حد يجاوبنى يا أخوانا
ياصباع الخير والجمال على أى حد معدى على البلوج بتاعى
بصوا يا أخوانا بصراحة وبالعربى كدة أنا زهق وطهقت
كل ما أسأل سؤال محيرنى يطلعلى 1000 واحد ويعملولى حلالين المشاكل والعقد
وأن هما لو أخدوهم فى مجلس الأمن كان زمان العالم بقى زى الفل ومفيش مشاكل
دة طبعا ً قبل ما أرزعهم السؤال التمام اللى محيرنى..... بس بعد لما أسأل الوضع بيختلف
الرد بيكون كالأتى: يااااااااااة هو دة بقى السؤال اللى مغلبك ومطلع عينك
تصدق أنك هايف وأسئلتك أهيف منك.... على العموم أنا مستعجل دلوقتى ولما أرجع هجاوبك
هههههههه وأدى وش الضيف يا أخوانا... أسأل وأسأل ومحدش معبر أهلى ببصلة
فمن الأخر كدة قولت مفيش حل غير أنى أكلم نفسى وأسأل أخوانا البلوجرية وأخوانا اللى على النت
يمكن حد يحن عليا ويريحنى من دماغى اللى أتملت أسئلة من غير أجوبة
عشان أنا وصلت لمرحلة جديدة: كل ما أسأل سؤال جديد تطلعلى الرسالة دى فى دماغى
Error 9999
The Dma3' you have Requested is Full
Please Delete some Question and Then Try Again
يالا هاتكل على الله وابدأ الأسئلة بس ياريت مسمعش جملة الأسئلة هايفة وأحنا مستعجلين
س1: لية بنعيش مادام هنموت
س2: لية بنحب مادام بننجرح
س3: لية محدش بيختار أهلة
س4: لية الحياة دايما ظالمة معانا
س5: من جة الأول؟؟ الفرخة ولا البيضة
س6: لية لازم الكبير اللى يبقى على حق
س7: لية الشعب المصرى بقى جبان أوى كدة
س8: لية لما تتوة وأنت سايق بتطفى الكاسيت بتاع العربية وتفتح القزاز
س9: لية أيامنا بقت زى بعضها؟؟ بكرة زى أمبارح وهو نفسة بعد بكرة
س10: لية لازم الولد هو اللى يتقدم للبنت مش العكس؟
س11: لية لما نتخرج جديد ونطلب شغل يقولولنا عايزين خبرة
س12: لية لما البنت توصل 30 سنة تبقى عنست، والولد لما يوصل 30 سنة يبقى عز الشباب
س13: لية لما ضابط يقبض على حرامى يطلعوا صورة الضابط فى الجورنال ويقولوا دة بطل..... مش دى شغلتة بردة زية زى الزبال
س14: لية بنقعد فى الكلية 4 سنين (على الأقل) ندرس فى حاجات ملهاش دعوة بالحياة العملية
س15: لية دايما اسأل سؤال الأقى الناس مستعجلة
تعالوا بقى وراجعوا نفسكم.. كام مرة قلت دى أسئلة هايفة زى اللى كاتبها وبعدين لقيت أن أجاباتك للسؤال مش مقنعة
طبعاً دى مش كل الأسئلة بس دى عينة منهم عشان بس أقدر أحط شوية أسئلة جديدة فى دماغى من غير الرسالة اللى بتطلعلى
يا لا بقى نتقابل فى بوست جديد أنشاء الله
بلوجرية أأأأأأأأأننننصراااف
4 comments:
انا هاجاوبك على كام سؤال على ادي
1- بعيش عشان نعمل اللي بنعمله في حياتها بالظبط زي ليه بتاكل مادام هاتخرج اللي كلته ده تاني في النص بيحصل تمثيل غذائي برده حياتك عبارة عن تمثيل يساعد-ولو بقدر قليل- في التطور البشري والحضاري
2 - كونك بتنجرح ده سببه انك ماعرفتش تحب لكن مش كل الناس بتنجرح اللي غلط بس في تطبيق استراتجية الحب هما اللي بيتجرحو
3 - ماحدش بيختار اهله عشان بيبقي صغير اوي ساعتها فاولا ماعندوش قدرة على الاختيار الصحيح ثانيا ماعندوش وقت يستعرض فيه كل المتقدمين لشغل وظيفة ام لانه بيبقي جعان اوي
ثالثا اشك بصراحه انك من السهل تستحمل طفل صغير -حديث الولاده- مهمته في الدنيا يرضع ويصرخ ويسهل ويغرقك كل شوية بالخيرات اياها لو ماكانش ابنك
4 ياسيدي الفاضل انت ليه بتجيب مشاكلك الشخصية وتعممها على الكل
الحياة مش ظالمة مع كل الناس والدليل بسيط جدا
انك مادام مظلوم يبقي في ناس ظالمينك ودول الحياة بالنسبة ليهم مية فل وعشرة
يعني مثلا الظابط اللي يتنطط على المواطن مبسوط جدا في شغلته
ورجل الاعمال اللي عنده عشرتلاف عامل مبسوط بفلوسه
وده كمان ليه سبب هو انك دايما تبقي شايف ان في وضع احسن من وضعك فتبتدي تتحرك عشان تحسن وضعك وبالتالي تحسن من عملية التمثيل البشري بتاعتك
ده شيئ منطقي جدا ومع ذلك يا سيدي سؤالك مش هايف اوي
6 - الكبير دايما على حق لانه شاف اكتر منك وعاش اكتر منك وبالتالي هو عنده خبرة في ماكينة الدنيا اكتر منك ودايما المعلم بيعلم الصبي
بس ده لا يمنع ان الصبي يكون بيفكر بطريقة مختلفه
بس دي الحالات الشاذة-العبقرية او المتخلفة - بس
كفايا عليا لحد كده انا مجاوب اكتر من تلت الاسئلة خصوصا اني مش عارف اجابة السؤال اللي جاي
Luay
منور المدونة
كلامك فى مجملة جميل ومعقول مقدرش اقول حاجة عنة
بس فى الأجابة 4 ياعم أنا بتكلم عن الشاب العادى اللى زيي وزيك مش الضابط ولا صاحب المصنع لان دول لو مش مبسوطين أنا ممكن أنتحر بكرة الصبح
ممكن أشارك في المسابقة؟
أولا .. إحنا بنعيش الحياة علشان دي فترة الإختبار اللي لازم نعديها وهي فترة مؤقتة طالت أم قصرت .. السؤال كمان مش مظبوط وكأن السؤال بيقول إن الحياة مالهاش لازمة مادام آخرها موت
ثانيا .. زي السؤال اللي فات .. كأنك بتقول إن الحب مالوش لازمة مادام آخره جراح .. مش كل الحب آخرة جراح .. فيه حالات حب كتير ما بيبقاش فيها جراح
ثالثا .. من الناحية البيولوجية ماحدش بيختار أهله علشان بيتولدوا قبليه .. ومن الناحية العملية ممكن أي حد يختار أهل تانيين ويعتبرهم أهله بس بشرط يكونوا موافقين
رابعا .. مش دايما الحياة ظالمة معانا .. ولو حصل ظلم بيبقى جزء من الإختبار اللي إحنا فيه
خامسا .. في بداية الخلق كانت الفرخة الأول .. وكذلك كل الكائنات .. بدأ الخلق بزوجين شابين من كل شيء وبعد كده بدأ الإنجاب بأشكاله المتعددة حسب نوع الكائن
سادسا .. مش لازم الكبير في العمر يبقى دايما على حق .. ده مبدأ خطأ .. لكن الكبير في الحكمة هو اللي دايما على حق
سابعا .. الشعب المصري بقى جبان علشان كل واحد بقى أناني ومايهموش صالح الجماعة .. إن الله لا يغير ما بقوم حتى يغيروا ما بأنفسهم
ثامنا .. طبيعي لما تتوه وإنت سايق إنك تسكت كل الحاجات اللي بتأثر على تركيزك .. وبتفتح القزاز علشان تنعش نفسك لأنك طبيعي جسمك بيسخن لما حاجة غلط تحص لك
تاسعا .. الأيام بيتغير شكلها حسب النشاط اللي بنعمله فيها .. الكسل هو اللي بيخلي الأيام شبه بعضها
عاشرا .. السبب في إن الولد هو اللي بيطلب البنت علشان الحياء و القوامة وكرامة المرأة في الإسلام التي أوجدها الله تعالى .. لكن في الدين ممكن البنت هي اللي تطلب الولد بطريقة غير مباشرة مثل زواج الرسول صلي الله عليه وسلم من السيدة خديجة .. ومن الممكن أن يطلب ولي أمر البنت الرجل للزواج مثل حالة سيدنا شعيب عندما طلب من سيدنا موسي أن ينكحة إحدى إبنتيه
إحدى عشر .. فيه أماكن كتيرة بتطلب حديثي التخرج لتشكيلهم
عل حسب منهج الشركة .. وده موجود في أغلب الشركات المحترمة لتربية أجيال جديدة تترقلى وتبقى مفيدة بعد كده
إثني عشر .. موضوع إن العانس بعد سن التلاتين دي حاجة من المجتمع الشرقي الغريب .. يمكن بسبب موضوع مشاكل الإنجاب بعدد السن ده .. لكن أي حد يقدر يتجوز في أي وقت بس المجتمع هو اللي لسة مش ناضج كفاية ويقدر إن المشاعر والإحتياج للطرف الآخر مالهاش سن
ثالث عشر .. مش المفروض أي حد يؤدي واجبة إننا نكافئة .. وموضوع الظابط والجرنال ده كله غلط .. بس هي يعني الغلطة الوحيدة في جرايدنا؟
رابع عشر .. العيب ده في بلادنا بس .. في بلاد برة الجامعات معمولة علشان التعليم والأبحاث لتحسين وإنماء جميع المجالات الإقتصادية .. مش شهادات وخلاص .. وبتلاقي جامعاتهم متبنياها كبرى الشركات .. العيب في أساتذنا ونظام الحكم اللي ما بيعملش زي كده
خامس عشر .. سؤال غير واضح
بس كفاية كدة .. إيدي وجعتني من الكتابة
يامراكبى
أية ياعم دة؟؟ خدتنى واحدة واحدة وفصصتنى وحلتلى كل المشاكل
قريت الرد بتاعك أكتر من مرة عشان الأقى أجابة غلط بس بصراحة أفحمتنى
أجاباتك منطقية جدا، يعنى تقدر تقول انت ولؤى حليتولى الموضوع
عرفت تتقمص دور الحكيم كويس
تحياتى
Post a Comment