى البوست الجديد ولو موتى من الضحك تبقى نظريتك صح
وهعملك تمثال فى ميدان عابدين جنب بتاع الكشرى
أستبينا يا أسطى

سالي محمد said...

ههههههههههههههههههه عارف اجمل حاجه انى فى مدينه فى المنيا برده وعشت وشفت الهم ده كله بس الهم اللى فطسك ده بكانى كتير برده بجد مش عارفه ابطل ضحك